Македонија
Министерство за здравство: Воведена нова иновативна терапија за лицата со хемофилија

Министерството за здравство информира дека од почетокот на оваа година за лицата со хемофилија е воведена иновативна биолошка терапија, која се администрира поткожно, еднаш неделно во домашни услови од самите лица, со што болните и чести венепункции стануваат минато за овие лица. Со оваа терапија (emicuzumab), дополнително и повеќекратно се намалува честотата од крварења. Со тоа, квалитетот на живот се крева на ниво на кое лицата со хемофилија функционираат комплетно независно, без непотребни отсуства од училиште или од работа.
До неодамна профилактичната терапија се спроведуваше само кај деца до 18 години со честа интравенска администрација на концентрати на факторот VIII. Министерството за здравство, во соработка со „Националниот комитет за хемофилија и останати вродени болести на системот за коагулација“, кој ги интегрира сите институции вклучени во здравствената заштита на лицата со хемофилија, како и во соработка со претставниците од граѓанските здруженија, постигнаа значајни резултати во изминатите две години за унапредување на севкупната грижа за лицата со хемофилија и останатите вродени заболувања на системот за коагулација. Главниот фокус беше насочен кон подобрување на снабдувањето со фактори на коагулација, како и да се подигне грижата и квалитетот на живот на овие лица преку спроведување профилактичка терапија, не само кај децата, туку и кај возрасните лица со тешка форма на хемофилија А. Профилактичната терапија е значајна бидејќи на тој начин се избегнуваат трајните оштетувања на зглобовите, предзивикани од честите крварења, кои за жал, понекогаш водат кон траен инвалидитет. Десет пациенти од нашата земја веќе ја користат оваа терапија.
-Терапијата се воведе во најкритичниот период за здравството, а Клиниката за хематологија и Институтот за трансфузиона медицина-Центар за хемофилија, во соработка со Министерството за здравство, организираа мобилен тим, кој ги посети пациентите низ земјава и ги едуцираше како сами да ја администрираат терапијата. Со оваа терапија значително се подобрува квалитетот на живот на лицата со хемофилија, па така ако досега пациентите венски примаа терапија трипати неделно, и крвареа од зголбови по пет-шест пати, сега лекот го примаат поткожно, еднаш во неделата, без дополнителен ризикот од крварења. Со оваа терапија значително се подобрува квалитетот на живот и функционирањето на овие лица, кои можат да бидат активни, да одат на работа и да придонесуваат во општеството, информираат од Клиниката за хематологија и од Институтот за трансфузиона медицина-Центар за хемофилија.
Во регионот, веднаш по земјите членки на Европската унија: Словенија, Хрватска и Бугарија, Северна Македонија е прва земја, која овој лек го направи достапен за лицата со хемофилија.
Согласно акциониот план за спроведување на „Националната стратегија за хемофилија и останати вродени нарушувања на системот за коагулација за 2019-2029 година“, освен подобрување на третманот на лицата со хемофилија се предвидува и имплементација на сигурен и ефективен третман на хемофилија во нашата држава, како и унапредување на евиденцијата на лицата со вродени нарушувања на системот на коагулација, преку имплементација на национален регистар и редовно ажурирање на сите релевантни медицински информации и соодветни трошоци, како и активности за превенција, рана детекција, третман на компликации и на тој начин кон подобрување на квалитетот на живот на лицата со хемофилија и останати вродени нарушувања на системот на коагулација за да се обезбеди интегрирана нега и навремено справување со можните компликации кај овие пациенти.
Во изминатите две години, Министерството за здравство воведе и други нови лекови и терапии за пациентите со ретки болести, меѓу кои: лек за спинална мускулна атрофија, за болеста фамилијарна амилоидна полиневропатија, апластична анемија, ампуларна и таблетарна терапија за пациентите со Гоше, како и лек за терапија за пациентите со идиопатска белодробна фиброза. Исто така, воспоставен е електронски регистар за пациентите со ретки болести, кој ги содржи сите основни информации за пациентите заболени од ретки болести, нивната дијагноза, потребната терапија, соодветната клиника на која се лекуваат, како и лекарот кој ги лекува. Со Националната стратегија за ретки болести, изработена со Фондот за здравствено осигурување, МАЛМЕД, Министерството за труд и социјална политика, граѓанските организации и со пациентите со ретки болести е предвидена имплементација на системски решенија за интегрирана нега и навремено справување со можните компликации кај пациентите со ретки болести.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски до Ахмети: Игрите на етничка карта се научени, ние читаме една нова книга за Македонија која е развиена, во која младите се враќаат

СДСМ на овие избори настапуваат со слоганот „се бориме за нашиот дом“. И сè е тоа фино, ама забораваат дека пред година и три месеци тие управуваа со домот. И она што го затекнавме не беа нарушени, туку уништени темели. Кога ќе се сетам дека првите одлуки кои ги донесов како премиер беа да враќаме плати кои тие не ги исплатиле и дека делевме субвенции кои тие со години не ги исплаќаа. Секој ден во Владата ми доаѓаше по некој кој сведочеше за рушвет, тоа трае и денес, рече претседателот на ВМРО-ДПМНЕ Христијан Мицкоски на вечерашниот митинг во Битола.
„Се сеќавате дека 500 илјади наши сограѓани, поточно секој трет човек во државата живееше со 150 денари на ден. Дека имаше двоцифрена инфлација, дека го руинираа животниот стандард на чие кревање напорно и постепено работиме. А ДУИ беа господарите кои одлучуваа за целата економија, за тендерите, купуваа трговски центри, бензински пумпи, скапи деловни простории и што уште не. Се сеќавате ли на играњето фудбалчиња во канцеларии“, кажа Мицкоски.
Мицкоски укажа дека тоа време на народот не му носи ништо добро.
„Го слушам Филипче како се потсмева на тоа што на пензионерите им се зголемуваат пензиите за 1000 денари, а намерно пропушта да каже дека за година и пол пензиите се зголемуваат за цели 5000 денари, што покажува дека има разлика со времето кога тие наместо да даваат, земаа од пензионерите. Јас и сфаќам дека 5000 денари не се големи пари за Филипче кој е научен на јахти, згради и веселби во Дубаи, но ние го испорачавме тоа што го ветивме“, укажа Мицкоски.
Мицкоски се осврна на однесувањето на Али Ахмети и раководството на ДУИ во текот на оваа локална кампања.
„Што се однесува до Ахмети, тажна е сликата како се присетува и дели некакви историски лекции, додека неговиот народ се иселува поради неговото криминално владеење. Човекот води избори за локални избори, а не пропушта да спомне историска лекција. Но, додека беше во владата не заборави своето семејно портфолио да го зголеми со еден убав трговски центар во центарот на главниот град, неговите соработници да купуваат скапи деловни простории. Но, затоа не кажува ни еден збор што ќе направи да ги задржи Албанците во своите родни места, но него не му е до Албанците, тој само се заканува и игра само на етничка карта. Сакам да му порачам дека овие лекции се научени и се минато, ние читаме една нова книга за Македонија која е развиена, а младите што се селеа поради таквите како него да се вратат во државава“, заклучи Мицкоски.
Македонија
ЗНАМ: На Центар му треба прв човек што ќе воведе ред, ќе создаде урбан развој наместо урбан хаос, ќе го исчисти, ќе го направи безбеден

„На Центар му треба предводник кој ќе биде вистински претставник на граѓаните. Доволно млад и во истовреме доволно енергичен, доволно стручен, а во истовреме доволно посветен татко на општината. На Центар му треба прв човек што ќе воведе ред, ќе создаде урбан развој наместо урбан хаос, ќе го исчисти, ќе го направи безбеден, ќе се бори за секоја негова педа. На Центар му треба вистински центарец. На Центар му треба Мирослав Лабудовиќ“, е пораката што се слушна вечерва во Музејот на современа уметност, на промотивната Конвенција на кандидатот заа градоначалник на општина Центар и советничката листа од Движењето ЗНАМ – За наша Македонија.
Кандидатот за градоначалник, Мирослав Лабудовиќ, претставувајќи ја својата визија и приоритетите за идниот четиригодишен период, пред присутните се обврза дека нема да биде градоначалник што ќе работи само пред избори, туку посветено и одговорно во текот на целиот мандат.
„Во текот на четиригодишниот мандат се обврзувам дека ќе работам посветено, секогаш имајќи ја пред себе главната цел – моите сограѓани, кои мора да имаат приоритет. Тоа значи дека ние ќе бидеме постојано нивен сервис и секојдневно ќе работиме да го подобриме и да го направиме пофункционален нивниот живот. Имаме програма за која сум убеден дека е најквалитетна од сите понудени и со која навистина ќе ги промениме нештата во општината“, порача Лабудовиќ.
Тој најави ревизија на сите спорни урбанистички планови, нови катни и монтажи гаражи во Буњаковец, Капиштец и кај новата Железничка станица, чиста, безбедна и еколошки средена општина, со енергетско-ефикасни фасади. Новитети во образованието и изградба на Центар Хаб – мултифункционален, младински и културно – технолошки центар, поддршка на локалниот бизнис и спортот, и повеќе солидарност и инклузивност. Како еден од приоритетите ја потенцираше целосната транспарентност во работењето.
Пред присутните се обрати и носителот на советничката листа, Мишко Барзов кој изрази уверување дека со системски решенија, јасна визија, посветеност и чесна намера, советниците од ЗНАМ ќе создадат поинаква слика – поуредена, почиста и побезбедна општина.
„Верувам дека советничката листа на ЗНАМ ќе биде вистинскиот замаец на промените. Најискрено верувам дека Мирослав Лабудовиќ, нашиот Миро, е единствената личност која во овој момент, заедно со нас, може да направи вистински промени, системски решенија и нова визија за нашата општина. Наша цел е Центар да биде општина каде што повторно ќе владее ред, каде што маалата ќе ја вратат својата душа и каде што секој граѓанин ќе се чувствува горд што живее токму овде“, нагласи Барзов.
Лидерот на Движењето ЗНАМ – За наша Македонија, Максим Димитриевски истакна дека Лабудовиќ добил едногласна поддршка од партиското членство. Тој рече дека со години доаѓа во Скопје и никогаш главниот град и централната скопска општина не биле повалкани и во поголем хаос отколку што се сега.
„Не смееме да дозволиме да се скрши срцето на Скопје, не смееме да дозволиме Центар да остане во погрешни раце и да продолжи да се распаѓа како скапано јаболко. Време е за голема промена, време е за голема победа, време е за вистински човек кој и знае и сака и може да го воскресне Центар од правта и валканиците. Тој човек е нашиот Миро. Затоа што центарци знаат дека Миро е најдоброто решение за нивната општина. Јас гледам вистинска жар во неговите очи кога говори за Центар, кога дискутираме за проектите и визијата за наредните четири години. Немам ни трошка сомнеж дека тој искрено сака да го направи неговиот и ваш Центар најдобро место за живеење“, потенцираше Димитриевски.
Движењето ЗНАМ – За наша Македонија на овие избори настапува самостојно со советнички листи во 53 општини и во градот Скопје. Кандидати на ЗНАМ за градоначалници во општините Куманово и Центар се Максим Димитиревски и Мирослав Лабудовиќ.
Македонија
Филипче: Економијата е во пад, ништо од балканскиот економски тигар на Мицкоски

Претседателот на Социјалдемократскиот сојуз на Македонија, Венко Филипче, на граѓанската трибина „Се бориме за нашиот дом“, што се одржа во Струга, упати критика за економската политика на ВМРО-ДПМНЕ, која, како што рече, доведе до секојдневни негативни економски показатели.
Филипче посочи дека Владата на ВМРО ДПМНЕ не исполни ниту едно ветување за подобрување на економијата и на животниот стандард на граѓаните.
„Христијан Мицкоски ветуваше дека македонската економија ќе била „балкански тигар“, ветуваше повисоки плати, повисоки пензии, нови вработувања. Што гледаме денес? Платите се топат, сметките за струја, за парно растат. Животот на граѓаните е претворен во секојдневни калкулации што да купат, дали да купат или да платат сметките, односно како да го преживеат месецот“, рече Филипче.
Тој додаде дека инфлацијата и натаму ја јаде куповната моќ, а ветената минимална плата од 500 евра сè уште не е реалност.
„Барањата за минимална плата од 500 евра остануваат неисполнети. Само за Мицкоски платите биле доволно високи. За неговиот пулен Трајко Славески оваа сегашна плата и таа била многу. Регионот веќе оди напред, државите преземаат мерки за да си ги заштитат граѓаните. Албанија најави минимална плата од 520 евра, ние останавме на 400 евра“, рече Филипче.
Посочи дека секојдневно економските параметри поради лошите политики на власта се негативни. „Странските инвестиции се преполовени, статистиката регистрира пад на индустриското производство, за 2,6% е намален бројот на вработени во индустријата. Сето ова, како што кажа Филипче е доказ дека ВМРО ДПМНЕ ја доведе економијата до колапс, што е далеку од нивните ветувања. Со ВМРО-ДПМНЕ и на локално и на централно ниво, државата нема иднина, порача претседателот на СДСМ, Венко Филипче.