Општина Центар информира дека општинските служби интензивно работат на подигнувње на хигиената на повисоко ниво. Денеска, се исчистија јавните површини околу пазарот Буњаковец. Градоначалникот Горан Герасимовски потенцира дека хигиеничарите од Општината и од јавното претпријатие „Паркинзи на Општина Центар“ секој ден работат на терен, во две смени за обезбедување почисто централно градско подрачје.

„Денеска, ги исчистивме јавните површини околу пазарчето Буњаковец. Тука, гравитираат голем број граѓани кога пазаруваат, неопходно е овој дел да биде чист и уреден. Утринава, нашите хигиеничари го отстранија и сметот од улиците кадешто надлежност има Град Скопје. Повторно, се соочивме со истата грда слика од минатиот викенд, сакам да прашам кога Град Скопје ќе се фати за работа? Навистина, ова веќе не е дозволиво. Минатата недела исчистивме повеќе населби во општината, со акцијата продолжуваме и следните денови. Центар не чека, Центар чисти, истакнува Герасимовски.

„Големата акција за чистење на улиците во Центар започна минатата недела, откако Град Скопје потфрли. Граѓаните можат да пријават смет и диви депонии на следните телефонски броеви: 076/350-767 и 02/3203-693“, дополнуваат од Општина Центар.

Министерот за правда, Игор Филков, ја разреши од членство во работна група за измени на Кривичниот законик судијката Даниела Алаксовска- Стојановска од која на протестите за смртно прегазената Фросина Кулакова семејството и јавноста побараа одговорност оти го спасила од затворска казна за претходни дела.

„Денес се обраќам пред македонската јавност не само како министер за правда туку како граѓанин и родител, ги повикувам судовите во сите инстанци и Судскиот совет да преземат дејствија со кои ќе се преиспита целиот случај со прерано загинатата Фросина. Ве информирам дека денеска донесов одлука да ја разрешам од членство во работна група во Министерството за правда, судијката чие име ја бранува јавноста. Судијката беше дел од работната група која беше формирана во декември 2020 година за измена на Кривичниот законик и беше дел од оптимизираната работна група за брзите измени на Кривичниот законик со кои што очекуваме да се отстранат штетните последици предизвикани во 2023 година. Ова го правам со цел да не се дискредитира процесот кој што е започнат за потребните суштински реформи во правосудството. Загриженоста ја упатувам затоа што сметам дека е крајно време надлежните институции да покажат дека се подготвени да преземат мерки со цел лоцирање на виновниците и нивна евентуална одговорност. Одговорност мора да се утврди и тука нема компромиси. Граѓаните очекуваат правда а институциите се тука да испорачаат брзо, правично и транспарентно“ рече министерот Филков.

Овој случај, според него, е само потврда на податоците за оценка на работата на судовите кои беа презентирани пред само некој ден.

„Токму брзината на постапувањето и корумпираноста беа детектирани како најголем проблем на судството, со најниска оценка. Непостапувањето и спороста отвора можност утре да имаме исти или слични случаи“, вели министерот Филков.

Тој апелираше до сите политички чинители во државата да не се обидуваат овој несреќен случај да го злоупотребуваат за дневно- политички цели и нагласи дека правосудниот систем мора да се менува од корен, однадвор, но и одвнатре и најави дека нема да дозволи неказнивост и недопирливост.

Во Гостивар денеска се одржа третиот консултативен настан за измените и дополнувањата на Законот за локалната самоуправа.

Настанот е дел од циклусот активности насочени кон зголемена транспарентност и отчетност на локалните единици, унапредување на учеството на граѓаните во креирањето на локалните политики, воведување комунални редарски служби и развој на недоволно развиени подрачја.

Министерот за локална самоуправа, Златко Перински, истакна дека целта на измените на законската рамка е да се зголемат демократските капацитети на локалните самоуправи и на граѓаните, што е во интерес на сите и оцени дека јавните дебати се исклучително битни со оглед на тоа дека можност за предлози и сугестии имаат сите засегнати страни, почнувајќи од градоначалниците, па сѐ до граѓанскиот сектор, односно граѓаните.

„Во моментот сме сведоци, за среќа, на мал број градоначалници што се однесуваат девијатно и ја злоупотребуваат довербата добиена од граѓаните. Сметам дека сме на добар пат за креирање многу квалитетно и издржано законско решение, кое во периодот што следува ќе одговори на потребите и на локалните самоуправи и на граѓаните“, истакна Перински, кој посочи дека законските реформи ќе бидат усогласени со позитивните европски практики применливи кај нас.

Професорот Мемет Мемети, кој е дел од експертската група, оцени дека преку јавните дебати ќе се подготви законско решение, кое ќе го подобри квалитетот на животот на граѓаните и ќе придонесе кон посилни и поавтономни општини.

Професорот Александар Спасеновски истакна дека Македонија веќе има воспоставен и функционален систем на локална самоуправа, но сепак неопходна е негова постојана еволуција и приспособување кон новите предизвици и потреби.

„Затоа, преку широк и консултативен процес, во кој се вклучени сите релевантни актери – научната заедница, локалните власти и граѓанскиот сектор – се стремиме да изнајдеме решенија што ќе го надградат постојниот систем и ќе го направат уште поефикасен, потранспарентен и подобро приспособен на современите потреби на општините и граѓаните“, изјави Спасеновски.

Домаќинот на настанот, в.д. градоначалникот на Гостивар, Валбон Лимани, ја поздрави иницијативата за отворање на Законот и изрази поддршка за планираниот механизам за отповикување на градоначалниците.

Консултативната средба беше организирана од Министерството за локална самоуправа, со поддршка од проектот „Зајакнување на општинските совети“, финансиран од владата на Швајцарија и Министерството за локална самоуправа, а кофинансиран и имплементиран од УНДП.