Македонија
Маричиќ: Прочистувањето на правосудството треба да биде спроведено објективно и непристрасно
Mинистерот за правда, Бојан Маричиќ, го одржа првиот брифинг за медиумите на кој ја претстави реформската агенда на Министерството за правда и даде повеќе детали за жешките прашања во ресорот.
Прочистувањето на правосудството беше клучната тема на овој брифинг, а секако овде спаѓаат и темите како ревизијата на судските случаи и кадровското зајакнување на правосудството.
Маричиќ истакна дека целта на овие процеси е да се врати довербата на јавноста во правосудството, имајќи предвид дека за одредени предмети кривичниот прогон прекинал поради застарување на делото, но и дека на дел од предметите им се заканува слично сценарио.
Тој прецизираше дека прочистувањето треба да биде спроведено објективно и непристрасно, односно да се лоцираат обвинителите и судиите кои работат нечесно, а потенцираше дека тоа нема да биде процес на прогон. Токму затоа, министерот Маричиќ најави дека процесот на прочистување мора да биде кредибилен процес во кој јавноста треба да има доверба, а во кој судиите и обвинителите, стручната јавност и меѓународните партнери мора да бидат вклучени.
Во однос на почетокот на формалниот почеток на преговорите со ЕУ, Министерот Маричиќ истакна дека очекува во декември оваа година, за време на германското претседателство, Република Северна Македонија да ја има првата меѓувладина конференција. Маричиќ истакна дека втората половина на наредната година би требало да се отворат преговорите за Поглавје 23: Правосудство и фундаментални права.
ЕУ-мониторингот на судските случаи се очекува да почне на почетокот на идната година, околу 50 случаи годишно под мониторинг на ОБСЕ брифираше министерот Маричиќ. Тој додаде дека станува збор за процес кој треба да ја зголеми довербата на јавноста во правосудството, но и да ја увери Европската Унија дека навистина се спроведуваат законските принципи и во конкретни случаи, особено случаи на висока корупција.
На прашањето за тоа дали постои резервираност од страна на Судскиот совет и Советот на Јавните обвинители во однос на прочистувањето или, пак, сакаат да соработуваат, Маричиќ одговори дека во првиот круг на средби сите се заинтересирани да се покажат резултати во правосудството.
„Нормално судската власт е посебна, но делот на зајакнување на одговорноста, отчетноста и ефикасноста и тоа како е работа на Владата. Моја клучна порака беше дека во тој дел ќе мораме заедно да работиме и да испорачаме резултати. И од претседателот на Судскиот совет и од претседателот на Советот на Јавни обвинители добив уверување дека заедно ќе работиме на овој модел, секако државниот јавен обвинител и претседателот на Врховниот суд, дека сите тие ќе се вклучат ефективно во креирањето на моделот, но и во неговото спроведување. Без партнери во овие клучни институции тешко ќе успееме“, истакна Маричиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Лабудовиќ: Четири дена пред гласање, Герасимовски се слика со ракавици на рацете како чисти контејнери
Кандидатот за градоначалник на Центар, Мирослав Лабудовиќ, упати повик до жителите на неговата општина да му ја дадат довeрбата на 2 ноември да ја води општината во следните четири години.
„Време е за промена во Центар. Резултатите од гласањето во првиот круг недвосмислено покажаа опозициско расположение во општината. Близу 2/3 од тие што излегоа на изборните места, гласаа против актуелниот градоначалник Горан Герасимовски. Затоа што сакаат промена на нештата, сакаат нешто ново, поинакво – а тоа значи нова визија, нова енергија, непресушна река на идеи и проекти за подобрување на секојдневниот живот на граѓаните. Но, и нивно активно учество во носењето на сите одлуки што во надлежност на општината, а значат суштинска промена – промена кон подобро за нив“, порача Лабудовиќ.
Актуелниот градоначалник, според него, ако имаше што да понуди, ќе го правеше тоа во континуитет за сите претходни четири години.
„А, не на еден месец пред изборите да поправа реквизити од детски игралишта, на четири дена пред гласање да се слика со ракавици на рацете како чисти контејнери и други слично популистички активности – допадливи за око, но со кои не се решава ништо“, рече тој.
Спротивно на тоа, Лабудовиќ нагласува дека припаѓа на нова генерација политичари кои кога ќе дадат збор – истиот и го исполнуваат. Верува дека искуството од работење во реномирани меѓународни компании ќе биде пресудно во имплементација на вистински системски и одржливи решенија со кои ќе се надминуваат сите проблеми во Центар, не кампањски, туку долгорочно.
Тој упати повик до поддржувачите на кандидатките кои испаднаа во првиот круг, Билјана Ивановска и Марија Среброва, но и до сите граѓани кои се уште се мислат дали да гласаат во вториот круг.
„Ги повикувам граѓаните да излезат што помасовно и да гласаат. Да го заокружат бројот 2. Само така ќе ја донесеме вистинската промена во Центар. Промена која ќе значи Центар да биде целосна спротивност од сегашната слика. Почиста, еколошки ефикасна, побезбедна, урбано и плански средена општина. Општина со светли улици, слободни тротоари, со нови катни гаражи и повеќе паркинг места. Општина која ќе биде шампион во транспарентност, нон-стоп достапна и отворена за граѓаните. Општина во која ќе „царуваат“ културата и спортот, во која од училиштата ќе направиме образовни оази, а на младите ќе им понудиме перспективност“, повика Лабудовиќ.
Македонија
Независниот кандидат во Могила се откажа од изборната трка, ВМРО-ДПМНЕ доби уште еден градоначалник
Независниот кандидат за градоначалник на Општина Могила, Сашо Пивковски, објави дека се повлекува од изборната трка.
„Драги сограѓани, по внимателно размислување и бројни разговори со многумина од вас, одлучив да ја повлечам својата кандидатура од изборната трка. Ова не беше лесна одлука, но верувам дека е исправна и чесна во овој момент – во интерес на нашата општина и на сите граѓани што живеат во неа. Во изминатиот период слушнав различни мислења, совети и размислувања. Сфатив дека политиката не смее да создава поделби меѓу луѓето, особено не меѓу пријатели и семејства. Нашата сила е во заедништвото, не во поделбите. ВМРО-ДПМНЕ е мојата партија, мојот политички дом. Како нејзин член секогаш сум се водел од идејата за чест, работа и почит кон луѓето. Така било и ќе остане. Ќе продолжам да го поддржувам сето она што е во интерес на граѓаните и на вредностите за кои се залага оваа организација“, објави Пивковски.
Понекогаш, додава тој, вистинското лидерство не се покажува само кога чекориш напред, туку и кога знаеш кога треба достоинствено да застанеш на страна, за да не му наштетиш на она што го сакаш и почитуваш.
„Свесен сум дека оваа вест ќе изненади многумина, но ја носам со мирна совест и со чувство на одговорност. Убеден сум дека ова е најдоброто нешто што можев да го направам во овој момент. Ќе продолжам и понатаму да бидам тука – достапен, искрен и подготвен да помогнам секогаш кога ќе има потреба. Вашата поддршка, доверба и добри зборови ќе останат нешто што длабоко го ценам“, објави Пивковски.
Македонија
Герасимовски: Собрани три големи контејнери за кабаст отпад и 25 помали контејнери во Центар
Градоначалникот на Општина Центар, Горан Герасимовски, информира дека хигиеничарите на општината со целата механизација при денешното чистење собрале три големи контејнери за кабаст отпад и 25 помали контејнери.
„Интензивно чистиме во сите населби во Центар. Од рано изутрина, почнавме со чистење позади Капиштец, Водно, продолжуваме на повеќе локации во Дебар Маало, Кочо Рацин, Пролет позади Даре Џамбаз. Дел по дел, маало по маало, го расчистуваме целиот смет. Работиме во две смени, со активираност на целата механизација со која располагаме. Изминатава година постојано апелиравме за хигиената, но ги засукавме ракавите и чистиме и онаму кадешто општината нема надлежност, затоа што граѓаните заслужуваат чисти улици и празни контејнери без смет”, вели Герасимовски.
Тој информира дека ЈП „ПОЦ“ организира посебни пунктови и распоред за собирање на угостителски отпад.
„Реализираме нов начин на дистрибуција и депонирање на сметот. Викендов спроведуваме дератизација во училиштата и градинките. Во тек е вонредна дератизација, кадешто во сите 1980 шахти се фрла сертифициран препарат, но потребно е да се изврши и дератизација во сите згради. За тоа, организираме средба со сите управители на згради и куќни совети. Ја подигнуваме хигиената на повисоко ниво. Им благодарам на сите хигиеничари кои со натчовечки напори целиот овој период го чистат и хаосот на градската власт која го преплави Скопје во смет”, истакнува Герасимовски.
Тој ги повика компаниите да помогнат со механизација, камиони и логистика.

