Министерот за надворшени работи, Никола Димитров, имал кус неформален разговор со поранешниот нерезидентен амбасадор на Латвија, Албертс Сарканис, но тој не бил поврзан со „Рекет“,  велат од Министерството за надворешни работи.

Реакцијата следува кога претходно денеска, почесниот конзул на Латвија, бизнисменот Зоранчо Митревски, рече дека обвинетиот во „Рекет“, Бојан Јовановски, му барал пари по што тој преку амбасадорот го известил Министерството за надворешни работи.

Од МНР, сепак, во врска со сведочењето велат дека Димитров со Сарканис се сретнал на 18 октомври минатата година и нивниот кус разговор на дипломатски коктел немал допирна точка со „Рекет“.

Амбасадорот за време на тој неформален разговор, велат од МНР, точно е дека го спомнал почесниот конзул на Латвија, бизнисменот Зоран Митровски, ама само за да се пожали дека тој во медиумите бил спомнуван како осомничен во отворена истрага.

Темата за „Рекет“ никогаш не е спомната, велат од МНР.

„Димитров, сметајќи дека евентуални коментари во таа насока би биле злоупотреба на дипломатскиот и конзуларен статус, само го информирал амбасадорот дека во нашата држава медиумите се слободни и дека Владата не може да влијае во работата на медиумите, ниту за почесни конзули ниту за министри, и така завршува разговорот. Подоцна, според протоколот, кабинетот на МНР бара средба со почесниот конзул за да се добијат дополнителни информации, но потенцираме – токму конзулот немаше интерес за официјална средба и никогаш не дојде на состанок“, велат од МНР.

Од Министерството повикуваат веднаш да се престане со ширење лаги, кои се во функција да му наштетат на угледот и интегритетот на Никола Димитров преку негово поврзување со афера со која тој нема никаков допир, што, се разбира, може да е и нивна цел, а кои влијаат негативно и на државните интереси и истовремено го подриваат и самиот судски процес.