Македонија
Мицкоски: Историската комисија носи одлуки под политички притисок, колку побргу се распушти, толку подобро за нив

Евидентно е дека врз мешовитата историска комисија меѓу Македонија и Бугарија се врши притисок и таа носи одлуки и потпишува документи што се резултат на политички притисок и за тоа немаме никаква дилема, изјави денеска претседателот Христијан Мицкоски од општина Сопиште запрашан од новинарите како ја оценува работата на мешовитата историска комисија.
Мицкоски посочи дека колку побргу комисијата се распушти, толку подобро ќе биде за нив, така барем ќе успеат да си го сочуваат она мало стручно и професионално достоинство што го имаат.
„Се гледа, евидентен е притисокот врз историската комисија. Се гледа евидентно дека таа носи одлуки и потпишува документи што практично се резултат на политички притисок. И тука немаме никаква дилема и мислам дека колку побргу се распушти, толку подобро ќе биде за нив за да го зачуваат барем малку стручното и професионалното достоинство што го имаат. Во спротивно, навистина, и тоа малку што го имаат, ќе го загубат“, рече Мицкоски.
Додаде дека е информиран за брифингот што членовите на комисијата го имаа со новинарите и со општествено активните членови, каде што, според негови информации за кои не сака јавно да ги соопштува со оглед на фактот дека брифингот бил од затворен тип, се работело за лицемерно правдање пред луѓето зошто морале тоа да го направат.
„Информиран сум дека имале некаков брифинг на кој поканиле новинари и општествено активни фактори, информиран сум од тој брифинг приближно, а за што е зборувано, не би сакал сега, бидејќи бил затворен брифинг, јавно да соопштувам, но можам да заклучам врз основа на таа информација што ја имам дека е лицемерно и е правдање пред луѓето зошто морале тоа да го направат. Но, евидентен е политичкиот притисок и мојот апел до нив е – колку што може побргу да си поднесат оставка и ја напуштат, толку подобро ќе биде за нив“, истакна Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
УЈП со повик за исполнување на ДДВ обврските: евидентирана е загрижувачка состојба

Управата за јавни приходи информира дека заклучно со 25 јули 2025 година евидентирана е загрижувачка состојба во однос на исполнувањето на обврските поврзани со данокот на додадена вредност (ДДВ).
„Според последните податоци: не се поднесени ДДВ-пријави од 142 месечни и 2.134 тримесечни обврзници. Пријавен, но неплатен ДДВ-долг е евидентиран кај 1.326 месечни и 7.748 тримесечни обврзници.
Директорката на Управата за јавни приходи, Елена Петрова, со порака: „Непочитувањето на законскиот рок е сериозен прекршок. Сите обврзници кои не поднеле ДДВ-пријава или не го платиле ДДВ-долгот се повикуваат итно да постапат согласно законските прописи. Даночната дисциплина не е избор, туку законска обврска и одговорност на секој граѓанин и компанија, темел за функционална држава.“
Управата за јавни приходи, како што додаваат во информацијата, веќе доставила персонализирани известувања до сите ДДВ-обврзници кои имаат пријавен, а ненаплатен долг за соодветниот даночен период.
„Преку координирано постапување и интензивна комуникација со даночните обврзници и со сметководителите, се спроведува целосен сет активности и мерки — со цел да се избегнат блокади на сметки и дополнителни трошоци за присилна наплата. За секој ден на задоцнување, се пресметува камата во износ од 0,03% од преостанатиот долг. По доставата на опомените, управата ќе пристапи кон присилна наплата кај сите обврзници кои нема да го подмират долгот доброволно. Со цел навремено информирање и исполнување на обврските, како и обезбедување солидна даночна историја, УЈП останува во постојана комуникација со сите релевантни страни“.
Македонија
Владата донесе одлука за промена на таблиците на службените возила и отворање на конзулат во Корча

Владата на денешната 97 седница донесе одлука сите државни институции да ги променат регистарските таблици на службените возила со новите таблици со боја најдоцна до 15 септември 2025 година. Оваа одлука е во насока на уште едно реализирано ветување пред граѓаните со цел поголема отчетност, транспарентност и ставање крај на злоупотребите кои со биле пракса во минатото, соопшти владината служба.
Дополнително, Владата на предлог на Министерството за надворешни работи и надворешна трговија донесе одлука за отворање на генерален конзулат во Корча со јурисдикција во целиот регион. „Граѓаните мора да имаат брз и ефикасен сервис и услуги, поддршка за културни, образовни и економски врски.
Владата продолжува со конкретни мерки и политики кои имаат за цел да ја потврдат вистинската грижа за подобрување на стандардот и враќање на довербата на граѓаните во институциите“.
Македонија
Со запален факел се обидел да подметне пожар во Струмица: под истрага едно лице за загрозување на општата сигурност

Јавен обвинител од Основното јавно обвинителство Струмица донесе Наредба за спроведување истражна постапка против едно лице за обид да изврши – Тешки дела против општата сигурност од член 292 став 1 во врска со член 288 став 1 од Кривичниот законик.
Осомничениот вчера попладне, преку една социјална мрежа, се заканил на лице од Струмица дека ќе му ја запали викендицата, а потоа се обидел заканите да ги реализира.
На локацијата брана Водоча се обидел да подметне пожар и да предизвика поголема имотна штета. Со запален факел од хартија и текстил ги запалил гредите на натстрешницата, кои започнале да чадат и да горат. Со тоа предизвикал ризик од пожар не само на објектот, туку и на повеќе други викенд-куќи и на нискостеблеста и високостеблеста вегетација во непосредна близина.
Поради опасност од бегство и можност да го повтори односно да го доврши делото, јавниот обвинител до судијата на претходна постапка достави предлог за определување мерка притвор.