Македонија
Марковите Кули прогласени за споменик на природата

Општина Прилеп започнува со реализација на проектот „Маркови кули-заштита и делување“, како дел од Програмата „Подобрување на управувањето со заштитените подрачја“, што ја спроведува УНДП во соработка со Министерството за животна средина и просторно планирање, а финансиски поддржана од ИПА фондовите на Европската Унија.
Покрај градоначалникот на Прилеп, Илија Јованоски, на денешната промоција на проектот присуствуваа амбасадорот на ЕУ во Македонија, Самуел Жбогар и постојаната претставничка на Програмата за развој на Обединетите Нации, Луиза Винтон.
Јованоски го истакна задоволството од почетокот на реализација на проектот и прогласувањето на локалитетот „Маркови Кули за споменик на природата„, потенцирајќи дека зголемениот обем на посетители и развојот на туризмот, предизвикаа негова неконтролирана експлоатација и деградација.
„Токму овој проект на Општина Прилеп, Маркови Кули – заштита и делување’, е во насока на надминување на овие проблеми и има за цел да го подобри управувањето со заштитеното подрачје, со воведување заштитни механизми и систем за мониторинг. Проектот ќе овозможи развој на мали инфраструктурни зафати за подобра пристапност на посетителите и подобрено информирање на локалната заедница, а преку непосредна соработка со Институтот за старословенска култура, ќе придонесе за зачувување на овој споменик на природата“, истакна Јованоски.
Градоначалникот појасни дека проектот предвидува инвентаризација и подготовка на бази на податоци за најзначајните биогеографски и културни локации, воспоставување на планови за собирање на отпад и заштита од пожари. Со проектот е предвидено поставување на видео мониторинг систем, патокази и информативни табли, означување и уредување на патеките, изградба на видиковци и други активности што ќе го подобрат пристапот и ќе ја подигнат свеста на посетителите и локалното население.
Амбасадорот на ЕУ во Македонија, Самуел Жбогар потенцираше дека Европската Унија посветува особено внимание на заштитата на животната средина и на биодиверзитетот, за што доволно кажува податокот за инвестираните 6 милиони евра во проекти од таа сфера.
Луиза Винтон, постојаната претставничка на УНДП, рече дека секој од 17-те грантови што се имплементираат од УНДП со финансиска поддршка на ЕУ, се во висина до 100.000 евра, но истовремено најави дека дополнително ќе бидат доделени и 8 други поголеми грантови во висина од по 400.000 евра.
„Овие грантови се наменети за националните паркови: Галичица, Пелистер и Маврово, потоа за Дојранското, Охридското и Преспанското езеро, како и за Јасен и за кањонот Матка. Кога зборуваме за заштитен предел или за заштитена локација, луѓето мислат дека тоа значи изградба на ограда околу таа локација и да не се дозволи пристап на луѓето и сето тоа да се држи изолирано од нив. Меѓутоа нашиот пристап е поинаков, затоа што под заштита на природата и заштитените подрачја, ние подразбираме понатаму да се промовира заштитата на овие локации, се’ со цел, како што кажа градоначалникот, да може да се развие и туризмот и разни видови спорт. Да не се уништи природата, туку да се зачува природата во интерес на локалното население“, истакна Луиза Винтон.
За време на денешниот престој во Прилеп, амбасадорот на ЕУ Самуел Жбогар и претставничката на УНДП, Луиза Винтон, ги посетија јавната научна установа Институт за старословенска култура, Музејот за тутун и манастирот „Трескавец“ со црквата „Успение на пресвета Богородица“,како дел од културното богатство на Прилеп.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Министерството за одбрана реагира на соопштението на СДСМ: Лицемерно, со манипулација на факти и со целосно извртување на вистината

„Лицемерно, со манипулација на факти и со целосно извртување на вистината – така се карактеризира соопштението од политичката партија СДСМ која се обидува редовна и навремена набавка која се спроведува години наназад и се однесува на потребите на Армијата и СИТЕ угостителски објекти на Министерството и Армијата, вклучувајќи го и Домот на Армијата, авто камповите во Дојран и Охрид, како и Хотелот „Шар“ на Попова Шапка, да ја претстави во сосема поинакво светло. Првенствено, треба да се има предвид дека набавеното кафе и пијалоци во угостителските објекти кои се од отворен карактер за граѓаните, се во слободна продажба, а приходот од продажбата повторно влегува во македонскиот буџет“, реагира Министерството за одбрана на соопштението од политичката партија СДСМ.
„Впрочем, имајќи предвид дека последните седум години со Министерството раководеа кадри на оваа политичка партија, кои ги правеле ИСТИТЕ набавки, се поставува прашањето – дали тие не знаеле што прават, дали се „луксузирале“ со народните пари или сега се обидуваат да стават сомнеж на функционирањето и побарувањата од не било која, туку најценетата и најпочитуваната институција во државата – македонската Армија?
Фактите се следни:
Набавката на кафе и алкохолни пијалоци е спроведена во јавна и транспарентна постапка. Целата документација, вклучително и тендерската документација, договорите и одлуките се јавно достапни на Порталот за јавни набавки и секој граѓанин, новинар или институција може слободно да направи увид, анализа и споредба со набавките од претходните години.
Набавката се однесува на угостителски објекти од отворен тип, кои се користат во рамките на протоколарни, воени и меѓународни активности, а не за „удобност“ на министри, како што лажно се тврди.
Години наназад е спроведена ИСТА ТАКВА НАБАВКА, која оваа година (во споредба со 2023 година) е со многу помали количини, на пример: ставката за алкохолни пијалоци е намалена од 50 до 88 проценти, а жестоките алкохолни пијалоци кои претходно биле набавувани се целосно отстранети.
Сумата на договорот во 2025 година е намалена за 15 проценти во споредба со 2024 година и за речиси 40 проценти во споредба со 2023 година.
Прашањата кои се поставуваат се логични: Или раководството од СДСМ кое го предводело Министерството не знаело што работи и што набавува или политичката партија влегува во едно црно сценарио во кое се обидува да ја вметне и македонската Армија.
Ги повикуваме сите медиуми да не ги земаат предвид ваквите дезинформации кои се пласираат во јавноста особено од страна на политички партии. Борбата со дезинформациите и манипулацијата со фактите е нешто против кое треба сите заедно да се бориме вклучувајќи ги и политичките партии, а не тие да потекнуваат токму од овие кујни.
Се работи за македонските граѓани и за Македонија и токму затоа не смееме да дозволиме граѓаните да бидат излажани“, се наведува во реакцијата од Министерството за одбрана на соопштението од политичката партија СДСМ.
Македонија
Од утре се нормализира сообраќајот на регионалниот пат Нова Брезница – Македонски Брод преку националниот парк Јасен

Утре од 05.00 часот регионалниот пат Р 1106 Нова Брезница – Македонски Брод преку националниот парк Јасен ќе биде пуштен за сообраќај во термините од Министерство за внатрешни работи, извести АМСМ.
Македонија
(Видео) СДСМ Прилеп: Заради протест на вработените, прилепчани останаа без градски превоз

„Систематски, како по книга, ВМРО-ДПМНЕ го уништува Прилеп! Неисплатената плата на вработените во Јавното претпријатие за просторни и урбанистички планови, е причина за тридневниот прекин на градскиот превоз во Прилеп. Како главни виновници за настанатата ситуација, вработените и директорот на јавното претпријатие ги посочија Општината, односно училиштата, кои на претпријатието му должат фантастични 7 милиони денари“, вели Саша Лепиткова, претседателка на Форум на жени на ОО СДСМ-Прилеп.
„Така, неспособноста на градоначалникот Борче Јовчески и аматерското водење на институциите од страна на директорите на ДПМНЕ, ги принуди прилепчани сами да се снаоѓаат и да го решаваат проблемот кој им го сервираше локалната власт.
Со тоа, после само два дена на виделина излегоа лагите за „успешното“ функционирање на локалните институции, кои преку таканаречениот „Отчет“ Јовчески и ДПМНЕ ги презентираа на партискиот „Саем на срамот“ во Скопје.
Лага е дека Општината набавила 5 нови минибуси за градскиот превоз, а уште поголема лага тезата за „огромните“ инвестиции во основните и средните општински училишта.
Да биде трагикомедијата поголема, токму лошото менаџирање на овие институции и нивната меѓусебна спрега, ги доведе во ќорсокак вработените во јавното претпријатие за просторни и урбанистички планови.
Граѓаните на Прилеп немаат никаква дилема дека актуелната владејачка гарнитура на ДПМНЕ, е најлошата од постоењето на градот.
После обврските од 6 милиони евра кои Јовчески и ДПМНЕ му ги оставаат на новиот градоначалник, после испустените јавни претпријатија, прашањето кое се наметнува е – ќе имаат ли време до крајот на мандатот да уништат уште нешто?“, изјави Саша Лепиткова, претседателка на Форум на жени на ОО СДСМ-Прилеп.