Македонија
Маричиќ: Во моментов не се можни онлајн судења

Министерот за правда, Бојан Маричиќ, вели дека во овој момент не е возможно да има онлајн судења и покрај пандемијата со Ковид-19.
„Ние сме свесни дека законската рамка во моментов не дозволува класични онлајн судења какви што можеби има во другите држави. Вистината е дека ова е прашање коешто е сложено и бара дискусија од сите фактори и актери, само еден министер или само Владата не може да го реши овој проблем“, рече Маричиќ.
Тој вели дека најдобро е таа дискусија да продолжи и да се бара заеднички решение коешто ќе функционира во пракса.
„Не е добро да има преголем застој, ние со тие застои во минатото се боревме и не треба да дозволиме да се повтори. Не треба ниту едно решение да се отфрла и за секое решение треба да бараме практична примена. Владата е подготвена да разговара“, рече Маричиќ.
Според него, државата ќе може да помогне со средства за опремување на судовите за можните онлајн судења.
„Во моментот кога Собранието би усвоило таков законски предлог, ние како Влада ќе направиме сè за обезбедување информатичка опрема за судовите. Спремни сме да помогнеме и повеќе од тоа што е сега доколку се определиме за онлајн судење како концепт. Дел од европските фондови се насочени кон зајакнување на капацитетите на судовите“, рече Маричиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без вода дел од Центар

Од ЈП Водовод и канализација Скопје известуваат дека денеска поради уличен водоводен дефект од ф 150мм на улицата Самоилова бр.50 во Центар, со прекинато водоснабдување ќе бидат корисниците од улицата Самоилова, улицата Јоаким Крчовски и улицата Банатска.
Водоснабдувањето ќе биде прекинато од 08:40 часот до завршување со санирање на дефектот.
Македонија
Мицкоски: СДС ги продаваше македонските интереси, а Владата предводена од ВМРО-ДПМНЕ ги врати дел од позициите на Македонија на меѓународен план

Христијан Мицкоски, претседател на ВМРО-ДПМНЕ и премиер, се обрати на 34-годишната конференција на Унијата на Млади сили на ВМРО-ДПМНЕ.
Една од темите за која тој говореше се однесуваше на опозициската СДСМ, и нивните политики кои, како што кажа, се целосно без вредности, без етика, а и базирани врз материјални интереси и моќ. Според него, Македонија победува на меѓународната сцена, а во контекст на ЕУ и позицијата која Македонија сега ја застапува, посочи дека Европа сега има слух за вистината за македонскиот идентитет.
„Ги слушам од опозицијата како велат дека СДСМ ги градела темелите на Македонија. Сакам од овде, од Велес, од овој величествен настан, да ги прашам: Кои темели ги градевте вие? Дали оние темели кога во времето на транзицијата, ја ограбивте, опустошивте Македонија. Кога нашите родители губеа работа, кога со тажни чела и погледи не гледаа кога се враќаа од работа дома, затоа што имаа неизвесна егзистенција за себе и за своите семејства. Дали на тие темели зборувавте кога ја опустошувавте Македонија, кога стотици илјади македонски граѓани останаа без работа. Или пак, на оние темели кога го менувавте името, кога го менувавте знамето, и го прифаќавте оној срамен договор, со Бугарија, ставајќи ја Македонија во подредена улога? На тие ли темели зборувате“, праша Мицкоски.
Мицкоски посочи дека Владата предводена од ВМРО-ДПМНЕ откако е на власт ги врати дел од позициите на Македонија на меѓународен план, истото она коешто СДСМ го продаде. Тој додаде дека приказната за Македонија денес е позната и во Минхен, Берлин, и во Лондон, и во Брисел.
„Позади нас се денови кога се боревме во Брисел, да биде усвоена резолуцијата со којашто се зборува за прв пат од осамостојувањето на нашата татковина, за посебен македонски вековен идентитет. За посебен, македонски јазик. За наследство коeшто е со векови старо. Кога не гледаа како се бориме, молеа бога да не успееме, кога гледаа како аргументираме, како на маса ја добиваме битката се молеа да не успееме. Им олесна, кога бриселските политичари одлучија извештајот да го поместат наместо пред неколку дена на 24 јуни овој месеци. Но нема бегање. Тој извештај ќе биде усвоен затоа што цела Европа и Брисел знаат за вековниот посебен македонски идентитет. И тоа ќе го поддржат, за македонскиот јазик којшто е факт“, вели Мицкоски.
Тој објасни дека политиките на СДСМ се само базирани врз материјални интереси, потреби и моќ, и тие делуваат без вредности, без етика. Според него, овој пат, Европа има слух за вистината за македонскиот идентитет.
„Колку и да овие од опозицијата да се подаваат дека немало потреба, дека немало потреба дека тие кога е дошле ќе прифателе се што им било ставено на маса, па дури ако треба и од Македонци да ги избришеле. Само да има нови фабрики за марихуана. Само да има тендери. Само да има грабеж и пљачка. Тоа беше, драги пријатели, тажната вистина којашто Македонија ја живееше 7 години. Порази ограбување, опустошување, срам. Тоа се карактерните особини на денешната опозиција. И кога ќе ги видите и едните и другите и третите како заедно не напаѓаат, тогаш бидете сигурни, ВМРО-ДПМНЕ и коалицијата, и оваа влада се на правиот пат на патот заедно со народот. Тоа е патот на иднината“, заклучи Мицкоски.
Македонија
(Фото) ДЗС: Пронајдена артилериска граната од 65 mm од Првата светска војна во Ресенско

Вчера во 18.50 часот од крај брегот на Преспанското езеро на плажата „Сливница“ во општина Ресен, од страна на Дирекцијата за заштита и спасување (ДЗС) е интервенирано за отстранување неексплодирано убојно средство (НУС) од минатите војни, а по пријава на 112 во ЦУК.
Конкретно, била пронајдена артилериска граната од 65 mm од Првата светска војна. Се работи за граната којашто била истрелана и веќе поминала низ топовска цевка што се препознава по нејзиниот ребраст прстен, но поради непознати причини после истрелувањето не ја завршила целта, не експлодирала. Истата е ризична за поместување, а нејзината запалка е опасна, бидејќи при удар е можно да дојде до нејзино активирање, извести ДЗС.
По претходно внимателно испитување на нејзината состојба, таа е безбедно подигната, и од пиротехничарот од Дирекцијата за заштита и спасување (ДЗС) Битола, Ѓорги Стефанов, е отстранета и пренесена безбедно до соодветен магацин за НУС.
ДЗС апелира до граѓаните кога ќе пронајдат неексплодирани убојни средства да не ги фаќаат и поместуваат, туку едноставно да се јават на Единствениот повикувачки број за итни случаи 112, по што надлежните институции и служби ќе се погрижат безбедно да бидат отстранети или неутрализирани.