Лидерот на ВМРО-ДПМНЕ, Христијан Мицкоски, преку отворено писмо се обрати до лекарите и здравствените работници за кои вели дека се херои во првата линија во борбата против заразната пандемија која одзема животи.

„Го пишувам ова поради мојата желба, морална совест, но пред сè обврска како човек да упатам јавна благодарност до секој еден од вас кој се жртвува себе, својот живот и судбината на своите семејства за да ги спасите нашите животи и животите на нашите семејства“, стои во ораќањето на Мицкоски.

Претседателот на ВМРО-ДПМНЕ воедно посочува дека писмото нема политичка заднина туку е само израз на неговата искрена волја јавно да каже „благодарам“.

„Вашиот деноноќен труд спасува животи, и додека за време на полицискиот час секој од нас е дома со семејствата, вие сте на работните места и помагате. Не може човек, а да не се поклони кон величенственото дело кое го правите за нашата земја и овој народ, со чест и сила која нè прави горди. Во моите мисли се луѓето во белите мантили, како и полицајците, оние кои го одржуваат редот и мирот“, нагласува Мицкоски.

Како што вели тој, доаѓа време кога секој ќе се соочи со грешките кои ги направил, но делото на лекарите и сестрите кои голораки се борат против пандемијата не смее и не треба да се заборави.

„Докторите и сите здравствени работници треба да знаат дека не се сами. Јас како лидер на ВМРО-ДПМНЕ ќе продолжам да лобирам и барам помош која ќе значи подобра опрема за заштита на лекарите. И не само од Унгарија и Словенија, туку ќе го побарам секој број во мојот телефонски именик кој може да помогне и испорача помош за Македонија. Ќе продолжам да се борам со предлози кои ќе значат заштита на здравјето на граѓаните и спас од растечката сиромаштија на народот. И да, целосно свесен дека ќе бидам предмет на сериозен политички линч од Владата и нејзините платени структури, но целосно убеден и подготвен дека правам исправна работа за вистинските херои во оваа битка ќе продолжиме заедно да се бориме, и да, ќе победиме над пандемијата, заедно помагајќи си еден со друг“, се вели во отвореното писмо на Мицкоски.

Во него тој објаснува дека веќе дал насока за изработка на законска уредба која ќе биде поднесена до Владата за парична награда на здравствените работници за месеците март, април и мај. Мицкоски најавува и дека многу скоро, во зависност на степенот на вклученост во борбата, ќе предложи слична мерка и за припадниците на МВР и АРМ.

„Ви се поклонувам Вам јунаци! Ја имате мојата искрена благодарност. Вашето дело нема да биде заборавено“, пишува лидерот на ВМРО-ДПМНЕ на крајот од своето обраќање.