Македонија
Мицкоски за повикот на Османи: Требаше да седнеме на маса пред да ги потпишат капитулантските договори

Како и обично, доцнат едно две три години во своите намери. Требаше, пред да ги потпишуваат овие капитулатнски договори, да седнеме на маса. Вака претседателот на ВМРО-ДПМНЕ, Христијан Мицкоски, одговори на новинарско прашање за коментар за предлогот на министерот за надворешни работи, Бујар Османи, за нов рамковен договор за ЕУ.
„Ние повикувавме, се сеќавате, јас повикав 5 тима да се формираат, да седнеме и да направиме стратегија и врз основа на таа стратегија понатаму да дејствуваме. Ние и покрај тоа, гледате, еден од тимовите е веќе ефективен, овој што помага во економијата, во енергетиката и покрај што тие тогаш надмено одбија, неодговорно, незрело би рекол. И сега еве со огромно задоцнување повторно нешто се нуди зашто се нема концепт јасен. Претпоставувам дека тоа е обид за дефокус од одговорноста што се бара од неговата партија за министерот за надворешни работи. Да почекаме да видиме како таму ќе се развиваат работите, па дури потоа ќе можеме да говориме за некакви планови во иднина, истакна Мицкоски.
Османи вчера, во присуство на словенечката министерка за надворешни работи, ја повика опозицијата на создавање, како што го нарече, „нов рамковен договор за ЕУ“, кој ќе ја извлече европската агенда од дневнополитичките случувања и блокади.
„Ако навистина сакаме 2030 да ни биде рок за влез во ЕУ, мораме да си подадеме рака меѓу власта и опозицијата дека оваа тема – ЕУ – ќе ја тргнеме надвор од дневнополитичките препукувања. Нам ни треба нов рамковен договор за ЕУ, во кој партиите од која било страна на политичката сцена ќе склучат договор дека ќе се поддржуваме за прашања поврзани со ЕУ. Еве уште еден повик – ајде да ја искористиме оваа шанса, да го искористиме 19 јули како историски датум на нашиот европски пат, да седнеме на маса, да седнат партиските лидери и да склучат меморандум, договор дека ќе се помагаат за прашања за ЕУ независно од тоа кој е на власт“, изјави вчера Бујар Османи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Власта системски го отстранува албанскиот јазик од јавната сфера, велат од ДУИ

Уставниот суд е во завршна фаза на подготовки за укинување на Законот за употреба на јазиците, истакнуваат од ДУИ.
Од оваа партија како што велат изразуваат загриженост кон последните трендови со кои Власта, преку серија институционални чекори, системски го отстранува албанскиот јазик од јавната сфера.
Паралелно, според ДУИ, Инспекторатот за примена на законот е фактички блокиран, одземена му е автономијата, инспекторите шест месеци не земаат плата, и немаат основни услови за работа, вклучително и пристап до службени возила.
„Самиот директор, поставен од Владата, јавно призна дека возилата се користат за негови лични цели, додека институцијата не функционира.
Скандалот е продлабочен од страна на Министерот за политички систем, кој вчера изјави дека ќе го смени директорот на Инспекторатот не поради неработење, туку за да му го покаже местото.
Оваа изјава е директна демонстрација на институционален притисок и понижување врз службената употреба на албанскиот јазик“.
Ги повикуваат сите албански општествени фактори, да се спротивстават на овие системски закани врз Албанскиот јазик.
„Сите албански општествени фактори, вклучувајќи ги и остатоците од ВЛЕН кои останаа дел од Владата, да преземат одговорност кон и јасно да се спротивстават на овие системски закани врз Албанскиот јазик.
Албанскиот јазик не е политичка привилегија , тој е уставна категорија и дел од темелите на Охридскиот договор“.
Македонија
Ниту повредените, ниту семејствата на починатите не се сами, Кочани е наш приоритет, велат од Владата

Трагедијата во Кочани во која животот во загубија 62 млади лица е од невидени размери, велат од Владата и додаваат дека нивна обврска покрај целосна истрага и расветлување на случајот, носење на сите инволвирани лица пред правдата, е и обезбедување соодветна здравствена заштита и медицинска помош на сите повредени и нивни семејства.
„До сега како Влада обезбедивме 30 милиони денари за транспортот и сместувањето на придружбата односно за членовите на семејствата на повредените пациенти.
Но, нашата грижа не завршува тука, бидејќи Кочани е наш приоритет и никој не смее да биде заборавен.
Дополнително отворивме телефонска линија која е во директна комуникација со претседателот на Владата. Повредените и нивните семејства можат да се јават на телефонскиот број 070/355-526 за да ги искажат своите барања, конкретни предлози и потреби кои ги имаат.
Понатаму, на владина седница ќе донесеме одлука со која одморалиштето Пониква кое располага со 27 соби и 56 легла се пренамени во центар за рехабилитација, во кој медицински кадар ќе може да работи како на психофизичката состојба така и на пружањето на медицинска нега за брзо закрепување на повредените граѓани“.
Ова, како што нагласуваат во официјалното соопштение е заедничка борба, и додаваат дека ниту повредените, ниту семејствата на починатите млади лица не се сами.
„Како Влада ќе направиме се што е во наша надлежност да помогнеме и да се обидеме да ја намалиме болката“.
Македонија
Грантови до 10.000 евра за млади и ранливи групи преку мерките од Оперативниот план, најавува Владата

Од Владата најавуваат дека грижата за младите продолжува преку сеопфатна стратегија и оперативен план од 40 милиони евра кој ќе опфати над 16.000 граѓани.
„Се објави јавниот повик од Оперативниот план за вработување за 2025 година, кој се однесува на две нови мерки наменети за невработени лица кои сакаат да започнат сопствен бизнис.
Во рамки на Оперативниот план за вработување за 2025 година, официјално се објави повикот за Мерка 1.1 и Мерката 1.2.
Преку Мерката 1.1 се доделува грант од 430.500 денари (околу 7.000 евра), за граѓаните над 29 години, а преку мерката Мерката 1.2. се доделува грант до 615.000 денари (10.000 евра) за започнување сопствена дејност за лицата до 29 години“.
Како што се појаснува во соопштението, за лица со попреченост се предвидени средства до 250.000 денари над основниот грант, со цел да се создадат еднакви услови за сите заинтересирани.
Двете мерки, според најавеното, вклучуваат и целосна поддршка преку обука за претприемништво, изработка на бизнис план и шестмесечно менторство, со цел граѓаните не само да добијат финансиска поддршка, туку и знаење и насоки за успешно водење на сопствен бизнис.
„Преку мерките и проектите владата ја потврдува посветеноста на создавање на инклузивен пазар на трудот и зајакнување на поединецот како клучен актер во економскиот развој на земјата.
Преку овие мерки се создаваат реални улови за развој, вработување, самовработување, како и развој на претприемништвото и долгорочен економски раст“.