Не треба да ги обвинуваме домаќинствата затоа што тие немаат алтернатива, за жал, никој до сега не им обезбедил алтернатива, а кога би имале, тогаш третирањето на темата би било поинакво и работиме на тоа да обезбедиме алтернатива за домаќинствата, изјави премиерот Христијан Мицкоски денеска на надзорната расправа во Собранието за аерозагадувањето.

Мицкоски додаде дека најчесто таа алтернатива е централното греење, а во моментот само дел од Скопје има таков начин на затоплување преку централното греење и има индивидуални обиди во општини во кои се инсталираат гасни котли за затоплување на јавни објекти.

„Но нема далечинско централно затоплување на домаќинствата и можеби тоа е причината зошто луѓето користат најчесто фосилни горива, но не ретко и користат практично сè. Од прегорено масло, преку отпадни гуми, стар мебел и покуќнина за да може да си ги затоплат своите домови. Тоа може да се надмине само на еден начин – ако се реализираат овие проекти и ако се работи на свесноста на сите фактори во општеството. Во годините што следуваат некои од овие проекти за дел од општините ќе се реализираат и ќе обезбедат почиста и поздрава животна средина“, потенцира премиерот Мицкоски.

Тој додаде дека исто така во таа насока се субвенциите за инсталирање ефикасни котли на гас во јавни објекти – топлинските и геотермалните пумпи.

„Како Влада се заложивме и сме во напредна фаза на деблокирање заем од Светската банка да бидеме пријателска Влада кон околината преку реконструкција на јавните објекти. Многу работи се случуваат и ќе продолжат да се случуваат“, изјави Мицкоски.