Македонија
Меџити: Досега направени три трансплантации на црн дроб, Европската комисија нотира напредок во овој сегмент

Министерството за здравство информира дека пред една година првпат се изведе трансплантација на црн дроб во Северна Македонија, со што македонското јавно здравство се вброи меѓу врвните здравствени системи што изведуваат вакви процедури.
За овој краток период се направени три трансплантации кај тројца пациенти и сите се во добра здравствена состојба.
Министерот за здравство, Фатмир Меџити, се заблагодарува до сите што се вклучени во процесот.
„Се гордеам што Европската комисија оцени дека имаме напредок во овој сегмент. Дарувањето органи е најблагородниот чин и процес во кој се гледа човечката добрина. Упатувам благодарност до сите што се вклучени во процесот, верувам дека заеднички можеме да направиме сè!“, вели Меџити.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
До недела многу топло и нестабилно, со услови за локално невреме

Под влијание на влажна и топла воздушна маса од југ до недела (8.6) времето ќе биде многу топло.
Денес и утре, во попладневните часови ќе има развој на нестабилна облачност со локален пороен дожд и грмежи. Наместа процесите ќе бидат поинтензивни во форма на невреме со засилен ветер и појава на град.
Изолирана појава на нестабилност со пороен дожд и грмежи ќе има и в сабота.
Од понеделник времето ќе биде претежно стабилно, а дневната температура ќе биде во опаѓање.
Во Скопје, денес попладне, во делови од котлината ќе биде нестабилно со пороен дожд, грмежи, засилен ветер и услови за изолирано невреме со појава на град. Утре, во делови од котлината ќе има услови за пороен дожд, грмежи и засилен ветер.
Надлежните со препорака: во случај на појава на електрични празнења се препорачува поголема внимателност, да не се престојува на отворен простор и под осамени дрвја.
Македонија
Ѓорѓиевски на одбележувањето на Светскиот ден на животната средина: „Заедно создаваме одржлива иднина“

Градоначалникот на oпштина Кисела Вода и претседател на ЗЕЛС, Орце Ѓорѓиевски, на покана на првиот вицепремиер Изет Меџити, денес присуствуваше на настан по повод Светскиот ден на животната средина. Настанот се одржа под мотото „Заедно создаваме одржлива иднина“ и опфати низа активности насочени кон унапредување на одржливите политики и практики во заштитата на животната средина.
„Денес, на покана на првиот вицепремиер Изет Меџити, присуствував на настанот на одбележувањето на Светскиот ден на животната средина, под наслов ‘Заедно создаваме одржлива иднина’. Програмата вклучуваше конференција со две панел-дискусии кои беа фокусирани на одржливото управување со заштитени подрачја, одржливото управување со отпадот и примената на современите зелени технологии.
Имавме чест да видиме и неколку презентации од учениците од Скопје и Македонија, кои се дел на ГЛОБЕ програмата со мрежата за искуствено учење, со акцент на значењето на искуственото еколошко образование во оформување на свесни и одговорни генерации поддржано од УНИЦЕФ и Министерството за животна средина и просторно планирање.
Нека заштитата и унапредувањето на животната средина и понатаму останат да бидат врвен приоритет, кој ќе резултира со нови парковски површини на места каде што постојат депонии, со акции за чистење и за пошумување, со едукација за правилна селекција и одложување на отпадот и бројни иницијативи за подигнување на еколошката свест кај граѓаните. Заедно можеме“, истакна претседателот на ЗЕЛС и градоначалник на Општина Кисела Вода, Орце Ѓорѓиевски.
Македонија
МОН со поддршка од партнерски организации ја почна изработката на новата стратегија за образование 2026 – 2032

Повеќе институции, образовни установи, претставници на граѓанскиот сектор и меѓународни партнери на Министерството за образование и наука започнаа со изработка на нова Стратегија за образование која ќе има важност од 2026 до 2032 година. На првата работна средба, министерката за образование и наука проф. д-р Весна Јаневска рече дека документот треба да обезбеди континуитет на тоа што било добро досега, да го модифицира тоа што не ги исполнило во целост очекувањата и да овозможи интегрирање на новите глобални образовни трендови и стандарди кај нас.
„Стратегијата ќе се фокусира на обезбедување еднаков пристап до квалитетно образование за сите, на инклузивноста, грижа за добро ментално и физичко здравје на младите, усогласеност на образовните политики со пазарот на труд, дигитализација, дигитална и медиумска писменост и примена на нови технологии“, рече Јаневска, потенцирајќи дека Македонија мора забрзано да спроведе покрупни промени, имајќи предвид дека и Европската комисија имаше забелешки за бавниот развој на образованието во изминатите неколку години.
Министерката изрази благодарност до сите партнери, кои како што рече, имаат своја стручност и искуство во градење стратегии, креирање политики и нивна имплементација. Особено се заблагодари на четирите клучни поддржувачи – УНИЦЕФ, УНДП, Светска банка и ГИЗ, со кои потпиша официјално писмо за поддршка.
„Само со издржан стратешки документ, базиран на точни анализи, податоци и факти, можеме да изградиме поквалитетен национален образовен систем. А јас, како ресорен министер уверувам дека Владата ќе биде на висина на задачата и ќе обезбеди доволно ресурси за сé што треба да ги поместиме работите напред“, додаде Јаневска.