Македонија
Министерството за правда: Законот за Јавното обвинителство е без скриена амнестија

Законот за Јавното обвинителство е еден од клучните закони преку кој ќе се цени спремноста на нашата држава да создаде правна основа за сериозна борба против криминалот и корупцијата, тврди Миистерството за правда.
Според нив, донесувањето на овој закон ќе биде еден од најважните критериуми за донесување одлука за почеток на преговорите со ЕУ. Донесувањето на овој закон е дел од Стратегијата за реформа на правосудниот сектор 2017 – 2022 година, во која се дадени рамките и основите на реформата во оваа област. Заради исполнување на обврските од Стратегијата, Министерството за правда во април 2018 година отвори процес на подготовка на Законот за Јавното обвинителство. Работната група составена од јавни обвинители, судии, домашни и странски експерти изработи законски текст кој на 4 декември 2018 година беше објавен на Единствениот национален електронски регистар на прописи (ЕНЕР). Паралелно со него беше објавен и посебен Закон за СЈО, кој ги отсликуваше ставовите на СЈО.
„Поради транспарентност на процесот, двата закона беа објавени и се очекуваа коментари за нив. Беа организирани и работилници на кои се дискутираа одредени решенија содржани во двата законски текста. Двата текста беа дебатирани и на Советот за следење на имплементацијата на Стратегијата за реформи на правосудниот сектор со цел да се слушнат мислењата за решенијата содржани во нив. Во целиот процес, сите, вклучувајќи ги и невладините организации, можеа да дадат сопствени ставови, коментари и предлози за подобрување на законскиот текст. Изготвените законски решенија беа испратени и до надлежните институции, кои исто така се произнесуваа по нив.
Правилата за објава на законските текстови на ЕНЕР беа целосно почитувани од причина што врз основа на коментарите и мислењата што стасаа од сите заинтересирани беа земени предвид при конечното формулирање на законскиот текст“, се вели во соопштението.
Според Министерството, во согласност со правилата, текстот на законот може да се менува и на самата владина седница и не е предвидено секоја измена што се работи во министерствата да биде објавена на ЕНЕР.
„Всушност, тоа е и поентата, врз основа на коментарите на најшироката јавност, на која законот ѝ се прави достапен преку ЕНЕР, да се изработи конечниот текст што ќе биде пуштен во собраниска процедура. Свесни сме дека Законот за Јавното обвинителство допира разновидни, спротивставени интереси и тоа можеше да се види не само во рамките на работната група туку и во коментарите на пошироката јавност, како од експерти, новинари, претставници на невладини организации така и од претставници на политичките партии.
Клучната цел на Министерството за правда е овој закон да создаде одржлив систем со ефикасни гаранции за професионална борба против криминалот и корупцијата, систем што нема да содржи скриена амнестија, ниту можност кој било да ја избегне правдата. Министерството за правда во неколку наврати укажа дека еден од клучните предизвици е разграничувањето на надлежноста меѓу СЈО и Основното јавно обвинителство за гонење организиран криминал и корупција. Решението што е предложено е на линија на предлогот содржан од работната група составена од обвинители, судии, експерти. Во периодот на објава на законот на ЕНЕР од невладините организации не стаса каков било поинаков предлог за измена на овие одредби.
Законското решение усвоено од Владата содржи гаранции за автономијата и функционалноста на СЈО и тоа беше едно од прашањата што се дебатира и од аспект на уставност и целисходност. Ставот на Министерството за правда беше дека гаранции за капацитетно вршење на функцијата од страна на СЈО треба да бидат и се содржани во текстот на законот. Користењето на бомбите е едно од прашањата за кое укажавме дека е посебен предизвик за постигнување согласност од 2/3 од пратениците во Собранието. По опсежни консултации дали исклучувањето на користењето на аудиоматеријалите во постапките може да го наруши процесот на докажување вина во судските постапки, превагна ставот дека нивното користење само како индиции нема да им наштети на постапките што ги води СЈО, а значајно беше да се зачува валидноста на материјалните докази прибрани досега врз основа на аудиоматеријалите.
На крајот, ги повикуваме сите што може да понудат подобри решенија за измени и дополнувања на законот, да ги испратат до Министерството за правда во што побргу со цел да може да се интервенира за подобрување на текстот во текот на постапката во Собранието. Би било корисно сите забелешки да бидат придружени со конкретни предлози за подобрување на текстот. Потсетуваме уште еднаш дека услов за отворање преговори со Европската Унија е носењето на Законот за Јавното обвинителство во кој СЈО ќе добие основ за трајно постоење во правниот систем на нашата држава, продолжување на постапките што тоа ги води – закон без скриена амнестија“, соопшти Министерството за правда.
Граѓанските организации – Хелсиншкиот комитет за човекови права, коалицијата „Сите за правично судење“, Институтот за човекови права, Македонското здружение на младите правници, Центарот за правни истражувања и анализи, Институтот за европска политика и Фондацијата „Отворено општество – Македонија“, кои се дел од групата на организации „Блупринт“, фокусирани на следење на правосудните реформи и застапување за нивно спроведување, не се согласуваат со начинот на кој се одвива носењето на измените и дополнувањата на Законот за Јавното обвинителство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
УЈП со повик за исполнување на ДДВ обврските: евидентирана е загрижувачка состојба

Управата за јавни приходи информира дека заклучно со 25 јули 2025 година евидентирана е загрижувачка состојба во однос на исполнувањето на обврските поврзани со данокот на додадена вредност (ДДВ).
„Според последните податоци: не се поднесени ДДВ-пријави од 142 месечни и 2.134 тримесечни обврзници. Пријавен, но неплатен ДДВ-долг е евидентиран кај 1.326 месечни и 7.748 тримесечни обврзници.
Директорката на Управата за јавни приходи, Елена Петрова, со порака: „Непочитувањето на законскиот рок е сериозен прекршок. Сите обврзници кои не поднеле ДДВ-пријава или не го платиле ДДВ-долгот се повикуваат итно да постапат согласно законските прописи. Даночната дисциплина не е избор, туку законска обврска и одговорност на секој граѓанин и компанија, темел за функционална држава.“
Управата за јавни приходи, како што додаваат во информацијата, веќе доставила персонализирани известувања до сите ДДВ-обврзници кои имаат пријавен, а ненаплатен долг за соодветниот даночен период.
„Преку координирано постапување и интензивна комуникација со даночните обврзници и со сметководителите, се спроведува целосен сет активности и мерки — со цел да се избегнат блокади на сметки и дополнителни трошоци за присилна наплата. За секој ден на задоцнување, се пресметува камата во износ од 0,03% од преостанатиот долг. По доставата на опомените, управата ќе пристапи кон присилна наплата кај сите обврзници кои нема да го подмират долгот доброволно. Со цел навремено информирање и исполнување на обврските, како и обезбедување солидна даночна историја, УЈП останува во постојана комуникација со сите релевантни страни“.
Македонија
Владата донесе одлука за промена на таблиците на службените возила и отворање на конзулат во Корча

Владата на денешната 97 седница донесе одлука сите државни институции да ги променат регистарските таблици на службените возила со новите таблици со боја најдоцна до 15 септември 2025 година. Оваа одлука е во насока на уште едно реализирано ветување пред граѓаните со цел поголема отчетност, транспарентност и ставање крај на злоупотребите кои со биле пракса во минатото, соопшти владината служба.
Дополнително, Владата на предлог на Министерството за надворешни работи и надворешна трговија донесе одлука за отворање на генерален конзулат во Корча со јурисдикција во целиот регион. „Граѓаните мора да имаат брз и ефикасен сервис и услуги, поддршка за културни, образовни и економски врски.
Владата продолжува со конкретни мерки и политики кои имаат за цел да ја потврдат вистинската грижа за подобрување на стандардот и враќање на довербата на граѓаните во институциите“.
Македонија
Со запален факел се обидел да подметне пожар во Струмица: под истрага едно лице за загрозување на општата сигурност

Јавен обвинител од Основното јавно обвинителство Струмица донесе Наредба за спроведување истражна постапка против едно лице за обид да изврши – Тешки дела против општата сигурност од член 292 став 1 во врска со член 288 став 1 од Кривичниот законик.
Осомничениот вчера попладне, преку една социјална мрежа, се заканил на лице од Струмица дека ќе му ја запали викендицата, а потоа се обидел заканите да ги реализира.
На локацијата брана Водоча се обидел да подметне пожар и да предизвика поголема имотна штета. Со запален факел од хартија и текстил ги запалил гредите на натстрешницата, кои започнале да чадат и да горат. Со тоа предизвикал ризик од пожар не само на објектот, туку и на повеќе други викенд-куќи и на нискостеблеста и високостеблеста вегетација во непосредна близина.
Поради опасност од бегство и можност да го повтори односно да го доврши делото, јавниот обвинител до судијата на претходна постапка достави предлог за определување мерка притвор.