Македонија
Муртезани се сретна со еврокомесарот Вархељ: нагласена цврстата посветеност на Македонија кон процесот на пристапување кон ЕУ

Министерот за европски прашања на Северна Македонија, Орхан Муртезани, со средба со комесарот за европска соседска политика и преговори за проширување на Европската Унија, Оливер Вархељ, утрово ја почна својата прва работна посета на Брисел.
Разговорите беа фокусирани на тековниот евроинтегративен процес и на чекорите што претстојат за понатамошен напредок. Министерот Муртезани ја нагласи цврстата посветеност на Северна Македонија кон процесот на пристапување кон ЕУ, како и подготвеноста на земјата да се усогласи со стандардите на Унијата. Комесарот Вархељ го поздрави придонесот на Владата во контекст на интензивните подготовки за планот за раст на ЕУ за земјите од Западен Балкан, истовремено потенцирајќи ја потребата од брзо преминување на следната фаза – исполнување на одредниците (бенчмарк) за отворање на првиот кластер. Тој нагласи дека ЕУ останува посветена на поддршката на Северна Македонија во надминување на преостанатите предизвици на нејзиниот европски пат, особено преку техничка и финансиска помош за продлабочување на институционалните реформи, извести Министерството за европски прашања.
Една од централните теми на состанокот беа и уставните амандмани за кои Муртезани информира дека е потребно да се создаде соодветна политичка клима и јавна поддршка за овие промени, а истовремено ја нагласи подготвеноста на Владата за конструктивен дијалог со Бугарија.
Беа разменети мислења и информации и за планот за раст на ЕУ за Западен Балкан, кој претставува клучен механизам за зголемување на инвестициите и зајакнување на економската отпорност на земјите од регионот. Вархељ ја поздрави активната улога на Северна Македонија во регионалните иницијативи и нејзиното усогласување со стратешката агенда на ЕУ за 2024 – 2029 нагласувајќи ја континуираната европска поддршка, особено во области што се клучни за трансформацијата на Северна Македонија: владеење на правото, реформи во јавната администрација и борба против корупцијата. Муртезани истакна дека е важно овие реформи не само да се имплементираат туку и да бидат длабоко вкоренети во општествените секојдневни текови.
Во однос на добрососедските односи, Муртезани повторно ја нагласи посветеноста на Северна Македонија кон нивно зајакнување и продлабочување истакнувајќи дека овие односи се фундаментални за регионалната стабилност, економскиот просперитет, но и за кредибилитетот на Унијата. Министерот Муртезани ја реафирмира подготвеноста за решително дејствување во контекст на следните чекори поврзани со европското досие на земјата, суштински работејќи на реформите како би се обезбедил стабилен напредок во исполнувањето на стратешката цел на Владата – членство во Европската Унија, се наведува во соопштението на Министерството за европски прашања.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Герасимовски повикува на концерт, ВМРО-ДПМНЕ му ги брои нереализираните проекти: Центар не доби парк и административна зграда кај ПУИК

Откако утрово градоначалникот на Општина Центар, Горан Герасимовски ги повика скопјани на концерт со Александар Тарабунов вечерва, ВМРО-ДПМНЕ во соопштение до медиумите го нарече шампион по нереализирани ветувања и ги наброја нереализираните проекти. Градоначалникот, пак, одговори на предизвикот со објаснување дека работи посветено, а не кампањски само пред избори.
„Очигледно е дека општина Центар не доби парк и административна зграда кај ПУИК, не доби парк со игралиште кај Клинички, ниту пак кај куќата на Есма на Кале. Тоа е билансот на визионерството на Герасимовски. На граѓаните не им е потребно експериментирање со импровизирано управување.Центарци се сведоци на спори или непостоечки инфраструктурни проекти. Многу улици и тротоари останаа неуредени, небезбедни и неадаптирани за лица со посебни потреби. Со таков кандидат за градоначалник капиталните проекти се или заглавени или нереализирани.
Нереализирани проекти кој тој напразно ги ветуваше се и градинка во Маџир Маало, градинка во Клинички центар, воспитно-образовен центар во Парк 1 со градинка и училиште, но резултатот е немање градежни активности, ни почеток, ни рокови, само илузии.
Урбаниот хаос остана, а тој ветуваше ред, но донесе уште поголем метеж, наместо решенија центарци добија хаос. Не се обезбеди ниту монтажен паркинг во Дебар Маало и во Пролет, ниту гаража кај Клинички центар, а уште помалку катна гаража спроти ПУИК, само се обезбеди нарушен сообраќај, фрустрации и изневерени граѓани.
Наместо вистинско вклучување на граѓаните во процесите, често владее молк и селективна комуникација, се промовираат ситни потези како големи успеси, додека реалните проблеми тотално се игнорираат.
Евидентно е дека тој е без јасна визија за развој, а бара повторно доверба од граѓаните, која не ја ни стекнал.
Центар под Герасимовски е пример за проекти на хартија и реалност во распад. Четири години магла во Центар и застој под негово водство“, стои во соопштението од ВМРО-ДПМНЕ.
Градоначалникот Герасимовски веднаш реагираше. И тој преку соопштение до медиумите кажа што сработил.
„Веќе почнуваме со реализација на барањата што произлегуваат од центарци. Ниту еден градоначалник не смее да оди кај граѓаните, да вети нешто и потоа да исчезне и да се појави повторно само пред избори. Работиме да надминеме одредени предизвици со кои се соочуваат жителите и уште летово да ја завршиме таа работа. Вистинската работа се гледа секој ден, на улица, во маало, а не на билборд. Во еден мандат ја изградивме од темел најубава градинка во целата држава кадешто се згрижуваат деца од населбите Пролет и Маџир маало. Во моментов се реконструира спортската сала „Работнички“ којашто беше со децении оставена да се распаѓа. Работиме посветено, домаќински и транспарентно“, вели градоначалникот Герасимовски и потсетува дека караванот „Се гледаме во маало“ продолжува и во следните денови со секојдневни посети во различни населби од Општина Центар, со цел заедничко планирање на локалниот развој, директна комуникација и градење на транспарентна и отчетна локална власт.
Македонија
„Ве чекам во 20 часот, на плочникот кај Градски ѕид“, Герасимовски повика на концерт

Градоначалникот на Општина Центар, Горан Герасимовски, ги повика сите скопјани, вечерва да бидат дел од културната манифестација „Центарска симфонија“ што ќе се одржи на плочникот кај Градски ѕид (Клуб на новинари, зади Соборниот храм) со почеток во 20:00 часот.
Александар Тарабунов и камерниот оркестар вечерва ќе ги интерпретираат најпознатите мелодии од македонската и светската кинематографија, специјално аранжирани во ново, симфониско руво. Меѓу нив се и култните музики од „Исправи се Делфина“, „До Балчак“, како и новата песна на музичката ѕвезда Тарабунов „Заедно“, која за првпат ќе биде изведена со камерен оркестар.
„Оваа вечер ја посветуваме на музиката која нè обединува, Центар повторно станува сцена на културното доживување. Повелете сите, со пријателите, со семејствата, заедно да уживаме во спојот на класичното и модерното, на звуците што раскажуваат приказни. Музиката е најубавиот начин да се сплотиме, Ве поканувам на добра музика и убава летна саботна вечер. Ве чекам во 20 часот, на плочникот кај Градски ѕид“, вели Герасимовски.
Влезот е слободен за сите граѓани. Настанот е во организација на Општина Центар, во партнерство со МГ Мјузик продукција.
Македонија
Филипче на конгрес на СПД во Берлин: Средба со германскиот вицеканцелар Клингбајл

Претседателот на Социјалдемократскиот сојуз на Македонија, Венко Филипче, денеска, ќе присуствува на конгресот на германската Социјалдемократска партија (СПД), кој под слоганот „Промената започнува со нас“ се одржува во Берлин, Сојузна Република Германија, соопшти утрово СДСМ.
Во рамки на конгресот претседателот Филипче ќе има средба со актуелниот вицеканцелар на Германија и сојузен министер за финансии, Ларс Клингбајл кој воедно е и ко-претседател на СПД. Предвидени се и билатерални средби со европски политичари и функционери присутни на конгресот.
На конгресот, на кој, меѓу другото, ќе се избира и новото раководство на СПД, ќе присуствуваат истакнати актуелни германски политичари и функционери, како и претседатели на социјалдемократски партии од Европа.
Поканата за присуство на Филипче на овој конгрес од СДСМ ја сметаат за израз на заедничката заложба за европска иднина, социјална правда и регионална соработка, засновани на вредностите на социјалдемократијата – еднаквост, солидарност и демократија.