Македонија
Маричиќ: Правиме чекор напред во евроинтеграциите, од КОВЕБ преминуваме во КОЕЛА

Заменик-претседателот на Владата задолжен за европски прашања Бојан Маричиќ денеска заедно со претседателот на Владата Димитар Ковачевски и министерот за надворешни работи Бујар Османи ја имаа првата средба со работното тело на Советот на ЕУ надлежно за земјите кои преговараат.
– Во текот на последните подготовки, денеска се одржува првиот работен состанок со КОЕЛА пред утрешниот почеток на скрининг процесот. Одиме чекор напред во евроинтегративниот процес, од КОВЕБ преминуваме во КОЕЛА, со што се потврдува ЕУ перспективата и поддршката од сите земји членки на Унијата за нашата земја, рече на состанокот Маричиќ.
Вицепремиерот Маричиќ и главен преговарач во преговорите со Европската Унија ја искористи шансата и го изрази своето задоволство од брзиот трансфер во работното тело КОЕЛА, потенцирајќи дека постои подготвеност да имаат чести состаноци во наредниот период, додека Северна Македонија напредува во преговорите.
– Процесот на проширување оди напред, отворањето на пристапните преговори за Северна Македонија и Албанија треба да се сфати како позитивен сигнал и поттик за сите максимално да се посветиме и брзо да ги испорачаме реформите, додаде Маричиќ.
Маричиќ пред присутните делегати, претставници на земјите членки на Европската Унија во работното тело за проширување при Советот на ЕУ, направи ретроспектива на подготовките за почетокот на преговорите, во изминатиот месец, истакнувајќи дека во периодот кој следи ќе се засили партнерската соработка со Европската комисија и земјите членки на ЕУ.
Свесни дека преговарачкиот процес е сложен и предизвикувачки, ние како и секогаш сме подготвени да работиме тесно и во партнерство со Комисијата и нејзините служби, како и со земјите членки на ЕУ, за побрзо да го завршиме нашиот дел од работата.
На состанокот Маричиќ уште еднаш ја потврди заложбата на Владата овој процес да биде транспарентен и инклузивен, со вклучување и соработка со различни чинители како што се граѓанското општество, академската заедница и бизнис-заедницата и сите други засегнати страни.
– Апсолутно е важно да имаме национален консензус за пристапниот процес и опозицијата да игра конструктивна улога во исполнувањето на нашата стратешка цел за полноправно членство. Во моментов ги операционализираме сите тела на структурата и паралелно Секретаријатот за европски прашања работи на развивање насоки и градење капацитети за сите тела.
Присутните на состанокот развија дискусија и за глобалните предизвици, како што се војната во Украина, енергетската и прехранбената криза, потребата за закрепнување по ковид, кибербезбедноста итн., кои се причина плус за Унијата да го заврши обединувањето на континентот.
– Целосно обединета ЕУ ќе биде поотпорна и способна ефективно да одговори на сите сегашни и идни предизвици. За нас од другата страна нема алтернатива и затоа треба да го искористиме моментумот и со брзо темпо да се движиме кон полноправно членство во ЕУ, заклучи Маричиќ.
Вицепремиерот за европски прашања и главен преговарач со Унијата денеска заминува за Брисел, во пресрет на утрешниот почеток на скрининг процесот и отворањето на преговорите на Северна Македонија со Унијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Мицкоски му дели задачи на Орце како што ѝ делеше и на Арсовска“, велат од СДСМ

„Христијан Мицкоски повторно сака да биде во улога на шпицен градоначалник и им дели задачи на кандидатите за градоначалници на ВМРО-ДПМНЕ. Овој пат на Орце Ѓорѓиевски, исто како што беше случајот со Данела Арсовска“, велат од СДСМ.
„Скопјани добро се сеќаваат: кога Мицкоски и Арсовска делеа задачи и бизниси, сè им функционираше. Заедно ветуваа бесплатен превоз, а Мицкоски највуваше 100 нови електрични автобуси, па дури и фабрика за производство.
Но, се скраа за рацете во медот и го заглавија главниот град во хаос.
Последниве четири години со ВМРО-ДПМНЕ на власт во Скопје видовме што значи тоа, целосно игнорирање на интересите на граѓаните. Видовме што значи партијата и партиските интереси да се стават пред здравјето на луѓето, видовме што значи заради политички инает да се уништи градот, претпријатијата и со тоа животот на граѓаните.
Денеска ја гледаме истата шема. Со Мицкоски и Ѓорѓиевски скопјани може да очекуваат нови разочарувања, нов хаос и нови бизнис-договори на грбот на граѓаните.
Скопје заслужува повеќе. Скопјани очекуваат решенија, искреност и политики што носат резултати. Очекуваат чист, уреден, културен град со градоначалник што ќе работи со визија и план, а не нова Арсовска по диктат на Мицкоски“, соопшти СДСМ.
Македонија
Минатата недела „пајакот“ кренал 99 возила во општина Центар

ЈП Паркинзи на Општина Центар во соработка со Сообраќајната полиција-Скопје во периодот од 17.08.2025 до 24.08.2025 година, со помош на специјалните возила „Пајак“ отстранија 99 непрописно паркирани возила кои го попречувале нормалното и безбедно одвивање на сообраќајот.
ЈП ПОЦ и Општина Центар континуирано ќе ја спроведуваат оваа мерка и апелираат до граѓаните да ги почитуваат правилата и прописите и да ги оставаат своите возила само на пропишаните места за да им се овозможи на пешаците и велосипедистите нормално движење по тротоарите и велосипедските патеки, а на возилата безбедно движење по улиците.
Македонија
ДУИ: Мицкоски на погрешен пат, неуспесите не се покриваат со клевети

„Изјавите на премиерот Мицкоски и неговите повторни клевети зборуваат повеќе за неговата мака отколку за ДУИ. Наместо да даде отчет за слабите резултати на Владата во секоја област – од економијата до меѓународната изолација – тој се занимава со празни напади кон ДУИ“, велат од Демократската унија за интеграција.
„Наместо да измислува имагинарни непријатели, Мицкоски треба да објасни: зошто неговата влада го крши Уставот и законите, зошто ги дискриминира Албанците, зошто ја исклучи дијаспората од официјалните пресметки спротивно на уставните и законските норми, зошто ја инструментализира ДИК, Уставниот суд и другите институции за партиски и моноетнички цели и зошто со секоја одлука ја враќа државата назад во времето пред 2001 година.
ДУИ не може да остане рамнодушна кога се крши Охридскиот мировен договор – документ од суштинско значење за стабилноста и прогресивната иднина на државата. Обидот на Мицкоски да создаде политички „кнежевства“ меѓу Албанците, преку распарчување на политичката сцена со мали контролирани партии, е пропаднат проект чија цел е слабеење на албанското политичко претставување. Ова не придонесува за кохезијата на општеството, ниту за политичка стабилност.
Мицкоски, претставувајќи се како патриот и бранител на македонската кауза, всушност му штети на сопствениот народ. Ударот врз Охридскиот договор не ја унапредува државата, туку ја осиромашува и ја загрозува нејзината европска перспектива.
Нас не нè интересира дали сме или не сме во власта – туку да ја придвижиме државата напред, да ја извадиме од ќорсокак. Со стари политики процесите не напредуваат, а со судири не се гради иднината.
Оваа влада не е влада на граѓаните, туку на „српскиот свет“, со јасна ориентација кон оската Белград–Москва. Секоја нејзина одлука го загрозува евроатлантскиот пат кој Албанците и Македонците го избраа со апсолутно мнозинство.
Што се однесува до обвиненијата за криминал и корупција, одговорот е едноставен: прифатете го предлогот на ДУИ за целосен ветинг. Не ги штитете олигарсите и не ја блокирајте чистката на политиката од криминал. Не ги бранете корумпираните политичари, без разлика кој се. Нека има истрага за потеклото на имотот на секој политичар и секоја политичка партија. Нека има истрага за процесот на приватизација. Нека има истрага за активностите на безбедносните служби и за сите функционери од 1945 година наваму – од ОЗНА, УДБА, СДБ, ДБК, УБК, АНБ. Ова е предлогот на ДУИ, прифатете го.
ДУИ е и ќе остане гаранција за стабилноста, достоинственото претставување и европската иднина на државата. Мицкоски треба да знае: клеветите не ги покриваат неуспесите, ниту погрешната насока на оваа влада. Одговорот на граѓаните ќе дојде во октомври – и тој ќе биде јасен“, се наведува во соопштението од ДУИ.