Македонија
Минчев: Реформите не се затворен процес, тука сме заедно со граѓаните

Министерот за јавна администрација, Горан Минчев, се обрати на јавната расправа за нацрт ажурираниот акциски план 2025 – 2026 на Стратегијата за реформа на јавната администрација (РЈА), што се одржа во организација на Министерството за јавна администрација. На настанот учествуваа претставници од институциите, граѓанското општество, меѓународните партнери и експерти од СИГМА, а свое имаше и Баграт Тунијан, раководител на СИГМА во Република Македонија.
Министерот Минчев нагласи дека ревидираните активности се резултат на суштински промени во институционалната и во законската рамка, како и на потребата од реално приспособување на реформите кон новите владини приоритети и препораките од извештајот на СИГМА од 2024 година.
„Јавната администрација е крвотокот на државата. Нашата задача е тоа срце да го зајакнеме, да му дадеме нов ритам, европски ритам, ритам што ќе им служи на граѓаните, а не на партиите или тесните интереси“, рече Минчев.
Тој ја потенцира и важноста на консултативниот процес со засегнатите страни, кој резултира со ревидираниот акциски план нагласувајќи дека „реформата не е затворен процес, таа е отворена, директно поврзана со граѓаните, институциите, граѓанското општество и со меѓународните партнери“.
Целта на јавната расправа беше да се презентира и дискутира со засегнатите страни за нацрт-ажурираниот акциски план за РЈА, кој ги одразува новите приоритети од владината програма 2024 – 2028, како и клучните наоди од извештаите за спроведување на стратегијата и процесот на европска интеграција. „Нашата визија е јасна: силна, професионална и европска администрација, која нема да биде товар, туку двигател на развојот“, порача министерот Минчев. Јавната расправа е последниот чекор пред формалното усвојување на ажурираниот акциски план, кој ќе биде основа за натамошно унапредување на јавната администрација во функција на граѓаните и во согласност со европските стандарди.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Арсовска: Советот на градот и управниот одбор се одговорни за состојбата во Комунална

Градоначалничката Данела Арсовска во објава на социјалните мрежи утрово пишува дека одговорноста за состојбата во ЈП „Комунална хигиена“ – Скопје е во рацете на Советот на градот и управниот одбор, кои, како што наведува, се составени од кадри на ВМРО-ДПМНЕ и ВЛЕН.
„Ако не ви е јасно дека кадрите на Мицковски се одговорни за ѓубрето низ Скопје, ќе се обидам да ви појаснам уште еднаш,“ напиша Арсовска на социјалните мрежи.
Таа наведе дека според законот, ЈП „Комунална хигиена“ – Скопје го основа Советот на Град Скопје, кој одлучува за сите согласности и оперативни планови. Управниот одбор, кој управува со претпријатието, е составен од членови на ВМРО-ДПМНЕ и ВЛЕН, а неговата претседателка – како што посочува Арсовска – е „осудена за две кривични дела и наградена со советничко место во општина Бутел“.
Во објавата се наведува и дека Советот не презел мерки за да обезбеди нормално работење на претпријатието, ниту пак ги разрешил управниот и надзорниот одбор, иако, според Арсовска, тоа е законска обврска.
„Функционирањето на секој директор зависи од одлуките на управниот одбор на ВМРО/ВЛЕН и тој може единствено да спроведува тоа што тие ќе изгласаат. Кој и да е поставен, е блокиран и зависен од нивните одлуки,“ појасни Арсовска.
Во завршницата на соопштението се наведува дека Советот на градот не презел ниту една законска мерка за подобрување на состојбата, а дека целата одговорност за натрупаното ѓубре низ Скопје, според Градот, лежи кај кадрите на ВМРО-ДПМНЕ и ВЛЕН.
Македонија
Николоски: Потпишавме меѓудржавен Договор за авиосообраќај, создаваме услови за нови линии и бројни туристи од Велика Британија

Заменик претседателот на Владата и министер за транспорт Александар Николоски и Киер Метер, министер за воздухопловство, поморство и декарбонизација, во Лондон го потпишаа Договорот за редовен воздушен сообраќај помеѓу Македонија и Велика Британија.
Договорот ја отвора можноста за воспоставување на нови директни авиолинии меѓу двете земји, а со тоа и зголемување на бројот на туристи од Велика Британија.
Овој Договор се потпиша на иницијатива на Велика Британија и претставува нова правна рамка со која се уредуваат односите во делот на редовниот воздушен сообраќај помеѓу двете земји.
Како што истакнаа двајцата министри, преку Договорот се овозможува поголема слобода и флексибилност на авиокомпаниите, ефикасно работење и нови услуги, додека за патниците се овозможуваат подобри конекции, нови дестинации и конкуретни цени.
Вицепремиерот Николоски по потпишувањето потенцираше дека Македонија има огромен раст во авиосообраќајот во последната година и претставува сериозна конкуретна земја во регионот, а тоа се должи пред се на спроведување на политиките на Владата за развој на цивилниот воздушен сообраќај. Додаде и дека домашните аеродроми имаат огромен потенцијал да опслужат нови авиокомпании и патници.
Со Договорот се уредува и интермодалниот превоз што е особено важен дел во карго транспорот, а исто така се постигнува и висок степен на заштита и безбедност на авиокомпаниите и патниците утвредни преку ИКАО стандардите.
Македонија
ВМРО-ДПМНЕ: Го зголемивмe бројот на советници за 82 во однос на претходните избори

Владејачката ВМРО-ДПМНЕ по првиот круг од локалните избори соопшти дека со освоените 550 советнички места низ целата држава и градот Скопје, како и над 300 илјади гласови, ја потврдила довербата од граѓаните.
Од партијата наведуваат дека имаат раст од 82 советнички места, односно за 17,5 проценти повеќе во однос на претходните локални избори.
„Од другата страна, опозицијата предводена од СДС освои околу 230 советници, што е за 166 помалку од минатите избори или за 42 проценти помалку места во советите. СДС има и значително намалување на гласовите, со освоени околу 126.000 гласа, што е за 111.000 помалку од локалните избори во 2021 година“, велат од ВМРО-ДПМНЕ.
Од партијата посочуваат дека резултатите се должат на големиот број реализирани проекти на локалните самоуправи предводени од ВМРО-ДПМНЕ, меѓу кои градинки, училишта, здравствени домови, пазари, канализациски мрежи, субвенции за инвертер клими, велосипеди, електрични тротинети и финансиска поддршка за социјално ранливи категории.
„Ова е одличен стимул дека сме на прав пат и дека треба да продолжиме со работа за граѓаните. Затоа е важно на 2 ноември граѓаните повторно масовно да излезат и да го заокружат бројот 9“, порачаа од ВМРО-ДПМНЕ.