Македонија
Мицкоски: Точно знаеме кои се криминалците од Арачиново, по смената на власта ќе одговараат

Точно знаеме кои се криминалците од Арачиниво кои пред неколку дена нападнаа и избркаа полицајци кои си ги извршуваа работните активности и ќе оставиме на институциите да си ја завршат својата работа, рече претседателот на ВМРО-ДПМНЕ, Христијан Мицкоски , запрашан за коментар по вчерашната констатација на Министерството за внартешни работи, дека полицајците не биле нападнати туку дека тие не си ја извршиле работната задача, по што против нив ќе бидат покренати дисциплински постапки.
Мицкоски посочи дека уште од првиот ден после промената на власта и преземањето на раководењето на институциите, вклучително и на МВР, од страна на ВМРО-ДПМНЕ, овие лица и нарко банди кои сите ги знааат, ќе бидат изведени пред лицето на правдата и ќе одговараат.
„Ќе оставиме институциите да си ја завршат својата работа, а првиот ден кога ние ќе ги превземеме институциите ќе видите точно за кои луѓе станува збор и тие луѓе ќе бидат изведени пред лицето на правдата. Еве, јас ви ветувам, држетеме за збор. Точно знаеме кој се луѓето, кои возила ги возат, како изгледаат, со што се занимаваат, каде се движат и што прават. Првиот ден кога ВМРО-ДПМНЕ ќе ги превземе институциите и ќе го превземе Министерството за внатрешни работи, еве ви ветувам дека тие луѓе, лично, пред вас ќе бидат изведени и пред лицето на правдата“,
Мицкоски одговараше на прашања за време на денешната акција насловена „Отворен ден на општините – Твојата идеја за промени“, каде што граѓаните предлагаат идеи за реализација на проекти кои ќе бидат вклучени во општинските буџети за следната година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ОПМ: Треба алатка за споредување на цените на производите за граѓаните да знаат каде можат да ги купат поевтино, објавените списоци не се доволни

По објавувањето на списоците со цени на сите производи во маркетите, неопходно е да се направи нова алатка која на потрошувачите ќе им овозможи да ги споредуваат цените на исти производи во различни маркети за да откријат каде им е најевтино да пазаруваат. Ваков став има претседателката на Организацијата на потрошувачи на Македонија (ОПМ), Маријана Лончар-Велкова. Кај нив засега нема поплаки од граѓани за непрегледно објавените цени на производите во маркетите но сметаа дека начинот на кој цените на производите сега се објавени е збунувачки.
„Ако некој има намера да купи пет или шест производи треба во сите тие списоци на производи што ги објавуваат да ги бара баш тие производи, да оди од маркет во маркет онлајн за да може да ги најде. Кога би имале една компаративна алатка тоа би одело многу брзо. Сега со вештачката интелигенција би можело и побрзо да се развие, да биде онлајн и да биде унифицирано. Сега не е унифицирано. Немаме по групи на производи па по видови и така натаму, секаде е различно и луѓето немаат ни време ни можност да споредуваат. Инаку идејата е добра ама треба таа идеја уште да се разработи. Кај нас има проблем што идеите ќе се дадат, се ќе биде добро меѓутоа не се развиваат, ова не е готово, ова е само почеток. Треба да се направи една алатка за компаративна споредба на производите каде може да се купат поевтино, а трговците да имаат меѓусебна конкуренција“, рече Лончар – Велкова одговарајќи на новинарски прашања за време на експерсткиот форум во рамки на проектот „Јакнење на правата на потрошувачите во финансиските услуги“.
Заменик-министерот за економија и труд, Марјан Ристески засега не може да каже дали објавените цени се прегледни или не и најави дека тоа ќе го сублимираат еден месец по имплементацијата на законската обврска за објава на цените а производите.
„Можеби ќе одиме на една генерална и општа веб-страница која ќе биде понудена понатаму или збирна информација која ќе дава подобри резултати за да можат граѓаните транспарентно да ги контролираат цените, онаму каде што ќе купуваат“, рече заменик-министерот Ристески.
Трговците добија законска обврска на веб-страниците да ги обавуваат цените на сите производи што ги нудат од 18 април оваа година, а мерката ја предложи лично премиерот Христијан Мицкоски за са се заузда неконтролираниот раст на цените.
Македонија
За 1 мај локален краткотраен дожд

Времето за 1 мај, четврток, ќе биде претежно сончево со услови за краткотраен локален дожд и грмежи, информира УХРМ.
Утре ќе се задржи сончево и релативно топло време со мала до умерена облачност.
Во четврток попладне и во петок ќе има услови за локален краткотраен дожд и ретки грмежи.
Ќе дува умерен северен ветер. Во деновите од викендот ќе биде стабилно, сончево и топло со мала до умерена облачност, а од почетокот на следната седмица се очекуваат повремени
врнежи од дожд и појава на грмежи.
Македонија
Минчев ја истакна важноста од носење закон за организација и работа на органите на државната управа

Министерот за јавна администрација, Горан Минчев, денеска оствари средба со претставници на СИГМА, заедничка иницијатива на ОЕЦД и Европската унија, која обезбедува стручна поддршка за реформите во јавната администрација во земјите од Западен Балкан и пошироко.
На средбата се разговараше за тековните и идните активности во областа на јавната администрација, со посебен фокус на модернизацијата и професионализацијата на административните служби.
Министерот Минчев ги презентираше клучните реформски приоритети на Министерството, особено истакнувајќи ја важноста на креирањето и носењето на Закон за организација и работа на органите на државната управа (ЗОРОДУ), како основа за поефикасна, поусогласена и одговорна јавна администрација.
Претставниците на СИГМА ја поздравија определбата на Министерството кон суштински реформи и ја истакнаа силната поддршка за донесувањето и имплементацијата на Законот за организација и работа на органите на државната управа, нагласувајќи дека овој закон претставува клучна алатка за обезбедување на функционална, деполитизирана и транспарентна државна управа, во согласност со европските стандарди.
Средбата заврши со заедничка посветеност за продолжување на соработката и координирана работа во насока на градење современа и граѓански ориентирана јавна администрација, како дел од европскиот пат на Република Македонија.