Со СДС и ДУИ од 2017 година до денес струјата поскапе за повеќе од 50 проценти. Не поминува година, а да нема покачување. СДС удира по народот за да го полни буџетот, кој го трошат на тендери и криминали, изјави Марија Митева, портпарол и член на ИК на ВМРО-ДПМНЕ.

Од утре, рече таа, граѓаните ќе плаќаат поскапа струја затоа што власта го зголемува ДДВ-то од 10 на 18 отсто. Додаде дека покачувањето е само поради тоа што власта сака да собере повеќе пари во буџетот, кој со години го краде.

„Со утрешното покачување на цената на струјата, а според блоковите што ги воведе СДС, граѓаните што паѓаат во вториот блок ќе плаќаат 2,88 отсто поскапа струја, во третиот блок зголемувањето ќе биде 9,99 отсто, а во четвртиот блок зголемувањето ќе биде 9,87 отсто. Во просек најголемиот број домаќинства ќе имаат зголемување од 2,88 и 9,99 %. Тоа би значело дека на сметка од 5.500 денари покачувањето ќе биде над 500 денари. И сметките за јули, наместо како досегашните 5.500 денари, ќе бидат над 6.000 денари. СДС ветуваа поевтина струја, а граѓаните денес плаќаат поскапа струја од кога било порано“, рече Митева.

Додаде дека парите од утрешното покачување ќе завршат во буџетот, но власта на СДС и ДУИ ќе може да ги троши на договори во четири очи и криминални тендери. И за целиот овој период, вели таа, додека собираат милиони во буџетот по основи на даноци од сметки за струја, инвестициите во нови енергетски капацитети се нула. Не џабе и ДЗР излезе со заклучок дека Македонија нема енергетска одржливост на долг рок.

„Инвестициите во енергетиката требаше да се случат уште пред 5 или 6 години, а секое дополнително одложување ќе значи поскапа струја од година на година. ВМРО-ДПМНЕ има план за енергетиката, затоа потребни се промени, за ударите по џебот на народот да завршат“, додаде Митева.