Македонија
(Видео) Народен правобранител: Нечовечни услови во затворите во Скопје, Струмица и во Куманово

По ненајавените посети на Народниот правобранител на затворите во Скопје, Струмица и Куманово, констатирани се крајно лоши услови за сместување на притворените и осудените лица, сериозен недостиг на професионален и стручен кадар, што влијае на остварувањето на правата на притворените лица во процесот на ресоцијализација.
„Станува збор за нечовечки услови, затворениците одат во тоалет без врата, хигиената е на најниско ниво и на притворените им е ускратено правото на непречена здравствена заштита и остварувањето на други права за време на издржувањето на мерката притвор или казната затвор во казнено-поправните установи“, рече заменик народниот правобранител Васка Бајрамовска.
Таа додаде дека при посетата во 2017 година констатирале повреда на правото на приватност и деградирачка состојба на притворените и на осудените лица, затоа што дел од тоалетите се без врата, па лицата заради обезбедување на некаква приватност мора да закачуваат ќебиња или да се снаоѓаат на друг начин.
Според неа, затекнатите лоши материјални услови, несоодветната опременост на просториите за сместување, влагата и недоволното затоплување, нефункционалниот систем на повикување, се само дел од причините за кои Народниот правобранител препорача итно преземање мерки за санација на овие затвори.
Според Народниот правобранител, од разговорот со притворените во затворите добиле информации исто така дека често се случува притворените лица да бидат навредувани на национална основа, особено припадниците на ромската заедница, како и грубо однесување на претресите од страна на службените лица, на понижувачки и дрзок начин.
Исто така, замерка на Народниот правобранител е недостигот на медицински персонал во затворските установи поради што често изостанува преглед во првите 24 часа при прием на нови осудени, а на лицата сместeни во просториите за изолација не им се вршат секојдневни прегледи од страна на лекарот иако истото е законски задолжително.
„Медицинската заштита во затворите се одвива во услови на недостиг на здравствен и медицински кадар, а забележана е и неопременост на амбулантите со соодветна апаратура и лекови. Во затворите по 20 часот нема обезбедено присуство на здравствен персонал од кој било профил“, рече Бајрамовска, по што додаде дека особено незадоволителна е состојбата во затворот во Струмица, каде што еден доктор од општа пракса и една медициска сестра од Здравствениот дом во Струмица доаѓаат само двапати во неделата по неколку часа.
Виктор Јованов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Родителите од Демир Хисар револтирани: Законот ги принудува учениците на сместување во домови за да добијат превоз

Родители од Демир Хисар изразија незадоволство од измените на законот за средно образование и изразија загриженост за превозот на децата до и од училиште. Тие велат дека со измените, децата мора да аплицираат во училишните домови, а ако бидат одбиени или, пак, не сакаат да престојуваат таму, не им следува превоз.
„После нашето долго талкање по институции кои се засегнати во случајов, мислејќи дека тоа е правиот пат, досега не најдовме решение. Први септември е на прагот и наместо нашите деца да се радуваат што ќе се вратат во школските клупи во средното училиште кое бил нивен избор, тие, а и ние, се соочуваме со банални работи.
Со измените на законот нашите деца принудени се да аплицираат во училишните домови, а ако одбијат не следува превоз, а со тоа се кршат правата на учениците на избор, дали да седат или патуваат, бидејќи средното образование е задолжително. Кога ги запишувавме децата ни беше дадена изјава дека како родители се согласуваме да патуваат, а не да седат во интернат. За преку ноќ сето тоа да се смени и по брза постапка да поднесуваме документи во средношколскиот дом, иако тоа воопшто не го сакаат децата. Ако не се поднесе пријава, не следува превоз, ако се примени, а одбијат да седат, пак не им следува превоз. Едноставно сметаме дека сме уценети, за нешто што сепак е задолжително. Сметаме дека се направени доста неправилности со изборот и критериумите“, се наведува во дописот на родителите.
Велат дека ако едно дете е оддалечено 30 километри од Битола превозот чини 3.500 денари, а домот чини 11.000 денари.
Пример, велат родителите, има ученици, брат и сестра, каде сестрата е примена во домот, а братот не е. Со овие измени, додаваат тие, се прават само дупли трошоци.
Родителите прашуваат зошто воопшто е земена како критериум финансиската состојба на родителите за нешто што треба да го покрие државата.
„За овој проблем се обративме прво кај директорката на домот, со којашто не наидовме на разбирање, и таа не препрати кај градоначалникот на општина Демир Хисар, кој патем воопшто и не е засегнат со превозот на учениците од битолските училишта, но културно не прими и ни вети дека ќе помогне во рамките на можностите. Потоа се обративме и до градоначалникот на општина Битола , кој впрочем и е најзасегнат со превозот на овие ученици, бидејќи средствата за учениците од битолските училишта се праќаат во општина Битола, но таму ни беше кажано дека само ги почитуваат измените на законот. Пуштивме допис и до министерството за образование, до министерката Весна Јаневска, каде што ни беше вратено, навидум со автоматска порака, дека ќе се разгледа и реши проблемот. Министерката во вторникот, 26 август, имала средба со градоначалникот на Битола и кажала нема измени на законот во наша полза. Како родители сметаме дека не се во ред измените на законот, кој патем се направени многу брзо, без претходно истражување и консултација“, велат родителите.
Тие велат дека ниту децата сакаат да седат во домот, ниту пак тие како родители сакааат, бидејќи Демир Хисар не е многу оддалечен од Битола.
„Повеќе не изреволтира фактот што според нашите првични сознанија имаше ученици кои што се со место на живеење во Росоман, Демир Капија, Неготино, изминатите години седеа во домот, и оваа година сакаа, а не беа првично примени во домот, иако се најоддалечени, што всушност би требало да биде прв и најважен критериум. За потоа како откажуваат нашите деца тие по дифолт да ги примаат во домот тие што првично не се примени, а на тие што не сакаат да седат му го укинуваат превозот“, се наведува во дописот.
Родителите наведуваат дека учениците од општина Демир Хисар, кои што се запишани во училиштата во општина Битола, на почетокот на учебната година нема да присуствуваат на наставата во училиштата.
„А во моментов тоа се околу 100 ученици од општина Демир Хисар кои што учат во општина Битола и се соочуваат со тој проблем, а со самото тоа и ние како родители. Во Демир Хисар има само едно средно училиште, и тоа со два смерови општа гимназија и компјутерска автоматика. Со овие измени на учениците му се скратува правото на избор на саканото училиште, пр.други смерови од техничката струка, медицинска или економска струка, кои ги има во Битола. Бидејќи нашите деца не сакаат да седат во домот, дали треба да се отпишат и да се презапишат во Демир Хисар? Немаат право да им ја уништуваат иднината и соништата на децата.
Со овој проблем не се засегнати само учениците што учат во битолските училишта, туку и од цела Македонија.
После нашето долго талкање по институции кои се засегнати во случајов, мислејќи дека тоа е правиот пат, досега не најдовме решение“, пишуваат родителите.
Тие најавија дека ако проблемот не се реши, на 1 септември ќе организираат протест со блокади на патиштата.
Македонија
Алијанса за Албанците: ВМРО-ДПМНЕ се обидува да ја оцрни фигурата на Таравари преку клевети и игри со зборови

Алијансата за Албанците оценува дека ВМРО-ДПМНЕ, заедно со „експериментот ВЛЕН“, се обидува да ја оцрни фигурата на претседателот, д-р Арбен Таравари, преку клевети и игри со зборови, се наведува во реакцијата на Алијанса за Албанците на обвинувањата од ВМРО-ДПМНЕ.
„ВМРО-ДПМНЕ и нивните сателити, доколку имаат некакво сомневање или тврдење, нека го докажат. Во спротивно, тоа останува само ниска пропаганда за одвлекување на вниманието од вистината: д-р Арбен Таравари им ги урна мрачните планови против Албанците. Ова можат многу лесно да го направат, бидејќи сите државни институции ги имаат под контрола и имаат целосен пристап до секој официјален документ. Ги повикуваме да се разбудат – тие не се опозиција, тие се власт и држава. Алијансата за Албанците ги повикува, користејќи ги сите надлежности и институции што ги раководат, да презентираат барем една единствена врска помеѓу инвеститорот од Албанија и д-р Арбен Таравари. Или можеби, за нив секој инвеститор од Република Албанија е сомнителен?“, се наведува во реакцијара.
Македонија
Вилијам Михајловски, осуден на 14 години затвор, ќе ја води Комисијата за безбедност и правда на Единствена Македонија

Централниот комитет на Единствена Македонија на дводневната седница во Охрид меѓудругото донесе и неколку кадровски одлуки од своја надлежност.
„Беше избран нов Извршен комитет, а воедно за генерален секретар беше избран Милан Јовчески, а за член на Извршниот комитет беше избран уставобранителот Вилијам Михајловски – Гајда во моментот неоправдано осуден на 14 години затвор за Македонија. Вилијам Михајловски како член на Извршниот комитет ќе ја води и Комисијата на Единствена Македонија за внатрешна безбедност, одбрана, правда и политички затвореници“, соопштија од партијата.
Централниот комитет утврди 29 кандидатски листи за локалните избори, а уште шест се во постапка за утврдување на следната седница на Централниот комитет.
Од партијата соопштија дека е донесена и одлука за кандидат за градоначалник на Град Скопје.