Македонија
Мештаните од Слупчане се обиделе самите да си ја вратат струјата, па ги оставија и соседните села без напојување

Во селата Оризаре, Ваксинце и Лојане денес нема струја поради дефектот што го предизвикале жители на Слупчане.
Од ЕВН информираа дека синоќа лица од Слупчане насилно и незаконски отвориле енергетски објект во сопственост на „Електродистрибуција“ во обид самите да го вратат напојувањето со струја во селото, по што предизвикале голем дефект оставајќи ги соседните села без електрична енергија.
Слупчане вчера остана без струја поради дефект во среднонапонската мрежа како резултат на континуирани кражби од страна на жителите на кумановското село. Мештаните синоќа со запалени гуми на патот го попречуваа влезот на екипите на ЕВН да влезат во селото.
Од ЕВН изјавија дека проблемот не е нов, односно постојано се соочуваат со проблеми и закани од мештаните и не постојат услови за нормално извршување на законските обврски за одржување и управување на системот за дистрибуција.
„Поради континуирано неовластено користење електрична енергија од страна на мештаните на село Слупчане се оптоварува мрежата, при што се предизвикуваат големи дефекти. Екипите на ‘Електродистрибуција’ постојано се соочуваат со попречување во извршување на законските обврски, се соочуваат со закани и им се забранува пристап до енергетските објекти.
Со ова во целост се оневозможуваат нормалното функционирање и работење. Сè додека нема цврсти гаранции и услови за работа и нормално функционирање поради наведените причини, нема да постои можност за санација на дефектот“, наведуваат од „Електродистрибуција“.
И во ова село кражбите на електрична енергија се околу 80 отсто, исто како што беше случајот во скопското Арачиново. Наплатата е само 20 отсто.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Дел од Карпош денеска без вода

Регионалниот центар за управување со кризи на Град Скопје, по добиеното известување од ЈП Водовод и канализација, информира дека, денеска поради санирање појавен дефект на водоводна мрежа со пречник Ф-1 цол на ул. Копенхагенска, крстосница со ул. Стокхолмска во населба Тафталиџе, прекинато водоснабдување ќе имаат корисниците од улиците: Копенхагенска, Стокхолмска, Софиска, Његошева, Гаврил Лесновски и Петар Драганов во општина Карпош.
Водоснабдувањето ќе биде прекинато од 11:30 часот до завршување на интервенцијата.
Македонија
Аеродром, Сопиште и Зелениково денеска без струја

Регионалниот центар за управување со кризи на Град Скопје, по добиеното известување од ЕВН, информира дека поради планирани зафати во електро дистрибутивната мрежа, денеска, без напојување со електрична енергија ќе останат:
· од 08:00 до 15:00 часот, корисниците од дел од с. Долно Лисиче, општина Аеродром;
· во истиот термин од 08:00 до 15:00 часот, корисниците од објектите во околината на зградата на Алкалоид на ул. 3 -та Македонска Бригада., општина Аеродром;
· од 09:00 до 12:00 часот, корисниците од дел од с. Горно Соње, поточно улиците со бр. 10 и бр. 12, општина Сопиште;
· од 09:00 до 16:00 часот, корисниците од селата: Дејковец и Добрино, општина Зелениково.
Македонија
Променливо облачно со повремени врнежи од дожд и со ретка појава на грмежи

Времето денеска ќе биде променливо облачно со повремени локални врнежи од дожд и со ретка појава на грмежи. Ќе дува слаб до умерен северен ветер Минималната температура ќе биде во интервал од 4 до 10, а максималната ќе достигне од 11 до 18 степени.
Во Скопје, променливо облачно со повремен дожд и со услови за ретки грмежи. Ќе дува слаб до умерен ветер од северен правец. Минималната температура ќе се спушти до 9, а максималната ќе достигне до 15 степени.
Времето во наредните денови
Продолжува периодот на променливо облачно време со повремени врнежи од дожд. Денеска и во четврток ќе има изолирана појава, а од петок на повеќе места ќе биде нестабилно со пороен дожд и грмежи. Од недела температурите ќе бидат во опаѓање.