Странската помош е важен дел од подготовките за пристапување во ЕУ, истакна вицепремиерот задолжен за европски прашања, Бојан Маричиќ, кој на денешната донаторска координативна конференција организирана од страна на Секретаријатот за европски прашања ги презентира приоритетите во спроведувањето и рационализацијата на донаторската помош за земјава, со цел да се насочи кон спроведување на реформските приоритети за поддршка на европската интеграција.

„Со цел да се исполнат развојните приоритети на земјава, овие состаноци се од суштинско значење за ефикасна координација на развојните политики“, истакна Маричиќ во обраќањето посочувајќи дека преку донаторската континуирана поддршка се обезбедува обемна финансиска помош за Република Северна Македонија, која ги следи потребите за стабилизација и пристапување во Европската Унија, а истовремено помага за подобрување на квалитетот и достапноста на помошта за да се зајакне ефективноста на развојната соработка.

Вицепремиерот и национален ИПА-координатор, Маричиќ, истакна дека координацијата и усогласувањето на странската помош се интегрален дел од нашите подготовки за пристапување во Европската Унија додавајќи дека и покрај одредениот степен на развој, управување и координација на развојната помош што ја постигнавме, сè уште има предизвици што би можеле да се надминат и рационализираат, а кои бараат итно внимание, и тоа натамошно подобрување на функционирањето на секторските работни групи, подобрување на комуникацијата со донаторите и рационализирање и усогласување со стратешкото планирање на донаторите.

На донаторската конференција Маричиќ изрази очекување дека механизмот за координација заснован на секторски пристап ќе придонесе за обезбедување посилен фокус и систематски напори за постигнување развојни приоритети преку создавање синергии за зголемена ефективност и ефикасност во давањето на странската помош, а паралелно со тоа непотребното удвојување на напорите ќе биде сведено на минимум.

„Свесен сум за фактот дека овој пристап бара силна посветеност и внимание од сите инволвирани страни и затоа ги ценам вашите напори за унапредување на овој механизам, за вашата иницијативност, вашата подготвеност да дадете поддршка и вашата соработка во воспоставување на овој обновен метод на координација. Говорејќи во својство на заменик-претседател за европски прашања, но и како национален координатор за ИПА и национален координатор за странска помош, бидете уверени дека Владата останува посветена на обезбедување сите потребни ресурси и напори за усвојување на овој нов пристап и редовна соработка со вас“, истакна Маричиќ пред донаторската заедница.