Македонија
Меџити: Направивме системски промени за европско здравство

Министерот за здравство, Фатмир Меџити, денеска учествуваше на панелот „Европски можности преку модернизација на социјални, образовни и здравствени политики“ што се одржува во рамки на годишната конференција „Година на европски можности“ во организација на Владата на Република Северна Македонија.
Во своето излагање, тој истакна дека изминатата година се направени суштински темелни промени во здравството.
„За првпат го набавивме лекот Трикафта. Она што никој не веруваше дека ќе се случи е реалност. Лекот од следната година ќе се набавува редовно од Фондот за здравство. Деновиве ги гледаме позитивните приказни од пациентите кои сами го споделуваат задоволството на социјалните мрежи. Воведовме 6 нови лека за пациентите со ретки болести. Се грижиме за сите пациенти подеднакво, лицата со ретки болести не смее да се чувствуваат отфрлено и заборавено. Една работа на која сум особено горд е тоа што обезбедивме 650 сензори за безболно мерење на шеќер во крвта. Дечињата со дијабетес повеќе нема да мора да се боцкаат, нивниот живот ќе биде поубав и полесен. Замислете какво олеснување е тоа за нив но и за нивните родители“, рече Меџити.
Меџити, информираше дека направено е двојно зголемување на буџетот за набавка на опрема од 2,6 на 5 милиони евра, со што набавена е медицинска опрема во повеќе од 15 здравствени установи.
„Ги подобривме условите во 13 јавно-здравствени установи. За првпат Сарај доби поликлиника која ќе опслужува над 45 илјади жители во овој дел од градот. Исто така, за првпат овозможивме и хеликоптерски транспорт за најитните случаи. Сега ќе може брзо да се реагира кога некој пациент ќе биде во животна опасност. Веќе имавме и пациент кој беше пренесен на овој начин на транспорт се покажа како многу ефикасно при незгоди на непристапни места“, потенцираше Меџити.
Во делот на инвестирање во здравствените работници, Меџити посочи дека лани два пати се покачени платите.
„Она што беше би рекол главна вест, тоа е вработување на неопределено на над 1100 лица медицински и немедицински персонал. Со години оние кои беа несигурни на своето работно место со договот на дело сега ќе може да аплицираат за трајно вработување. Со ова ги задржуваме вработените здравствени работници дома и ова е од суштинско значење за стабилноста на системот“, изјави Меџити.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.