Македонија
(Видео) Марш на живите во Скопје: Ќе се сеќаваме на холокаустот за никогаш да не се повтори

По повод одбележувањето на 75-годишнината од холокаустот на македонските Евреи во Втората светска војна во Скопје, се одржа марш под мотото „Маршот на живите“. Учесниците од Музејот на град Скопје се упатија кон споменикот посветен на депортираните 7.144 Евреи. Во поворката учествуваше и премиерот Зоран Заев, придружуван од претседавачот на Советот на министрите на Босна и Херцеговина, Денис Звиздиќ, кој е во посета на земјава.
Маршот почна пред Музејот на Скопје, а заврши пред Тутунскиот комбинат (поранешниот Монопол), од каде што во март 1943 година 7.144 македонски Евреи во три депортации со вагони беа однесени во логорот на смртта Треблинка. По пристигнувањето кај споменикот, делегациите и претставниците на здруженијата на Евреите положија цвеќе.
Во своето обраќање премиерот Заев истакна „со оваа комеморација оддаваме почит, се сеќаваме и одбележуваме 75 години од деновите кога 7. 144 Евреи од Скопје, Битола и од Штип, но и од цела Македонија, беа собрани во просториите на тогашниот Монопол и беа испратени на еден пат од кој никогаш не се вратија“.
„Нивниот најголем престап беше нивното постоење, нивната култура, нивната традиција, нивната заедница. За тоа беа казнети со најдраконската казна и предвреме оттргнати од своите најблиски, од својата земја, од своите животи. Геноцидот над Евреите во Втората светска војна беше борба на деструктивни и антицивилизациски сили против сета добрина и љубов, против пријателството и човештвото. Холокаустот беше борба против луѓето, слободата и нашето заедништво“, рече Заев.
Тој нагласи дека нашите сограѓани, Евреите, беа книги на нашето заедничко постоење, испишани со години и векови на историја и традиција, борба и пркос за подобро утре за сите што живеат и живееја на овие простори.
„Нашата сплотеност во осудувањето и сеќавањето на депортацијата на нашите сограѓани во логорот на смртта, Треблинка, е повеќе од само симболична. Денес ги повторуваме лекциите од минатото за уште посилно да си го осветлиме патоказот за иднината што заеднички ја избравме. Омразата не е наш избор. Прифаќањето на различностите, љубовта кон ближниот, но и почитта кон другиот, поддршката, соработката и пријателството се вредностите што ги прифаќаме со нашите мисли и срца, а ги чуваме со нашите дела. Никогаш да не заборавиме што се случи тука пред 75 години. Историјата се повторува само за оние што стануваат слепи за минатото. Ние нема да бидеме слепи и ќе продолжиме да се сеќаваме за никогаш да не се повтори“, истакна премиерот Заев.
Бојко Борисов, претседател на Владата на Република Бугарија, во своето обраќање потенцира дека масовната егзекуција на невини луѓе за време на Втората светска војна е едно од најтешките злосторства во човечката историја. Во својот говор тој потсети дека одговорност за одлуката за депортацијата на Евреите од Македонија во Треблинка е одлука на тогашниот генерал на нацистичка Германија, Хајнрих Химлер, и на германскиот амбасадор во Софија, Адолф Бекерле.
„Ние чувствуваме длабока болка и жал поради тоа што не можевме да ја спречиме смртта на тие луѓе. Денес ние сме должни да не ја заборавиме трагичната судбина на жртвите на холокаустот и за бидеме сигурни дека вакви настани никогаш повеќе нема да се повторат“, истакна Борисов.
Претседателката на Еврејската заедница во земјава, Берта Романо-Николиќ, во обраќањето по повод сеќавањето за холокаустот на Евреите од Македонија нагласи дека геноцидот на цел народ во Втората светска војна останува општо мерило за тоа што може да предизвика злото што се крие во човекот. „Без сеќавање, нема иднина, во име на иднината проштеваме, но не забораваме зашто и страдањата на тие луѓе се наша одговорност“, рече таа. Комеморацијата по повод 75-годишнината од холокаустот на Евреите од Македонија заврши со молитвите „Ашкава“ и „Кадиш“ и со полагање венци свежо цвеќе на спомен-обележјето во некогашниот Монопол во Скопје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Алармантно – Албанците систематски се исклучуваат од институциите, во Одбрана, од 26 нови вработувања, 25 се Македонци, а само еден е Албанец“, вели ДУИ

„Демократската унија за интеграција изразува длабока загриженост поради алармантното ниво на дискриминација против Албанците во државните и јавните институции. Најновиот пример доаѓа од Министерството за одбрана, каде што од вкупно 26 нови вработувања, 25 се Македонци, додека само еден вработен е Албанец, јасен доказ за организирана политика за исклучување на Албанците од институционалниот живот во Република Северна Македонија“, велат од ДУИ.
„Ова не е изолиран случај, туку дел од долгорочна, системска стратегија изработена од македонските партии и политичката олигархија уште во 2022 година, која континуирано се спроведува од оваа влада. Целта е јасна: да се минимизира улогата на Албанците како фактор во државните и јавните установи.
Во поддршка на овој план, се вклучи и Уставниот суд, чијашто пракса преку отстранување на етничкото балансирање и обврската за неидентификување според етничка припадност, го нарушува темелниот принцип на Охридскиот рамковен договор: рамнотежата, правичната и адекватна застапеност и мултиетничкиот карактер на државата.
Ова дискриминаторска платформа продолжува преку низа на таканаречени “отворени” конкурси, каде што, под маската на професионализам и компетентност, Албанците се исклучуваат систематски, практика која потсетува на периодот пред 2001 година.
Случајот со Министерството за одбрана е само еден фасцинантен дел од оваа загрижувачка приказна, која по повеќе од една година имплементација јасно покажува дека се гради моноетничка држава, каде што Албанците се третираат како не посакувани.
Ова е концепт создаден од македонската олигархија, поддржана од одредени “васали” меѓу Албанците кои не се дел од власта по волја на својот народ, туку како избрани од ВМРО‑ДПМНЕ, како во времето на поранешна Југославија, кога некои Албанци беа фаворизирани од страна на Слободан Милошевиќ, но не по волја на самиот албански народ.
ДУИ цврсто го потврдува својот непоколеблив став во заштита на колективните права на Албанците и на Охридскиот рамковен договор како основа на новиот општествен и институционален поредок. Секој обид за разнишување на овој поредок преку судови, манипулирани конкурси или системска дискриминација, ќе биде силно осудуван и ќе му се спротивставиме политички, институционално и на меѓународно ниво“, се наведува во соопштението на ДУИ.
Македонија
„Владата ги остави граѓаните сами против пожарите, импровизацијата на Мицкоски скапо ја чини Македонија“, вели СДСМ

„Владата повторно ги остави граѓаните сами да се борат со пожарите, гледаме катастрофална неподготвеност на институциите. Само еден ден откако завршија со ПР и сликање со импровизираните хермелини, реалноста им се удри од глава на Мицкоски и Ангелов. Минатата година изгореа речиси 10% од територијата на државата и тогаш СДСМ им беше крив за пожарите иакко додека СДСМ беше на власт за седум години изгоре помалку шума тколку за една година на ДПМНЕ. Ветуваа дека ова лето „ќе бидат подготвени“, а денес ја гледаме истата неспособност, истата незаинтересираност и истата импровизација“, соопшти СДСМ.
„Цела година имаа да набават опрема, да вработат пожарникари и да го подготват системот. Наместо тоа, Владата ниту набави нови возила, ниту ги сервисираше постојните, ниту навреме обезбеди кадар. Наместо модерни возила, сега ги адаптираат старите армиски хермелини кои не можат ниту да пристапат на тежок терен. Само лани владата набавила возила за функционерите и администрацијата од неколку милиони евра. Наместо да вработат обучени пожарникари со достоинствени плати, дури сега, во средина на летото, нудат сезонска работа за 24.000 денари, импровизација која може да биде и опасна за луѓето.
Владата имаше пари за службени возила за администрацијата, за советници со плати од 100.000 денари, ама за противпожарните бригади не. Оваа неспособност има цена што сите ја плаќаме, горат шуми, се уништува имот и загрозени се животи. Го прашуваме Мицкоски, кој е крив оваа година за пожарите, повторно ли е СДСМ?“, прашува опозициската партија преку своето соопштение.
Македонија
Пожар во кругот на Клиничката болница „Др. Трифун Пановски“ – Битола, не е загрозена безбедноста на пациентите и вработените

Министерството за здравство информира дека синоќа во кругот на Клиничката болница „Др. Трифун Пановски“ – Битола, избил пожар како резултат на запалена сува трева.
Како што извести Министерството, пожарот веднаш бил пријавен во Центарот за управување со кризи и противпожарната станица, по што надлежните служби навремено интервенирале и бил локализиран во најкраток можен рок.
„Од страна на болницата беа преземени сите неопходни мерки за заштита и следење на ситуацијата. Нема никаква материјална штета врз болничките објекти, ниту е загрозена безбедноста на пациентите и вработените. Работата на болницата се одвива непречено.
Интервенцијата траеше кратко и беше целосно завршена без потреба од евакуација или дополнителни безбедносни мерки“, соопшти МЗ.
Министерството за здравство континуирано ја следи состојбата во сите јавни здравствени установи.