Критичните точки на патот од училиштето до домот беа мапирани од ученици од десетте основни училишта во Карпош во рамките на проектот „Детективи на патот – зелени стапалчиња“. Денеска, учениците што учествуваа во проектот имаа средба со градоначалникот Стефан Богоев и пред него ги презентираа главните пречки, критични безбедносни точки во сообраќајот на патот од домот до училиштето.

Најпрвин учениците и наставниот кадар изразија благодарност што врз основа на ланскиот извештај од проектот е унапредена безбедноста пред сите основни училишта и Општината постапила по нивните насоки. Поставени се лежечки полицајци пред училиштата: „Јан Амос Коменски“, „Димо Хаџи Димов“, „Вера Циривири – Трена“ и „Братство“, а во тек е и поставување вакви платформи и пред „Војдан Чернодрински“ и „Христијан Тодоровски – Карпош“.

Исто така, минатата година учениците предложија „Прашка“ да биде еднонасочна и овој предлог веќе е реализиран кога општинските служби, Град Скопје и СВР Скопје утврдија дека е возможно такво сообраќајно решение.

Од оваа учебна година пред сите училишта има и задолжени лица за регулација на сообраќајот со цел да се овозможи полесен пристап на младите до образовната установа.
Учениците денеска споделија нови препораки и сугестии за надминување на проблемите. Зборуваа за обележување на пешачките премини, ослободување на тротоарите од возила, поголемо користење велосипеди и електрични тротинети, засадување ново зеленило, уредување на училишните дворови, нови детски игралишта и слично.

Градоначалникот Богоев им се заблагодари на учениците за споделеното и посочи дека тие навистина ѝ помагаат на Општината имајќи предвид дека сме во период кога се креира буџетот за 2020 година и граѓанското учество е важно за да создадеме буџет според потребите на сите граѓани во заедницата. Извештајот од овој проект ќе биде презентиран и на самитот за заштита на климатските промени на Обединетите нации, кој оваа година, од 2 до 13 декември, ќе се одржи во Мадрид, Шпанија. Општина Карпош е единствената локална самоуправа од Македонија која ќе биде застапена со презентација на проект на овој самит.