Македонија
Муцунски: Изучувањето и промовирање на македонскиот јазик треба да претставува мисија на секој од нас

Министерот за надворешни работи и надворешна трговија, Тимчо Муцунски, денеска се обрати на свеченото отворање на 57-мата Летна школа на Меѓународниот семинар за македонски јазик, литература и култура при Универзитетот „Св. Кирил и Методиј“ од Скопје, кој под мотото „Македонистички гордорек“ се одржува во Охрид.
Во рамки на своето обраќање, Муцунски потсети дека повеќе од половина век, Универзитетот „Св. Кирил и Методиј“ преку Меѓународниот семинар за македонски јазик, литература и култура ја афирмира македонистиката, македонското писмо и ги запознава учесниците со непресушниот извор на вредност која ја поседува македонскиот литературен јазик.
„Сето ова има исклучителна дипломатска димензија и интерес, поради можноста да се чујат најновите истражувања од областа на македонскиот јазик и истите да бидат споделени како пред македонската, така и пред странската јавност,“ истакна Муцунски.
Тој нагласи дека негувањето, изучувањето и промовирањето на македонскиот јазик треба да претставува мисија за секој од нас, затоа што јазикот и културата се најголемото богатство на еден народ и претставуваат стожер на една држава.
Говорејќи за активностите на министерството, министерот Муцунски истакна дека Министерството за надворешни работи и надворешна трговија има плодна долгогодишна соработка со Универзитет „Св. Кирил и Методиј“ и нагласи дека таа ќе се продлабочува и проширува во следниот период.
Пред присутните, министерот Муцунски подвлече дека македонистите, научните работници и лекторите се македонските амбасадори во светот.
„Вие сте најхрабрите бранители и горд репрезент на нашата земја на светска рамка. Токму затоа, вашето присуство на 57-мата Летна школа е повеќе од значајно во обединувањето, продлабочувањето и славењето на македонистиката во светот,“ заклучи министерот Муцунски во своето обраќање.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Мециновиќ: Владиниот кандидат се сретна со „Вреди“ и ја доби нивната поддршка, јас се среќавам со Скопје

Кандидатот на Левица за градоначалник на Скопје, Амар Мециновиќ кој влезе во вториот круг на локалните избори се огласи откако неговиот против кандидат Орце Ѓорѓиевски од ВМРО -ДПМНЕ кажа дека Мециновиќ во првиот круг имал поддршка од ДУИ, а со повикот за поддршка од СДСМ, нивната коалиција станала јавна.
„Денеска мојот противкандидат зборува за тоа од каде ми доаѓале или ќе ми дојдат гласовите и почнува да зборува за некоја теорија на заговор“, вели Мециновиќ.
„Владиниот кандидат се сретна со „Вреди“, ја доби нивната поддршка, јас се среќавам со Скопје и ќе продолжиме да се среќаваме со скопјани. Затоа што скопјани се охрабрени и во се поголем број ќе излезат во вториот круг. Овој контингент кој го создадовме само ќе расте“, додава тој.
Македонија
„Подадена рака“: Димитриевски добива поддршка од „Вреди“ за вториот круг од локалните избори во Куманово

Подадена рака. Денес остварив средба со новиот градоначалник на Чаир, Изет Меџити, Организациониот секретар на Алтернатива, Башким Муртези и Пратеникот Даниел Стојчевски, објави на социјалните мрежи лидерот на ЗНАМ, Максим Димитриевски.
„Во топлиот и искрен разговор од претставниците на Коалициониот партнер Влен добив искрена и силна поддршка за вториот круг во Куманово, поддршка која ја отсликува мултиетничката и мултикултурната реалност на нашиот град, која дава дополнителна енергија и мотив да продолжиме напред во остварување на проекти во интерес на сите граѓани на Куманово.
Благодарам на сите кои ја препознаваат и поддржуваат визијата за иднината на Куманово и Македонија.
Заедно ќе продолжиме да го градиме нашиот град и да работиме во интерес на наши Кумановчани“, пишува Димитриевски.
Македонија
Кандидатите за градоначалници на Скопје се договорија: ТВ дебата во вторник

Кандидатот на партијата Левица за градоначалник на Скопје, Амар Мециновиќ денеска преку социјалните мрежи извести дека прифаќа дебата со противкандидатот од ВМРО-ДПМНЕ, Орце Ѓорѓиевски.
„Дебата во вторник на Канал 5, па да си дочекаме уште повеќе дебати. Јас и мојот противкандидат во овој круг означуваме потенцијална промена на политичките генерации во Македонија, релативно млад дуел за Скопје. Затоа, следниот вторник на дебата ќе може да се заклучи кој претставува нова визија, a кој ја влече деструктивната политика на минатото во иднината“, напиша Мециновиќ на Фејсбук.
Претходно, тој го повика Ѓорѓиевски на дуел под отворено небо на Школка во Градскиот парк.