Македонија
Милевски: Со ваучерска програма ќе се зголемува конкурентноста на планските региони

Меморандум за меѓусебна соработка потпишаа Министерството за локална самоуправа и Фондот за иновации и техонолошки развој, што ќе овозможи реализација на ваучерската програма за градење на капацитетите на претпријатијата во Република Северна Македонија. Соработката ќе се оствари преку регионалните бизнис-центри во рамките на центрите за развој на планските региони.
„Денеска, потпишавме меморандум со цел заеднички да им помогнеме на малите и на средните претпријатија полесно да пристапат до буџетските средства кои се наменети за нивна поддршка и развој. Заедно со швајцарската влада преку проектот ‘Одржлив и инклузивен рамномерен регионален развој’, Министерството за локална самоуправа обезбедува 3 милиони денари или 51 отсто, а Фондот за иновации другите 49 проценти од средствата за финансиска поддршка наменета исклучиво за ваучерската програма за градење на капацитетите на претпријатијата во земјата“, изјави министерот за локална самоуправа, Горан Милевски.
Според Милевски, целта на ваквата меѓусебна соработка е преку ваучерската програма да се придонесе за зголемување на конкурентноста на планските региони со поддршка на малите и средни претпријатија и на претприемаштвото. Целосна информираност на потенцијалните корисници од сите плански региони за можностите за условите и начините за користење на средства од Програмата, како и обука на администрацијата, која треба да ги обезбеди услугите.
„Поддршката ќе се реализира преку бизнис-центрите што функционираат во рамките на центрите за развој во сите осум плански региони. Бизнис-центрите ќе функционираат како регионални канцеларии, кои ќе ги информираат потенцијалните корисници за сите јавни повици на ФИТР за поддршка на приватниот сектор, потоа ќе обезбедуваат техничка поддршка на потенцијалните апликанти од соодветниот регион, за сите активни повици за секој поединечен инструмент, а ќе даваат оперативна и финансиска поддршка на ваучерската програма за градење на капацитетите на претпријатијата во земјата. Очекувам дека соработката ќе продолжи и во наредниот период врз основа на искуството што ќе го изградиме и врз основа на задоволството на клиентите, конкретно на бизнис-секторот. Со поддршка на малите и средните претпријатија го поддржуваме развојот на регионите, зголемувањето на бројот на нови работни места, подобар стандард за живеење во сите делови од државата“, појасни тој.
„ФИТР останува посветен партнер на македонските компании. На овој начин продолжуваме заедно со бизнис-секторот да генерираме нови инвестициски циклуси и забрзан економски раст базиран на иновации и технолошки развој, како и зголемен број вработувања. Целта на денешната соработка е да ги приближиме инструментите на Фондот и можностите за финансиска поддршка, кои државата ги нуди на домашните компании во целата земја. Со ваков пристап на децентрализирана поддршка и информации сакаме да ги поттикнеме компаниите во сите плански региони, а не само од скопскиот, да аплицираат во Фондот и нивните бизнис-идеи заедно да ги претвориме во успешни проекти“, потенцира Коста Петров, директорот на Фондот за иновации и технолошки развој.
Според амбасадорката на Швајцарија во Скопје, Сибил Зутер, развојот на претприемаштвото почнува локално, но сепак во голема мера се потпира на поврзување на претприемачите со вистинските ресурси што им се потребни за да ги развиваат своите деловни активности.
„Користејќи ги 8-те бизнис-центри во рамките на центрите за развој на планските региони како неформални сателитски канцеларии на Фондот за иновации и технолошки развој, ќе обезбедиме повеќе мали и средни бизниси во целата земја, особено во заостанатите региони, да добијат вреден пристап до информации за можностите што им се достапни. Затоа, веруваме во важноста на градењето, поврзувањето, зајакнувањето и растењето на екосистемот на претприемаштво во Северна Македонија и ќе продолжиме да работиме заедно за да постигнеме одржлив и инклузивен економски раст преку создавање работни места и подобрување на деловното опкружување“, рече таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Работник почина на градилиште на автопатот кај Гостивар

Шеесетгодишен работник вчера го загубил животот на работно место при изведба на градежни работи на автопат во изградба, во атарот на селата Долно Ѓоновица и Симница, информираше полицијата.
Станува збор за Д.П. (60) од селото Врашчиште, кој бил вработен во приватна градежна фирма ангажирана на трасата од автопатот. Засега нема информации за причините кои довеле до неговата смрт.
Смртта на работникот ја констатирал лекар од приватна здравствена установа. По наредба на јавен обвинител, телото на починатиот било предадено на обдукција со цел да се утврдат точните околности.
Полицијата информира дека по случајот ќе следи соодветна истрага.
Македонија
Коњановски потрошил милиони без ниту еден капитален проект, рече Куновски од СДСМ

Кандидатот за градоначалник на Битола од редовите на СДСМ, Методија Куновски, на денешната прес-конференција изјави дека доаѓа крајот на, како што ја нарече, „четиригодишната ера на разочарувања и промашувања на актуелниот градоначалник Тони Коњановски“.
„Битола заслужува градоначалник кој нема да работи за тебе, за мене, за мала група луѓе или за партијата, туку за сите граѓани. Човекот мора да биде пред сè“, рече Куновски.
Тој го обвини Коњановски за недомаќинско и хаотично работење, со бројни раскопани и нефункционални улици, долгови на јавните претпријатија и нереализирани капитални проекти.
„Јавните претпријатија се во долг од над 3 милиони евра, а ниту една нова машина не е набавена. Укинати се бесплатните 15 минути паркинг, а нови паркинг-места нема. Наместо спортски комплекс, нови кружни текови или училишта, добивме импровизиран кружен тек кај Стрелиште и сообраќаен хаос“, нагласи Куновски.
Кандидатот од СДСМ истакна и дека сметките на училиштата должат скоро 50 милиони денари, а некои објекти се затворени поради прокиснување на крововите.
„Жителите на повисоките делови од Битола секој втор ден немаат вода, а цената за водоснабдување е зголемена. Градинки нема за Бистрица и околните села, а градот е преполн со бездомни кучиња“, додаде тој.
Куновски го обвини Коњановски и за расфрлање со јавни пари.
„Немаше средства за ранливите категории семејства, а потроши повеќе од 4 милиони денари за кафеани и 10 милиони денари за нови возила од фирма блиска на министерот за надворешни работи“, рече Куновски.
Во своето обраќање тој порача дека битолчани ќе стават крај на ваквото владеење.
„После четири години застој и скандали, Битола ќе избере одговорна, отчетна и транспарентна локална власт“, заклучи Куновски.
Скопје
Османи: Чаир ќе стане центар на технологија, култура и младински идеи

Кандидатот за градоначалник на Чаир, Бујар Османи, на средба со младите од општината ја претстави својата визија за „Новиот Чаир“, посветена на урбана преродба и создавање општина на иднината.
„Не можете да дизајнирате визија за Чаир без да ги вклучите младите кои сочинуваат речиси половина од населението. Тие се нашата најголема сила и највреден капитал“, истакна Османи.
Во рамки на својата програма, тој најави изградба на мултифункционален центар на плоштадот „Скендербег“, кој ќе вклучува дигитална и иновациска лабораторија, современа библиотека и културен центар за младинските уметнички и музички групи.
Според него, овој комплекс ќе биде „срцето на визијата за Новиот Чаир и симбол на урбаната преродба на општината“.
Програмата предвидува и општински стипендии за најдобрите студенти, создавање Фонд за иновации, како и Младински совет на Чаир, кој ќе управува со 5% од општинскиот буџет. Преку проектот „Таленти на Чаир“ најдобрите студенти ќе добијат можност за директно вработување во општинската администрација.
Османи вети и подобрување на јавните простори преку реновирање на парковите, воведување бесплатен интернет во јавните зони и организирање бесплатни обуки за дигитални вештини, програмирање и користење вештачка интелигенција.
„Чаир сакаме да го претвориме во центар на технологијата. Ако половина од жителите се млади, тогаш мораме да го искористиме овој капитал и да изградиме општина на иднината“, порача Османи.