МВР образложи зошто поднело кривична пријава и за експремиерот Димитар Ковачевски, како и за генералниот секкретар во Владата, Методија Димовски, кои, засега не се опфатени во истрагата за криминалите во Државна Лотарија.

Според информацијата од Министерството доставена до медиумите, Ковачевски како премиер, по претходен договор со Бајрами, на 8 март 2022 година, ја злоупотребил службената положба, ја ставил на дневен ред и усвоил постапка за основање на трговското друштво „Нова Државна Видео Лотарија – НОВО ВЛТ ДОО Скопје“, иако знаел дека материјалите не се разгледуваат на седница согласно Деловодникот за работа на Владата (член 68 став 1). Со ова, како што велат од МВР, Ковачевски, овозможил друштвото да стекне право да приредува игри на среќа без лиценца и на одговорните лица им овозможил противправна имотна корист од 8.598.000 денари.

За Димовски, пак, од МВР велат дека во својство на генерален секретар на Владата и покрај тоа што знаел дека материјалите кои се доставени до Владата не се разгледуваат на Седница на Владата ја предложил како точка на дневен ред за разгледување на информацијата во врска со постапката на основање на трите нови трговски друштва за приредување на интернет игри на среќа, и на тој начин со пречекорување на границите на своите службени овластувања им овозможил на одговорните лица на правни лица од Скопје и Битола да се стекнат со значителна противправна имотна корист во вкупен износ од 4.852.212 денари, а новоформираните правни субјекти од Битола и Скопје да остварат противправна имотна корист во големи размери во вкупен износ од 55.029.956 денари.

Обвинителството претходно оопшти дека Ковачевски и Димовски се пријавени за друг временски период и за други дејства. Кривичната пријава што ја поднесе МВР за експремиерот Димитар Ковачевски и за поранешниот генерален секретар на Владата, Методија Димовски, не е отфрлена, а Обвинителството ги проверува наводите.

„ Напоменуваме двете лица што ги наведувате (Ковачевски и Димовски) се пријавени за сосема друг временски период и за други дејства, а на седницата на 6 јуни 2023 година, кога точка на дневен ред била наведената одлука, претседавал единствено сега осомничениот“, велат од Обвинителството.

Обвинителството вчера побара притвор за директорот на „Државната лотарија“, Прпарим Бајрами, и за поранешниот вицепремиер Артан Груби поради проневера во „Државната лотарија“. Според информациите, барањето е со цел притворската мерка да почне да се спроведува веднаш по пронаоѓањето на двајцата осомничени, кои во моментот не се во државата, како и нивно приведување. Судот денес одлучува за притворите.

Од Обвинителството информираа дека Бајрами доставил информација за потребата од преземање активности за самостојно приредување електронски игри на среќа, при што било предложено да се спроведе постапка за набавка на ВЛТ-терминали и нивно имплементирање. Предлогот бил даден иако осомничениот знаел дека набавката е беспредметна и непотребна бидејќи АД „Државна лотарија“, во согласност со Законот за игри на среќа, нема право самостојно да приредува електронски игри на среќа на територијата на државата.

Вицепремиерот Груби иако исто така знаел дека барањето за конкретната јавна набавка е противзаконско и дека „Државната лотарија“ нема право самостојно да приредува електронски игри на среќа на територијата на државава, на 6 јуни 2023 година како вицепремиер претседавал со седница на владата во својство ччен на собранието на акционерското друштво и покрај тоа што бил свесен дека акционерското собрание нема надлежност да одлучува за конкретната зделка.

Другите четворица осомничени биле претседател и членови на комисија за два одделни јавни повика за кои постои сомнение дека ги злоупотребиле посебните овластувања и должностите и ги спровеле јавните повици иако знаеле дека таква постапка во конкретните случаи не смее да биде спроведена бидејќи не биле исполнети законските услови.