Македонија
Маричиќ: Со максимално вложување ќе бидеме подготвени за полноправно членство во ЕУ до 2030 година

Вицепремиерот задолжен за европски прашања, Бојан Маричиќ, денеска присуствуваше на заедничката седница на Комисијата за европски прашања и Националниот совет за евроинтеграции, на која се расправаше за Извештајот на Европска kомисија за Македонија.
Маричиќ го изрази своето задоволство од одржувањето на седницата и кажа дека Владата цврсто стои на ставот дека процесот на преговори за полноправно членство со Европската Унија мора да биде инклузивен и транспарентен, со вклучување на сите општествени чинители во овој процес.
„Сметам дека ова е вистинското место, каде треба да го дискутираме Извештајот и од каде треба да доаѓаат пораките за како понатаму, особено сега, кога сме земја преговарач за полноправно членство во Европската Унија. Затоа како главен преговарач ќе иницирам воспоставување рамка за соработка со Собранието и зајакнување на неговата улога во процесот“, рече Маричиќ.
Тој додаде дека очекува целосна посветеност од страна на пратениците и подадена рака за заеднички да ги надминуваат предизвиците кои следат на евроинтегративниот пат и подготвеност да го дадат максимумот за конечно реализирање на нашата тридецениска стратешка цел.
„Само обединети ќе можеме да ја исполниме оваа национална задача. Процесот на преговори е процес на целокупна општествена трансформација која допира до сите нас и до сите аспекти на општественото живеење. Затоа, верувам дека само со национален консензус и максимално вложување на Владата како носител на преговорите, но и администрацијата која е ’рбетниот столб на процесот, граѓанското општество, Собранието, бизнисите, академската заедница и сите други засегнати страни ќе ја исполниме заложбата да бидеме подготвени за полноправно членство во Унијата до 2030 година“, порача вицепремиерот Маричиќ.
Евроамбасадорот Гир ги поздрави чекорите на Владата во решавањето на отворените прашања со соседите и во спроведување на континуирани и одржливи реформи кои нè ставија на вистинскиот пат за остварување на една од стратешките приоритети на нашата земја, со барање да останеме на овој пат и да се фокусираме на забелешките од Извештајот.
Вицепремиерот Маричиќ во своето обраќање се осврна на направената анализа на Извештајот од страна на Секретаријатот за европски прашања според која рече дека имаме позитивен Извештај, прв после отворањето на преговорите на 19 јули оваа година, кој според него е објективен и недвосмислено упатува на тоа дека имаме одржливи реформи, со нотиран јасен напредок и постигнувања во истите, но и ги идентификува областите каде треба уште повеќе да ги зголемиме напорите и да испорачаме повеќе резултати.
Од аспект на вкупната подготвеност, оценката за нашата земја за 2022 година е „добро ниво на подготвеност“. Кога станува збор пак за напредок, генералната оценка е дека во околу 90% од областите, имаме делумна или добра подготвеност. Извештајот оценува дека Северна Македонија го има задржано темпото на напредок и има подобрување во 23 од вкупно 43 области, односно поглавја, додека во останатите 20 области има ограничен или помал напредок, посочи Маричиќ, додавајќи дека ова покажува дека Северна Македонија има стабилен континуитет во вкупната подготвеност и напредок на земјата, и покрај сите внатрешни и надворешни предизвици со кои како држава или како дел од глобалниот свет се соочуваме, што претставува дополнителен мотив и поттик за нас.
Маричиќ напомена дека Европската комисија констатира дека процесот на скрининг се одвива континуирано и непречено, а земјата покажува високо ниво на посветеност и повтори дека цел процес на преговори ќе се води транспарентно и очекува вклученост од сите во истиот.
„Бидете уверени дека сите наоди и препораки во Извештајот ќе ги дискутираме заеднички и ќе ни користат како основа за ажурирање на Националната програма за усвојување на првото на ЕУ заедно со правото на ЕУ кое е презентирано на објаснувачките состаноци. Овој документ до крајот на годинава ќе биде ревидиран и ќе биде основа за подготовка на преговарачките позиции на земјата“, истакна Маричиќ пред народните избраници.
На седницата, на која присуствуваа и евроамбасадорот во земјава, Дејвид Гир, како и дипломатскиот кор, заменик претседателот на Владата и главен преговарач со Унијата упати благодарност до евроамбасадорот Гир и неговиот тим кои ни пружаат безрезервна поддршка, со уверување дека Северна Македонија ќе продолжи сите реформи да ги спроведува во партнерство со Делегацијата на Европската Унија, службите на Европската комисија и со земјите членки.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска-Давкова со Советот на амбасадори: потенцирана важноста од именување на кариерни амбасадори

Претседателката Гордана Сиљановска-Давкова денеска прими претставници на Советот на амбасадори, предводени од претседателката, амбасадорката Александра Наќева Ружин. На средбата присуствуваа и амбасадорите: Мухамед Халили, Љупчо Арсовски, Иљаз Сабриу, Тихомир Илиевски и Ивица Боцевски.
Тие изразија подготвеност за соработка и поддршка на институцијата претседател, преку утврдувањето на надворешно-политичките приоритети, независни и стручни анализи, јавни дебати, совети и консултации за меѓународните прашања.
Беа детектирани потенцијалните области за меѓусебна соработка и понудени идеи, предлози и иницијативи, коишто би придонеле за зајакнување на надворешно-политичките капацитети на државата.
Со цел унапредување на македонската дипломатија, соговорниците ја потенцираа важноста од именување на кариерни амбасадори како прв избор, истакнувајќи го значењето на нивното искуство за соодветно и достоинствено претставување на земјава во светот.
Претседателката ги поздрави амбициите на амбасадорите за поттикнување на професионален дијалог за прашања од национален интерес и изрази подготвеност за натамошна комуникација. Укажувајќи дека првата слика за државата е најбитна, Сиљановска-Давкова посочи дека искуството и потенцијалот што го имаат членовите на Советот може да претставува драгоцена помош во носењето на одредени одлуки.
На средбата таа ги реафирмираше заложбите за правична застапеност на жените во дипломатијата и придобивките од формирање на Регионален центар за извонредност за жени, мир и безбедност.
Соговорниците разменија мислења за македонската надворешна политика, односите со соседите, за Преспанскиот договор и членството на државата во меѓународните организации.
Македонија
Заев сам призна дека потпалувачот на пожар бил шофер кај него, СДС да се извинат, бара ВМРО-ДПМНЕ

А.Н. шоферот на Заев кој е уапсен за потпалување пожар бил шофер на Заев, тоа и самиот го признава, но како народната – ,,Не по врат, по шија“ се вади, не беше мој, на општината беше“, реагираат од ВМРО-ДПМНЕ.
„Александар Николов во тоа време, колку што се сеќавам, работеше на портирницата во општината и беше возач на општинско возило за потребите на општинските инспекции и останати општински служби за теренските активности“, кажа Зоран Заев за неговиот шофер пироман“, стои во реакацијата на владејачката партија.
СДС, додаваат од ВМРО-ДПМНЕ, наместо да пишува излитени одговори на прес-конференции, треба да се соочат со фактот дека се разобличени.
Како што истакнуваат, луѓе блиски до Заев и СДС се уапсени за потпалување пожари.
„Не очекувавме од Заев дека ќе признае дека се најблиски, но од СДС очекувавме минимум човечки капацитет и да го осудат потпалувачот и да се дистанцираат од Заев, но очигледно тоа е преголемо очекување“.
Македонија
„Срамно и безидејно е да се глуми после војна, генерали“, реагираат од „Идеа лаб“ на обвинувањата од СДСМ

По екстремно успешно организираниот Европски младински олимписки фестивал, за кого добивме потврда лично од претседателот на Европскиот олимписки комитет, политичките превирања не престануваат да ја дезинформираат јавноста со небулози, велат од ПР-агенцијата „Идеа лаб“, по прес – конференцијата на Јовица Јанковиќ од СДСМ кој кажа дека владата немала пари за младите на олимпијада ама имала за ПР агенции на власта.
„Имено, денеска на прес-конференција политичката партија СДСМ излезе со податок дека нашата агенција е ангажирана за промоција на фестивалот со финансиски надомест од Министерството за спорт, што е апсолутна невистина. Имено, точно е дека бевме ангажирани во делот на промоција на фестивалот, но ангажманот го добивме од Македонскиот олимписки комитет и тоа во делот на: промоција на настанот на социјални мрежи, изработка и координација на фан зоните, координација и организација на церемонија на отворање, затворање и церемонии на доделување медали“, се наведува во реакцијата.
Од „Идеа лаб“ велат дека за истиот ангажман на месечно ниво, доставува фактури до МОК за испорачаните услуги.
„Срамно и безидејно е да се глуми после војна, генерали. За фестивалот споменат на денешната прес-конференција добивме лично признание од Спирос Капралос, за најдобра одржана церемонија на отворање од 1991 година до денеска. Наместо да се зборува тоа, во медиумите, се шират лаги и невистини. Кога веќе некој решил да ни прави бесплатна реклама, можеше да спомене дека и во 2023 година, работевме на „Преспа Форум Дијалог“, кога партијата која денеска нѐ прозива, а тогаш беше на власт, нѐ ангажираше преку Министерството за надворешни работи. Во 2021 година Идеа Лаб работеше на проекти за Општина Аеродром кога локалната власт беше во рацете на партијата која денеска одржа небулозна прес-конференција. Искрено, Ве замолувам да не нè вмешувате во вашите политички превирања. Ние сме комерцијален субјект и за нашиот ангажман е неважна политичката определба, туку резултатите кои ќе ги испорачаме пред клиентот“, изјави Димитар Атанасовски, управител на ПР и маркетинг агенцијата „Идеа Лаб“.