Почнува нова ера во односите меѓу Обединетото Кралство и Северна Македонија по потпишувањето на договорот „влада со влада“, соопшти британската амбасада во Скопје.

Во соопштението се вели дека партнерството ќе ја зајакне трговијата и ќе поттикне економски раст.

„Ова партнерство ја поддржува реализацијата на клучни инфраструктурни проекти во различни сектори, вклучувајќи транспорт, здравство, енергија и технологија. Ќе има пристап до широка поддршка, вклучувајќи техничка помош и до 5 милијарди фунти поддршка од „УК Експорт Финанс“ за проекти во Северна Македонија. Партнерството ја нагласува заложбата на двете нации за соработка на клучни инфраструктурни проекти кои носат социјални, економски и еколошки придобивки. Со искористувањето на експертизата и иновациите на двете земји, ова партнерство ќе овозможи развој на отпорна инфраструктура што поттикнува раст и благосостојба“, велат од амбасадата.

Формалната церемонија на потпишување се одржа вчера, 22 мај, во Лондон во присуство на британскиот министер за извоз, Герет Томас, и вицепремиерот Александар Николоски.

Министерот за извоз, Герет Томас, ја изрази својата возбуда:

„Ова партнерство отвора ново поглавје во нашите билатерални односи со Северна Македонија. Обединетото Кралство има огромно искуство во испорака на висококвалитетна инфраструктура ширум светот и ми е драго што го започнуваме ова ново партнерство што ќе помогне повеќе британски бизниси да извезуваат во Северна Македонија.“

Британскиот амбасадор во Северна Македонија, Метју Лосон, изјави:

„Остваривме значаен чекор во односите меѓу Обединетото Кралство и Северна Македонија со потпишувањето на договорот „Влада со влада“. Г2Г ќе ги зајакне веќе одличните трговски врски меѓу нашите земји и ќе ја поддржи реализацијата на клучни инфраструктурни проекти во сектори како транспорт, здравство, енергија и технологија. Како британски амбасадор, горд сум што нашите влади го постигнаа ова историско партнерство кое ќе им користи на граѓаните на двете земји. Стоиме заедно силни и обединети.“

Неодамна, британскиот премиер Кир Стармер и македонскиот премиер Христијан Мицкоски го поздравија новото Стратешко Партнерство на Самитот на Европската политичка заедница во Тирана, на 16 мај 2025 година. Ова G2G претставува почеток на проширена трговска и инфраструктурна соработка.

Партнерствата влада со влада (Г2Г) се формални договори со кои се овозможува пристап до јавна и приватна британска експертиза за конкретни проекти или програми со комерцијални придобивки.

Вкупната трговска размена (извоз и увоз) меѓу Обединетото Кралство и Северна Македонија изнесувала 1,7 милијарди фунти во четирите квартали заклучно со третиот квартал од 2024 година.

Обединетото Кралство е втор најголем трговски партнер на Северна Македонија во истиот период.

Јавното претпријатие за јавни паркиралишта „Паркинзи на Општина Центар“- Скопје, вчера, успешно реализира информативна акција за промоција на новите паркинг-билети во Дебар Маало, соопштија од таму.

Во рамките на акцијата, како што информираат, на граѓаните им беа дистрибуирани летоци со информации за новите типови на паркинг-билети достапни во Општина Центар.

„Станува збор за мултинеделен паркинг-билет, со цена од 2.000 денари, која важи 7 дена и овозможува паркирање на сите комерцијални паркиралишта во зона 1 и зона 2.

Гостински паркинг-билети, наменети исклучиво за жители со склучен кориснички договор, и тоа:
– дневен гостински билет  по цена од 300 денари;

– неделен гостински билет – по цена од 1.200 денари.

Овие гостински билети, според соопштеното, може да се користат само на отворени типови паркиралишта (комерцијални и резидентни) во секторот во кој жителот има пријавено живеалиште.

На настанот учестуваа градоначалникот на општина Центар, Горан Герасимовски, и директорот на ЈП ПОЦ, Душко Коцевски, кои на самото место остварија средби со граѓаните и ги информираа за придобивките од новите паркинг-билети. Тие ја истакнаа важноста на модернизацијата на паркинг-системот и овозможувањето полесен и поефикасен пристап за сите корисници.

„Со оваа активнос, продолжуваме со транспарентна комуникација со жителите на општината и креирање практични решенија за секојдневните потреби на граѓаните. Новите паркинг-билети се дизајнирани за поголема флексибилност и ефикасност при користење на паркинзите во Центар,и може да се купат на ве- страницата www.poc.mk“, се истакнува во соопштението.

Министерот за надворешни работи, Тимчо Муцунски и’ посака добредојде на високата претставничка на ЕУ за надворешни работи и безбедносна политика, Kaja Калас, во Скопје.

„Пред нас е исполнета агенда со повеќе средби, на кои очекувам конструктивна и отворена дискусија. Во фокусот на разговорите ќе биде недвосмислената европска перспектива на нашата држава, целосната усогласеност со заедничката надворешна и безбедносна политика на унијата, потребата од забрзување на процесот на пристапување, како и континуираната посветеност на спроведувањето на реформите“, напиша Муцунски на социјалните мрежи.

Во рамки на посетата ќе се одржи и Првиот дијалог за безбедност и одбрана со Европската Унија, во контекст на Партнерството за безбедност и одбрана, потпишано во ноември 2024 година, што претставува значаен во продлабочувањето на соработката со Европската Унија во областа на надворешната и безбедносната политика.