Последна шанса да покаже Владата минимум почит кон граѓаните е итно да интервенира со платите. Потребно е покачување на минималната плата на 500 евра бидејќи ова ќе поттикне раст на сите плати. Ако минималната плата не се зголеми на 500 евра, тоа ќе значи дополнително влошување на животот за илјадници семејства, посочи денеска на прес-конференција потпретседателката на СДСМ, Каја Шукова.

Според Шукова, Владата не презема никакви конкретни мерки за да ја подобри економската состојба.

-Економските индикатори и факти за животот во Македонија зборуваат јасно – животниот стандард на граѓаните е во постојан пад, додека Владата не презема никакви конкретни мерки за да ја подобри економската состојба. Не само што не презема ништо, туку и не прифаќа ништо понудено до СДСМ, а тоа се докажани мерки за намалување на трошоците за живот. Фактите покажуваат дека цените растат неколкукратно побрзо од платите и граѓаните од ден во ден можат да си дозволат сè помалку, посочи Шукова.

Таа додаде дека струјата е поскапена за 20 до 30 проценти, парното за 5 проценти, а цените на основните прехранбени производи се зголемени за 30 проценти.

-Едноставно економските показатели се брутално точни и нема да се случи никаков раст на економијата, за жал. Индустриското производство паѓа четири месеци по ред, додека извозот е намален за 5,9 проценти. Откако пропаднаа сите кошнички, новогодишни и неновогодишни, јасно е дека Владата нема стратегија за спречување на расотот на цените. Прашање е дали воопшто и сака, вели Шукова.

Таа потенцира дека СДСМ бара и поддржува покачување на минималната плата на 500 евра бидејќи ова ќе поттикне раст на сите плати.

-Оваа стратегија која СДСМ доследно ја спроведуваше додека беше на власт даваше резултати. Благодарение на овој пристап, со СДСМ беа потребни само две минимални плати да се покрие потрошувачката кошничка, а денес со ДПМНЕ се потребни три. Ако минималната плата не се зголеми на 500 евра, тоа ќе значи дополнително влошување на животот за илјадници семејства, кои веќе едвај врзуваат крај со крај. Покачување на платите е единствениот начин да се спречи понатамошното осиромашување на граѓаните и да се овозможи економски напредок. Без оваа мерка, стотици илјади работници ќе продолжат да работат за плата што не е доволна ниту за покривање на основните трошоци, додаде Шукова.

Без електрична енергија утре ќе бидат корисниците од делови од општините Кисела Вода и Чучер Сандево, а без вода дел од улицата „Јани Лукровски“ во Општина Гази Баба.

Како што соопштија од Регионалниот центар за управување со кризи на Град Скопје, по добиеното известување од ЕВН, поради планирани зафати во електро дистрибутивната мрежа, утре од 09:00 до 12:00 часот без струја ќе бидат корисниците од улицата „Христо Таарчев“ крак – 24, а од 09:00 до 15:00 часот, корисниците од селото Бродец.

Исто така, поради промена на затворач од водоводна мрежа на улицата „Јани Лукровски“ број 10, утре од 08:30 часот до завршување на интервенцијата без вода ќе останат корисниците од дел од истата улица.

Во март минималната плата треба да биде повисока за 1.800 денари, што значи дека платата би изнесувала нешто над 24 илјади денари. Синдикатите бараат зголемување на минималната плата од 30 илјади денари поради зголемените трошоци за живот. Предлог е Владата да ги субвенционирала придонесите од 3.000 до 6.000 денари во период од една година. Владата кажа дека ќе го почитува она што ќе го договорат работодавачите и синдикатите.

Минималната плата ја примаат повеќе од 20 илјади вработени, од кои најголемиот дел работат во мали и микро фирми. Работодавачите сметаат дека минималната плата може да оди и над 500 евра, доколку за тоа се обезбеди реална основа, односно доколку се зголеми продуктивноста.

Висината на минималната плата не може да биде пониска од 57 отсто од висината на просечно исплатената нето-плата во државата, велат синдикалистите.

Опозициската СДСМ вчера критикуваше дека Владата не се грижела за работниците и нивниот стандард. Најавуваат законска иницијатива за минималец од 500 евра.

„Ние во наредниот период ќе продолжиме со политики што се поддршка за животниот стандард на граѓаните, и ќе поднесеме законско решение за покачување на минималната плата на 500 евра“, велат од СДСМ.

Синдикални организации на Македонија  вчера побараа од Владата и од Министерството за енергетика да преземеат мерки за да се реши проблемот со високите сметки за струја за кои се жалат граѓаните и побараа да се стави ред во читањето на броилата.

Се очекува овие дилеми да бидат решени на наредната седница на Економско-социјалниот совет.