Македонија
Мицкоски: Во овој парламентарен состав уставни измени нема да има, вчера го затворив прашањето со уставните комисии денес го затворам прашањето за уставните промени

Претседателот на ВМРО-ДПМНЕ, проф. д-р Христијан Мицкоски, одговарајќи на новинарско прашење во однос на уставните измени и дали има притисоци во однос на тоа изјави дека притисоци има, но неговите аргументи се елементарна логика и повтори уште еднаш дека во овој парламентарен состав уставни измени нема да има.
„Видете дека притисоци има, има ова не е бајка, јас не можам да ви кажам дека нема притисоци, и секој оној кој што се нафатил со оваа работа треба да е свесен дека има притисоци, и треба да е свесен дека има моменти кога треба да се спротивставите на тие притисоци со аргументи. Мојот пристап е да се спротивставам на тие притисоци со аргументи и така и ќе продолжам до сега не сум слушнал аргумент кој што ги победува аргументите кои што јас ги презентирам. Не дека сум јас надмен човек туку едноставно во животот треба да имате и елементарна логика, моите аргументи се елементарна логика и тие се јавно познати. Ако некој мисли дека со притисок нешто кај мене ќе постигне се лаже, такво нешто нема да се случи. Јас сум свесен дека тоа ќе продолжи и понатаму. Но ќе повторам промена на уставот во овој парламентарен состав нема да има. свесен за политичката цена која што можеме да ја платиме излеговме во јавност дадовме предлог, предлог кој што тие го дадоа, а тоа е хрватскиот модел на уставна преамбула, и рековме еве го прифаќаме, ајде господа повелете да видиме кој е европеец кој не е европеец. Ги извадивме на чистина, на виделина излегоа сите лаги сите клевети колку е Ковачевски европеец, колку е Пендаровски Стево европеец, колку е Али Ахмети европеец и останатите на чистина ги извадивме јавноста можеше да ги види . И тука завршува се. Јас сум свесен дека тие немаат друга тема, јас сум свесен дека тие немаат ниту еден проект ниту политика и реформа и континуирано како расипана грамофонска плоча ќе го повторуваат тоа уставни измени, уставни измени. Јас тука ја затворам оваа тема, вчера ја затворив темата со комисиите денеска ја затворам со уставните измени. И од сега па натаму одговорот мој ќе биде, го знаете ставот, тој е непроменет уставни измени во овој парламентарен состав ќе нема“, истакна Мицкоски.
Претседателот на ВМРО-ДПМНЕ, Мицкоски додаде и дека македонскиот модел може да биде само модел во кој што ќе има македонски национален консензус, а по ова прашање нема консензус.
„Македонскиот модел може да биде само модел во кој што ќе има македонски национален консензус. По ова прашање немаме консензус. Консензус се правеше кога се распродаваше Македонија. Тие тој моментум го испуштија. А сега им нудам модифициран македонски модел ист како Хрватскиот модел, земја членка на Европската Унија. Повелете господа одважете се и да одиме“, нагласи Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Кандидатурата на Мециновиќ за Скопје е договор на Левица да им помогне на СДС и ДУИ“, велат од ВМРО-ДПМНЕ

„Јасно е дека кандидатурата на Амар Мециновиќ е дил на Левица за помош на ДУИ и СДС, со математика Орце Ѓеорѓиевски да не победи уште во првиот круг“, велат од ВМРО-ДПМНЕ.
„Затоа Левица не можеше да најде ниту еден друг кандидат и никој друг не се нафати за кандидат за градоначалник за Скопје, па затоа го кандидираа пратеникот Амар Мециновиќ.
Го прашуваме Мециновиќ со оглед на тоа што Димче Апасиев бараше пратениците на ВМРО-ДПМНЕ кои се кандидати за градоначалници да си поднесат оставка дали Мециновиќ ќе си поднесе оставка од пратеник бидејќи е кандидат за градоначалник“, соопшти ВМРО-ДПМНЕ.
Македонија
ДУИ не се Албанците, ДУИ е криминалната коалиција на злото, велат од ВМРО-ДПМНЕ

Бујар Османи продолжува со истата матрица, секоја критика за криминалот на ДУИ да ја претставува како „поттик на поделби“, велат од ВМРО-ДПМНЕ како реакција на изјавите на Бујар Османи од ДУИ.
Вистината, според владејачката партија е сосема спротивна.
„Поделбите и неправдите во државата настанаа токму поради СДСМ и ДУИ и нивната власт заради криминалните тендери, корупцијата и злоупотребата на институциите.
Бујар, Артан, Заев, Али и Филипче се коалиција на злото која ја жртвува Македонија за да ја ограбат државата и народот.
Кога ќе бидат фатени со рацете во медот, Османи и неговите колеги се кријат зад етнички теми. Но Албанците не се ДУИ, ниту пак ДУИ има право да зборува во нивно име“.
Албанците во Македонија, нагласуваат од ВМРО-ДПМНЕ се чесни граѓани кои сакаат ред, правда и развој, а тоа, како што велат е спротивно од она што го нудат Али, Артан, Бујар, Филипче и Заев.
„Затоа, колку и да се обидуваат да ја претворат борбата против криминалот во „етничко прашање“, тие добро знаат дека нема да успеат. Народот кажа јасно: криминалот не се исплати, а ДУИ и СДС се минато“.
Македонија
Марковски како кандидат за градоначалник на Скопје: Градот е во агонија

Граѓанската платформа „Независни заедно“ на денешниот промотивен настан и официјално ја објави кандидатурата на деканот на Градежниот факултет при Универзитетот „Св. Кирил и Методиј“, професор д-р Горан Марковски, за градоначалник на град Скопје на претстојните локални избори.
Промоцијата ја отвори Јана Белчева-Андреевска, кандидатка за советничка за Град Скопје, која истакна дека по години гледање како се нижат проблеми, се губат и запустуваат јавни простори и јавни објекти, како горат и исчезнуваат пред нашите очи објекти со вредност и значење, има шанса за промена.
„Скопје е во агонија. Потребна му е визија ослободена од корупција, култура наместо популизам, стандарди наместо импровизации. Оваа моја кандидатура е повик за заедничка борба за град што ќе им служи на граѓаните, а не на тесни интереси“, истакна Марковски.
Посочи дека Скопје денес се соочува со сериозни предизвици – загаденост, урбан хаос и изгубен идентитет – и нагласи дека потребни се нови решенија, кои ќе донесат надеж, особено за младите.
„Го почнувам овој пат од Камениот мост – симболот на поврзување и заедништво. Убеден сум дека со широка граѓанска поддршка можеме да изградиме град што ќе биде вистински европски дом, место со кое ќе се гордеат сите скопјани“, додаде тој.
Од „Независни заедно“ порачаа дека Марковски е личност со докажан професионален интегритет и долгогодишно искуство, кој зад себе има голем број реализирани проекти и генерации воспитани инженери. „Време е Скопје да го водат стручни лица со храбро лидерство и визија за поубав град по мерка на човекот“, велат од платформата.
Марковски истакна дека Скопје мора повторно да стане симбол на заедништво и поврзување, а вистинската промена може да се постигне единствено преку активни граѓани и независни личности, кои ќе изградат силни институции и здрава демократија.
„Независни заедно“ е широка граѓанска платформа, која ги обединува независните советници и локалните иницијативи од неколку скопски општини -„Шанса за Центар“, „Зелените за Гази Баба“ и „Групација 389“. Покрај град Скопје, платформата веќе објави дека цели на победа и во општина Центар, каде што ќе ја поддржи кандидатурата на истакнатата антикорупционерка Билјана Ивановска. „Независни заедно“ произлезе како одговор на разочараноста од традиционалните политички партии и има цел да ја врати локалната власт во рацете на граѓаните. Платформата ги повикува сите скопјани, поединци и групи, да се приклучат и заеднички да изградат нов модел на управување – чесен, стручен, транспарентен и посветен на јавниот интерес. „Само заедно можеме да му дадеме шанса на Скопје да стане град по мерка на човекот“, појаснуваат од платформата.