Македонија
Мицкоски: Заев нè доведе во ќор-сокак и сега ни вели – асимилација за евроинтеграција

Апелираме до власта, до Владата предводена од Зоран Заев и СДСМ, да се вразумат и да почнат да дејствуваат конструктивно, порача лидерот на ВМРО-ДПМНЕ, Христијан Мицкоски, одговарајќи на новинарско прашање што ѝ преостанува на партијата во ситуација кога се одбиени лидерска средба и иницијативата за дебата во Собранието, а во однос на македонските евроинтеграции.
„Јас повикувам на нов почеток. Доколку власта тоа не го направи во деновите што следуваат, ќе ги повикам сите опозициски партии и нивните лидери на една лидерска средба во рамките на Клубот на пратениците, каде што ќе разговараме за иднинатата на Македонија, ќе разговараме за сите овие напластени проблеми, кои денес се наше секојдневие, а кои се резултат на погрешните политики на СДСМ и Зоран Заев“, нагласи Мицкоски.
Тој посочи дека денешната состојба во надворешната политика произлегува, како што рече, од изборниот поткуп, односно од 10 илјади гласа повеќе во споредба со ВМРО-ДПМНЕ.
„Тој поткуп денес нè доведе до бездна, да избираме асимилација за евроинтеграција. Ние не можеме со тоа да се сложиме, потребно е ресетирање на општеството, потребни се нови политичари, политичари без концесии, кои ќе може да се изборат за достоинствен влез на македонските граѓани, без разлика на нивниот етнички состав во ЕУ. Ние тоа го заслужуваме“, истакна лидерот на ВМРО-ДПМНЕ
Попладнево, по средбата со партнерите од коалицијата „Обнова за Македонија“, Мицкоски посочи дека македонскиот јазик, историјата, македонското малцинство – не смее да бидат оспорени и ја повика Бугарија да не ја блокира европската перспектива на Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Забрана за тешки товарни возила на неколку патни правци

Од 19:45 часот на магистралниот пат Маврово – Дебар воведена е забрана за тешки товарни возила поради задржување на снег на коловоз, извести АМСМ.
Од 19.55 часот воведена е забрана за тешки товарни возила и за патниот правец Гостивар – Стража, додаваат од АМСМ.
Македонија
Посебен сообраќаен режим утре во Скопје

Од утре петок до сабота, во официјална посета на Р.С.Македонија ќе присуствува претседателот на Владата на Република Србија, Ѓуро Мацут.
Од тие причини Едницата за безбедност на патниот сообраќај ќе преземе мерки за посебен режим на сообраќај на подрачјето на град Скопје.
МВР апелира до граѓаните да се почитуваат наредбите што ќе ги даваат униформираните полициски службеници.
Македонија
Судијата за врски на Франција за балканскиот регион во посета на Јавното обвинителство

Јавниот обвинител на Република Северна Македонија Љупчо Коцевски денеска се сретна со францускиот амбасадор Кристоф Ле Риголер, на средба за претставување на новоназначениот судија за врски на Република Франција за регионот Сирил Лакомб.
Тој е еден од вкупно 20 судии за врски на Франција во светот, а од државниот обвинител Коцевски се информираше директно за состојбите во обвинителството. Притоа, судијата за врски Лакомб понуди поддршка со оперативна и техничка помош, но и експертиза преку француските правосудни органи.
Бидејќи и самиот бил јавен обвинител и лице за врски на Република Франција со Европравда, Лакомб се интересираше и за постапката за делегирање на обвинителот за врски на Република Северна Македонија во оваа меѓународна институција.
Јавниот обвинител Коцевски, од своја страна, изрази благодарност за континуираната француска поддршка за работата на Јавното обвинителство.