Македонија
МОН ги објави конкурсите за ученички стипендии – воведени нови категории за техничките струки
Министерството за образование и наука информира дека од вчера почна аплицирањето за стекнување на правото на ученичка стипендија во учебната 2020/2021 година. Конкурсите се објавени на интернет-страницата на МОН, а крајниот рок за поднесување на документите е 9.11.2020 година.
Покрај вообичаените категории на стипендии што беа достапи досега: стипендии за социјална поддршка на ученици, стипендии за талентирани ученици, за талентирани ученици спортисти, за деца без родители, за ученици со посебни потребни, за ученици запишани во ДСУ „Спортска академија“, стипендии за ученици Роми и за ученици од угостителско-туристичката струка, за оваа учебна година Министерството за образование и наука обезбеди и неколку дополнителни категории на стипендии за учениците од средното стручно образование.
Имено, можност за аплицирање за стипендија имаат и учениците од машинската, земјоделско-ветеринарната, текстилно-кожарската, електротехничката и градежно-геодетската струка. Изборот на овие струки е направен врз основа на истражување за потреба од вештини на пазарот на трудот во Република Северна Македонија за 2020 година, спроведено во соработка со Агенцијата за вработување. Резултатите покажаа исклучителен недостиг на одреден тип кадар, особено за потребите на приватниот сектор, како машински техничар, градежен техничар, електротехничар, келнер, готвач, ракувач со градежни машини, металостругар и заварувач, така што стипендиите се дополнителна стимулација на веќе запишаните ученици максимално да се заложат во градењето на сопствените капацитети и стручни компетенции, но и мотив за избор на средното стручно образование од страна на идните генерации средношколци.
Новина во процесот на доделување ученички стипендии оваа година е тоа што на сите кандидати им се дава можноста да изберат својата апликација заедно со сите потребни документи да ја достават или хартиено преку архивата на МОН или, пак, да аплицираат електронски преку интернет-платформата www.konkursi.mon.gov.mk. Кандидатите што ќе аплицираат електронски немаат обврска да ги достават документите хартиено и обратно – учениците што поради каква било причина немаат можност или нема да изберат да аплицираат електронски, ги доставуваат документите само хартиено во МОН, а апликацијата ќе се смета за валидна и ќе биде предмет на разгледување од надлежните комисии.
Дополнително, покрај конкурсите за доделување ученички стипендии, информираме и дека во тек е конкурс за поврат на средства за купен музички инструмент за учебната 2020/2021 година, со кој на 25 ученици, запишани во државните средни училишта во кои се реализираат планови и програми за музичка уметност, а кои ќе ги исполнат конкурсните услови, Министерството за образование и наука ќе им изврши поврат на дел од средствата за купен музички инструмент во висина од 75 % од исплатените средства, но не повеќе од 100.000 денари од инструмент. Аплицирањето трае 60 дена од денот на објавата на конкурсот.
Документите за аплицирање по однос на конкурсите се достапни на следниот линк. За какви било прашања поврзани со аплицирањето за остварување на правото на стипендија, односно финансиска поддршка за купување музички инструмент, Министерството за образование и наука им стои на располагање на учениците. Контактите на вработените во Секторот за ученички и студентски стандард, како и на сите сдруги вработени во МОН се објавени на овој линк, а официјалната електронска адреса на Министерството е [email protected].
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Делови од Центар, Зелениково и Ѓорче Петров денеска без струја
Од ЕВН Македонија АД известуваат дека денеска без електрична енергија ќе останат:
– во периодот од 08.30 до 10.00 часот, дел од корисниците од улиците Самоилова и Јоаким Крчовски, како и објектот на Музејот на Современа Уметност, општина Центар;
– во периодот од 08.30 до 15.00 часот, корисниците од селата Зелениково, Ново Село, Страхојадица и Смесница, општина Зелениково;
– во периодот од 09.00 до 15.00 часот, корисниците лоцирани околу ул. Австралиска бр. 5 во населба Даме Груев, општина Ѓорче Петров.
Македонија
Променливо облачно, претпладне со повремен локален дожд
Променливо облачно, претпладне со повремен локален дожд. Ќе дува слаб до умерен, наместа долж Повардарието повремено засилен ветер од северен правец. Минималната температура ќе биде во интервал од 6 до 11, а максималната ќе достигне од 11 до 17 степени.
Во Скопје, претежно облачно со повремени врнежи од дожд. Ќе дува слаб до умерен ветер од северен правец. Минималната температура ќе се спушти до 9, а максималната ќе достигне до 16 степени.
Времето во наредните денови
Утре во претпладневните часови ќе има локални врнежи од дожд, кои во текот на денот насекаде ќе престанат. Ќе дува умерен, а долж Повардарието засилен северен ветер. Потоа до крајот на неделата времето ќе биде стабилно и суво со пониска утринска температура.
Македонија
Ѓорѓиевски отпушти 500 вработени
Градоначалникот на Град Скопје, Орце Ѓорѓиевски, објави дека се отпуштени 500 вработени од претпријатијата на Скопје затоа што се месеци, дури и години, не оделе на работа.
„500 лица до денес, се отстранети од работа од претпријатијата во градот Скопје. Тоа се лица кои се платени од парите на скопјани, но не оделе на работа со месеци, дури и години“, објави Ѓорѓиевски.
Тој најави дека секој кој чесно си ја работи работата, ќе биде награден, а оној што не работи ќе биде казнет.
„Тука, нема да има толеранција, а ќе има и одговорност! Секој оној што чесно си ја работи својата работа ќе биде награден, а оној што не работи – ќе биде санкциониран. Ред во Скопје, мора да има! Она што е платено со парите на граѓаните јас мора да го заштитам“, напиша Ѓорѓиевски на „Фејсбук“.

