Македонија
Министерката Сореиде: Очекувам да седам покрај Никола во НАТО

Благодарност за ратификацијата на пристапниот протокол за нашето членство во НАТО упати министерот за надворешни работи, Никола Димитров, до министерката за надворешни работи на Кралството Норвешка, Ине Ериксен Сореиде, која денеска престојува во работна посета на земјава.
„Норвешка е една од најцврстите, најсилни, најпрогресивни и најпросперитетни европски демократии. Токму затоа потпишавме заедничка изјава за партнерство и соработка во Осло за време на мојата посета таму. Изразив благодарност за ратификацијата на пристапниот протокол за нашето НАТО-членство. Разговаравме за целиот регион, за нашите билатерални односи. Благодарни сме за поддршката на Норвешка во нашата реформска агенда. Благодарни сме за интересот и присуството на Норвешка не само кај нас туку и во целиот регион и тоа високо го цениме“, рече Димитров.
Министерката Сореиде ја реафирмира поддршката на Норвешка за реализација на македонските стратешки приоритети преку постигнување на неопходните стандарди во насока на интеграција на Република Северна Македонија во НАТО и Европската Унија.
„Северна Македонија прави одличен прогрес и ве поддржуваме во вашите напори и ќе продолжиме да го правиме тоа. Исто така, очекувам да седам покрај Никола во НАТО. Ние сме географски малку раздвоени, но ќе бидеме соседи на масата во НАТО. Тој ќе го заземе местото помеѓу Холандија и мене. И се надевам дека тоа ќе претставува уште посилна соработка во иднина. Ќе продолжиме да соработуваме со вашата Влада за процесот на подготовка за НАТО и ЕУ, како и со цврстите билатерални односи“, изјави министерката.
Двајцата министри разговараа и за можностите за натамошно интензивирање на соработката во повеќе сфери од заемен интерес, особено во делот на економијата и инвестициите, како и за соработката во рамките на меѓународните организации. Воедно, стана збор и за регионалната соработка, а беа разменети мислења и за актуелни прашања на меѓународен план.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Арсовска: „Храбриот“ Меџити наместо да дојде во Чаир заедно со неговата „принцеза на дивоградбите“, промовира туѓи проекти

Изет Меџити наместо да дојде во Чаир, таму каде што е најповикан заедно со неговата „принцеза на дивоградбите“, тој се исмева со граѓаните додека промовира туѓи проекти, вели градоначалничката на Град Скопје, Данела Арсовска, по промоцијата на електричните автомобили.
Арсовска вели дека проектот за споделување на автомобили е проект започнат во соработка со приватна компанија и претпријатијата на градот Скопје.
„’Храбриот’ Меџити никаде го нема да се соочи на терен со мене за дивоградбите кои тој и Висар Ганиу со години спротивно на закон ги граделе и легализирале во Чаир, со фалсификување на документи и одобренија за тие дивоградби“, вели Арсовска.
Срам за Македонија и оваа влада, додава таа, се Изет Меџити и Висар Ганиу.
„Замислете, човек кој стои позади стотици дивоградби, ставил во ризик илјадници граѓани, фалсификувал документи со својот измеќар, сега е вицепремиер и промовира туѓи проекти пред медиумите и граѓаните“, вели Арсовска.
Македонија
ВМРО-ДПМНЕ: Заев се сончаше по плажите додека беснееја пожари

Заев се сончаше по плажите додека беснееја пожари, Владата предводена од ВМРО-ДПМНЕ има конкретен план за справување со пожари во претстојната сезона, реагира ВМРО-ДПМНЕ на обвинувањата од СДСМ.
„Во време на СДС, Заев се сончаше по плажите и не се врати во државата додека во Македонија беснееја пожари. Седум години државата беше оставена без пилоти и со стари возила и технички средства. 7 години двата авиони за гаснење на пожари беа вон функција и без пилоти. 7 години СДС не инвестираше во возила за гаснење на пожари и во технички средства. Владата предводена од ВМРО-ДПМНЕ работи на сериозна и целосна трансформација на целиот систем за управување со кризи“, пишува во реакцијата.
Од таму велат дека „Ер тракторите“ моментално се на сервисирање и во краток рок се очекува да има три „ер трактори“ во пресрет на сезоната на пожари.
„Владата предводена од ВМРО-ДПМНЕ работи посветено и има план за полесно справување во претстојната сезона на пожари“, велат од партијата.
Македонија
Јавно објавен предлог – законот за ратификација на Договорот со Обединетото Кралство

Предлог законот за ратификација на Договорот со Обединетото Кралство пристигна во Собранието, сѐ ќе биде јавно и транспарентно, објави пратеникот Никола Мицевски од ВМРО-ДПМНЕ.
„Само што пристигна во Собранието – Предлог на законот за ратификација на Договорот меѓу Владата на Република Македонија и Владата на Обединетото Кралство на Велика Британија и Северна Ирска во врска со партнерството за реализација на инфраструктурните проекти. Ништо нема да биде скриено до јавноста и секој детал ќе биде јавно објавен и транспарентен. Ова е историски договор. Ова е историска работа за нашата држава“, вели Мицевски.
Заедно со граѓаните, додаде тој, се обврзавме на обнова на Македонија и тоа го правиме секој ден.
„Тие се нашиот партнер. Железница, студентски дом, болници, хидроцентрали и многу нови проекти. После стратешкиот договор со Обединетите Американски Држави – ова е уште еден огромен успех за Република Македонија“, рече Мицевски.