Македонија
Мицкоски е уверен дека Христовски ги исполнува условите за директор на АНБ, ја повика Антикорупциската комисија случајот да го стави на брза лента
Премиерот Христијан Мицкоски е уверен дека директорот на Агенцијата за национална безбедност, Бојан Христовски, ги исполнува законските услови.
Прашан од новинарите дали ќе бара одговорност од Христовски поради наводите кои се појавија за лажен сертификат по англиски јазик, Мицкоски изјави дека ќе го направи тоа ако го констатира соодветна институција.
Премиерот рече дека ваквите тврдења излегуваат од опозициската СДСМ и исплашените поранешни разузнавачи кои ваквите агенции ги претвориле во тврдина за борба против нив, во времето кога биле опозициска партија.
„Дополнително ме мотивира кога овие кодошко удбашки инсталации во СДСМ и ДУИ напаѓаат чесни луѓе кои си ја сакаат и работат за оваа татковина“, рече Мицкоски.
На коментарот на новинарите дека тврдењата за сертификатот беа објавени од бугарскиот сајт „Фактор“, и прашањето дали разговрал со Христовски, Мицкоски ја изрази увереноста дека се’ е по закон, а потоа ја повика Антикорупциската комисија, како најнадлежна институција да истражи и да го стави случајот на брза трака.
„Јас сум уверен дека ги исполнува условите. Зарем ќе дозволиме такво нешто да се случи. Тој сертификат е издаден од 2022 година. Сега во меѓувреме дали постоела или не постоела таа агенција, тоа е друго прашање. Имаме институции и систем кој функционира“, рече Мицкоски.
Додаде дека удбашко-комунистичките инсталации кои се обидуваат да им вршат притисок имаат зошто да се плашат, бидејќи информациите коишто доаѓаат од таму се катаклизмични.
Во биографија на Бојан Христовски стои дека тој се стекнал со сертификат за владеење на англиски јазик според системот ТОЕФЛ, со полагање на испитот во 2022 во јазичното училиште Language School Julia Cо.LTD во Пловдив.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Писмото во кое Ахмети тврди дека бил загрозен Охридскиот договор е испратено и до ЕУ и САД
Писмото во кое претседателот на ДУИ, Али Ахмети, тврди дека бил загрозен Охридскиот договор, е испратено и до функционери од ЕУ и САД, соопшти ДУИ.
„Петседателот на Демократската унија за интеграција (ДУИ), Али Ахмети, испрати писма до Претседателот и Премиерот на Република Албанија, Бајрам Бегај и Еди Рама, Претседателката и Премиерот на Република Косово, Вјоса Османи и Албин Курти, Претседателката на Европската комисија Урсула фон дер Лајен, Канцеларот на Германија Олаф Шолц, Претседателот на Франција Емануел Макрон и Државниот секретар на САД Ентони Блинкен. Во овие писма, Ахмети ја изразува својата длабока загриженост за најновите политички и уставни случувања во Северна Македонија, кои ја загрозуваат постигнувањатана Охридскиот договор и принципите на еднаквост и стабилност во нашата мултиетничката држава“, велат од ДУИ.
Ахмети во писмото повикува на заедничка акција.
Повеќе за писмото на линкот.
Македонија
Ахмети му напиша писмо на Рама: „Ве повикувам на заедничка акција за заштита на Охридскиот договор“
Претседателот на ДУИ, Али Ахмети во писмо до албанскиот премиер, Еди Рама, напиша дека поради најновите политички и уставни случувања се загрозуваат постигнувањата на Охридскиот договор.
Ахмети во писмото вели дека Уставниот суд планира да ги укине основните одредби на Законот за употреба на јазиците, а зборува и за одлука за забрана на идентификацијата на етничката припадност на граѓаните во државните институции . Ахмети се осврнува и на последните избори, коментирајќи дека бил прекршен основниот принцип на Охридскиот договор, кој бара формирање на политичко мнозинство врз основа на праведната застапеност на етничките заедници.
Првиот човек на ДУИ, понатаму вели дека ова биле три големи удари врз темелите на Охридскиот договор и кои претставуваат сериозна закана за мирот, стабилноста, меѓуетничката хармонија и мултиетничката демократија.
„Овие не се само внатрешно политички прашања, туку имаат сериозни последици за регионот и неговата стабилност. Овие интервенции ја загрозуваат основата на мирот и еднаквоста, враќајќи нè во условите пред 2001 година, кои беа причина за кризата и војната од таа година“, вели Ахмети.
Тој во писмото повика на заедничка и решителна акција за, како што рече, заштита на достигнувањата на Охридскиот договор и загарантираните права на Албанците.
Македонија
Алијанса за Албанците: Меџити ги злоупотребува државните канцеларии за партиски состаноци
Лидерите на коалициските партии во нелегитимната Влада грубо ги злоупотребуваат државните институции и ресурси, велат од Алијансата за Албанците преку соопштение, споделувајќи фотографија за која тврдат дека потекнува од партиски состанок.
„И како член на ДУИ, и како градоначалник на општина Чаир, но и сега како член на ВЛЕН, Изет Меџити ги злоупотребува владините канцеларии за партиски состаноци и активности.
Ја повикуваме Државната комисија за спречување на корупцијата да отвори постапка за злоупотреба на државните институции од политички функционери за партиски цели. Го повикуваме и вицепремиерот за добро владеење да ги извршува службените должности и да ги санкционира незаконските дејствија на неговите сопартијци.
Ваквите постапки се неподносливи и сериозно законско прекршување и го откриваат вистинското лице на коалиционите партии ВЛЕН, кои државните институции ги гледаат само како алатка за партиски придобивки“, се вели во соопштението на Алијансата.