Македонија
Маричиќ: Со прогресивна визија и план Западен Балкан е сѐ поблиску до ЕУ

Секретарот за меѓународна соработка на Социјалдемократскиот сојуз на Македонија, Бојан Маричиќ, заедно со лидерот Димитар Ковачевски и потпретседателката, Бисера Костадиновска-Стојчевска учествуваа на Самитот на лидери од Западен Балкан и Групата на социјалисти и демократи (S&D) во Европскиот парламент.
Денеска во Виена, Групата на социјалисти и демократи (S&D) во Европскиот Парламент ги обедини сите прогресивни лидери од регионот и ЕУ и низ плодна дискусија направи тековен преглед и анализа на случувањата во Европа, од кои произлезе јасна порака дека пристапувањето на Западен Балкан во ЕУ бара напори и силна заложба за процесот на проширување на ЕУ да се активира.
-Проширувањето сѐуште е најуспешната политика на ЕУ и инвестиција во стабилноста и просперитетот на европскиот континент, но тоа треба да се потврди со интеграцојата на земјите од Западен Балкан, вели Маричиќ.
Самитот беше насловен „Проширување за Западен Балкан СЕГА – за граѓански, демократски и мирољубиви општества“ ги обедини на едно место лидерите на прогресивните левичарски партии од Југоисточна Европа, како и раководството на парламентарната група на Партијата на европските социјалисти во Европскиот парламент.
Лидерите од Западен Балкан истакнаа дека очекуваат проширувањето да се базира на реформски евроентузијазам и ќе биде веродостоен и предвидлив, а пред сѐ фер.
Маричиќ од Самитот вели дека со социјалдемoкратите од регионот и ЕУ ќе работат на забрзување на евроинтеграцијата на регионот и дека ќе успеат во тоа.
Друга тема на која лидерите и европратениците разменаа мислења е соработката на прогресивните сили во справувањето со предизвиците кои ги предизвика руската агресија врз Украина.
-Заедно, преку блиска соработка со нашите партнери, групата S&D, ќе продолжиме да работиме на градење на заедничка прогресивна перспектива за ЕУ и предизвиците кои ги наметна новата геополитичка ситуација, рече Маричиќ.
На крајот од Самитот беше организирано потпишување на заедничка Декларација со која лидерите ќе се заложат за интензивирање на соработката што ќе придонесе за побрзо членство на земјите од Западен Балкан во Европската Унија.
-Со потпишување на политичката Декларација на Самитот на Групата на социјалисти и демократи и лидерите од Западен Балкан, поставуваме јасна и предвидлива агенда за проширување на Унијата со земјите од Западен Балкан, посочува Маричиќ.
Според секретарот за меѓународна соработка, Маричиќ, социјалдемократите од регионот делат исти вредности со европските социјалдемократи, кои се поттик заеднички да дејствуваат и да соработуваат за реализација на членството во ЕУ, како најдобра опција за реформирање и подобрување на општеството и животот на граѓани.
-Следниот период мора да се продолжи по ова позитивна траекторија и се движиме напред. Сега е клучно да се задржи политичкиот моментум, посочува Маричиќ, додавајќи дека и во пристапните преговори со ЕУ, можеме и понатаму да сметаме на силната поддршка на социјалдемократска група во Европскиот парламент.
Лидерот на СДСМ, Ковачевски, беше еден од панелистите на тема „Иднината на проширувањето на Европската унија во светло на заклучоците од Самитот во Тирана“, заедно со лидерите од регионот, Џукановиќ, Курти, Коњевиќ, Никшиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Каналот и детската градинка во Хасанбег стануваат реалност

Првиот вицепремиер и министер за животна средина и просторно планирање Изет Меџити денеска заедно со претседателот на Собранието Африм Гаши, министерот за социјална работа, демографија и млади Фатмир Лимани и градоначалникот на општина Гази Баба, Бобан Стефковски, беше на посета во скопската населба Хасанбег (Ченто) каде најави наскоро започнување на два капитални проекти за оваа населба.
„Ветување неисполнето со години од минатите влади сега станува реалност! Хасанбег конечно ќе ги добие атмосферскиот канал и државната детска градинка кои одамна беа ветени, но никогаш реализирани“, изјави Меџити.
„Да не заборавиме: страшните поплави во 2016 година однесоа 23 животи и уништија домови, земјишта и бизниси. Но, тогашната влада не ги презеде неопходните мерки за да спречат слични трагедии во иднина. Недостатокот на соодветна дренажа беше еден од главните фактори за катастрофалните штети. Сега, оваа грешка ќе биде исправена!“, рече Меџити.
Тој најави дека оваа значајна инвестиција, вредна 38 милиони денари, ќе овозможи изградба на канал во должина од 1.350 метри и ширина од 4 до 10 метри, во зависност од близината на куќите.
„Овој проект не е само инфраструктурна интервенција, туку посветеност на безбедноста, животот и достоинството на жителите на Хасанбег“, изјави првиот вицепремиер Меџити.
Проектот ќе се реализира со поддршка на Министерството за животна средина и просторно планирање, во соработка со општина Гази Баба, со што ќе се означи важен чекор кон правдата и безбедноста за жителите од овој крај.
Македонија
Герасимовски: Центар ја совлада екипата на Кисела Вода во фудбал на 41-те маџирмаалски средби

Денеска, екипата на општина Центар, предводена од градоначалникот Горан Герасимовски издвојува победа против екипата на Општина Кисела Вода, на ревијалниот натпревар во рамки на 41-те Маџирмаалски средби.
„Игравме фанта – стара, но добро зачувана игра, со што ја негуваме традицијата и спортскиот дух на нашата заедница. Гордост ми е што и оваа година сме заедно на овие прекрасни Маџирмаалски средби! Нашата традиција живее преку спортот, дружбата и заедништвото, а мојата поддршка ќе продолжи и во иднина. Изненаден сум од оваа позитивна енергија, од ова другарство и од целокупната организација, ви симнувам капа. Да славиме уште многу години! Да сте ми живи и здрави, мои Центарци, мои Маџирмаалци!“, истакна Герасимовски.
Маџирмаалските средби, по 41-ви пат почнаа вчера, традиција којашто се одржува со децении и го чува духот на Маџир Маало, како едно од најстарите и најавтентичните скопски маала. На самото отворање, Герасимовски потенцираше дека има голема чест што заеднички со маџирмаалците се одбележуваат овие денови.
„Маџир Маало е едно од најстарите и најавтентичните скопски маала – место со душа, каде што се чувствува посебната магија на градот. Нека оваа прекрасна традиција продолжи уште многу години!“, рече Герасимовски.
Македонија
Перински во Гази Баба: Домот на културата „11 Октомври“ во Ченто по скоро 40 години, повторно ќе стане центар на културата

Во рамки на теренските посети на општините насловени „Каде што срцето е дома“, министерот за локална самоуправа, Златко Перински, заедно со премиерот Христијан Мицкоски, министерот за култура и туризам, Зоран Љутков и градоначалникот, Бобан Стефковски, извршија увид на започнатата реконструкција на Домот на Културата „11 Октомври“, лоциран во паркот во Ченто. Градоначалникот Стефковски информираше дека домот ќе се простира на 1.000 метри квадратни, ќе има три нивоа, ќе биде енергетски ефикасeн и целосно инклузивен со лифт и тоалети за лица со посебни потреби, со капацитет за 180 гледачи.
„Повеќе од четири децении ова место беше најцрната точка во општина Гази Баба во кое се вршеа и девијантни појави, а за помалку од 18 месеци од денес ќе прерасне во центар на културата. Вкупната инвестиција е 84.240.000 денари обезбедени од првиот јавен повик на Владата и изразувам благодарност за финансиската поддршка на инфраструктурни проекти во општините која од историска важност и ќе донесе забрзан развој кој ќе ги реши децениските проблеми на граѓаните“, изјави градоначалникот Стефковски.
Ова е еден од четирите проекти кои ќе се реализираат во општина Гази Баба со средства од државниот буџет, за кој Општината аплицираше на првиот владин јавен повик.
„Повеќе од 40 години, скоро сите политички гарнитури ветуваа реконструкција и инвестиција за подобрување на условите за овој Дом, но, тоа досега, за жал, не се случи. Оваа Влада, преку првиот повик, успеа и овозможи средства за обнова на објектот, кое е култно место за жителите на Гази Баба. Сега, како резултат на нашата посветеност за поддршка на општините, како и посветеноста на градоначалникот Стефковски да ги детектира потребите на граѓаните и да аплицира на повикот, Домот на култура ќе стане центар на креативност и културни настани, место каде што ќе може да се собираат нашите деца, културни друштва и сите љубители на уметноста и културата. Оваа Влада со дела потврдува дека е вистински пријател на општините. Како и досега, така и од сега, ќе продолжиме да инвестира во проекти коишто се врз основа на потребите на граѓаните. Јас се надевам дека за многу кратко време, ова многу битно место за жителите од ова населено место, ќе прерасне во вистински храм на културата и заедно ќе се радуваме на многу убави настани“, изјави министерот Перински.
И премиерот Мицкоски не го криеше задоволството од почетокот на реконструкцијата на Домот на културата и јавно им честиташе на сите оние кои биле вклучени во процесот да ја детектираат потребата од овој проект.
„Продолжуваме и натаму да инвестираме проекти во општините, да поддржуваме капитални инвестиции. Нѐ очекува динамична пролет и реализација не само на проектите од првиот, туку и на оние од вториот јавен повик кои се финансираат со наша поддршка“, потенцираше премиерот.
Серијата посети на министерот за локална самоуправа Перински, продолжуваат и во следните денови, веќе од утре, ќе се реализираат средби со управата на Општина Чаир, како и со локалните жители.