Дали министерот за внатрешни работи Тошковкси конечно ќе преземе одговорност за катастрофалното функционирање на МВР и бегството на Груби? Последните информации за бегството на поранешниот прв вицепремиер Артан Груби, каде што „батериите“ на камерите не работеле токму кога тој ја напуштал границата предизвика потсмев од граѓаните. До кога министерот ќе ја замајува јавноста и кога планира да признае дека ова е договорено бегство, прашуваат од СДСМ.

„Како што објави Министерството за внатрешни работи, полициските службеници од граничниот премин „Блаце“ не ги почитувале процедурите, иако за Груби постоело јасно известување „задржи и веднаш извести“. Наместо тоа, тие не го провериле системот, дозволиле возилото да помине без соодветна контрола и не ги регистрирале патниците како што налага законот. Притоа, во критичниот момент камерите „случајно“ не функционирале“, истакнуваат во соопштението.

СДСМ најави дека денес ќе објави сериозни индиции за вмешаност на МВР и Тошковски во целото бегство и нови „случајности“ кои ќе отоворат сомнеж за вмешаноста на МВР во целата работа.

СДСМ, додаваат од оваа партија, ќе продолжи да инсистира на транспарентност, одговорност и функционални институции кои ќе работат исклучиво во интерес на граѓаните.

Паднаа во вода приказните на ДУИ за тоа како тие се залагаат за европски вредности, владеење на правото и правдата. Артан Груби го нокаутира и онака слабиот рејтинг на ДУИ, велта од ВМРО-ДПМНЕ.

Најголем доказ за криминалните дејствија на Груби, според оваа партија, е неговото ставање на црната листа на САД.

„Груби изјави дека е чист како солза а сепак побегна во Косово и се обидува да се пазари со правдата. Али Ахмети, ДУИ и СДС молчат за бегството на Артан Груби.

На површина излегуваат сите криминали, скандали и коруптивни дејствија на функционери и луѓе блиски до врхушките на СДС и ДУИ, а СДС и ДУИ молчат.

Срамно е тоа што се уште СДС и ДУИ не го осудиле бегството на Груби и не го повикале да се врати. СДС и ДУИ да кажат дали го поддржуваат бегството на Груби.

Али Ахмети наместо да го осуди бегството на Груби и јавно да се огради од постапките на Груби и тој замина во посета на Косово.

Толку од европските вредности и агенди на СДС и ДУИ“, истакнуваат од владејачката партија.

Груби, како што додаваат, тврдеше дека е „човек посветен на одбраната на европските вредности“ а нема ниту храброст, ниту морал, ниту смелост да се појави на суд и да се соочи со доказите.

Според ВМРО-ДПМНЕ; СДС и ДУИ молчат а на јавноста и е јасно дека на тој начин го поддржуваат бегството на Груби.

Нагласуваат дека одговорност мора да има и дека во Македонија мора да завладеат правото и правдата и да се унапреди демократијата.

„ДУИ отсекогаш била посветена на отчетноста и транспарентноста на сите нивоа во јавниот живот. Токму поради ова, за време на нашето учество во Владата до мај оваа година, нашите министри предложија прогресивен закон кој воведува строги ограничувања за лица ставени на „црната листа“ на САД поради корупција“, велат од ДУИ.

„Овој закон имаше за цел да ги спречи овие лица да учествуваат на избори и во процесите на јавни набавки – важен чекор за заштита на демократските процеси и јавната доверба.

Сепак, последните настани донесоа бран политички напади кон Демократската унија за интеграција (ДУИ), при што одредени политички актери се обидуваат да ја искористат ситуацијата за свои цели.

Важно е да ја разјасниме вистината со транспарентност и одлучност. И покрај оваа јасна посветеност на отчетноста, предлог-законот беше блокиран во Собранието од страна на ВМРО-ДПМНЕ и ВРЕДИ.

Токму овие актери денес се на чело на нападите против ДУИ, обвинувајќи нè за пропусти во области каде што ние бевме првите кои предложивме конкретни реформи.

Оваа хипокризија е очигледна: тие што го спречија усвојувањето на построги мерки се истите што денес претендираат да имаат морална надмоќ.

Нивните постапки во Собранието ја противречат нивната реторика, поставувајќи сериозни прашања за нивниот кредибилитет и мотиви.

ДУИ не е совршена, ниту пак тврди дека е. Учиме од предизвиците со кои се соочуваме и се трудиме да се подобриме во служба на граѓаните. Сепак, ги отфрламе политичките кампањи мотивирани од двојни стандарди. Нашето досегашно делување зборува само за себе: додека другите избираа да ги блокираат реформите, ние бевме иницијатори и поддржувачи на истите.

ДУИ останува посветена на унапредување на реформите, зајакнување на отчетноста и продолжување на напорите за просперитетно, инклузивно и демократско општество“, се наведува во соопштението на ДУИ.