Македонија
На скрининг-агендата денеска и утре билатералниот скрининг-состанок за Поглавјето 22
Денеска, во Брисел, почна билатералниот скрининг за Поглавјето 22, „Регионална политика и координација на структурните инструменти“, кое е дел од Кластерот 5, „Ресурси, земјоделство и кохезија“, кое вклучува регулативи поврзани со планирањето и спроведувањето на кохезивната политика на Европската Унија и употребата на европските структурни и инвестициски фондови.
Пред експертите на Европската комисија од Дирекцијата за регионална и урбана политика, Дирекцијата за вработување, социјални работи и инклузија и од Дирекцијата за проширување, заменичката на главниот преговарач со ЕУ и државна секретарка во Секретаријатот за европски прашања (СЕП), Дрита Абдиу-Халили, рече дека нашите институциите знаат дека е важно сега да воспоставиме систем за управување со средства, односно програми, за да обезбедиме ефективно, ефикасно и видливо користење на средствата од ЕУ за потребите на остварување на економскиот и социјалниот развој како држава членка на ЕУ.
„Почнувајќи со многу скромен капацитет, но со заложба од визионерите во неколку институции, во текот на годините се инвестира во градењето на знаењата и вештините на структурите на ИПА во администрацијата. Денес, имаме модерна администрација во речиси сите министерства, кои секојдневно работат на имплементација на политиките на ЕУ и проектите на ЕУ. Во наредниот период сите наши национални напори ќе бидат посветени на нашето членство во Европската Унија. За овој предизвик, знаењето и капацитетот на сите обучени и квалификувани експерти и структури на ЕУ ќе се користат и ќе се прелеат на целата наша администрација“, рече Абдиу-Халили.
Македонската делегација ја сочинуваат претставници на Секретаријатот за европски прашања, министерствата за финансии, за економија, за локална самоуправа, за информатичко општество и администрација, за животна средина и просторно планирање, за труд и социјална политика, Државниот завод за ревизија, ревизорско тело за ревизија на инструмент за претпристапна помош, Бирото за јавни набавки, Министерството за транспорт и врски, Државниот завод за статистика, Центарот за управување со кризи, Генералниот секретаријат, Комисијата за заштита на конкуренцијата и Државната комисија за спречување на корупцијата.
Утре, продолжува билатералниот скрининг состанок за Поглавјето 22, на кој ќе се презентира каков напредок имаме постигнато и што правиме за зајакнување на финансискиот менаџмент и за административните капацитети, како и за резултатите од досегашната заложба за отвореност, видливост, транспарентност на македонските институции.
Република Северна Македонија има повеќе од 15 години искуство во спроведувањето на претпристапната помош на ЕУ. Почнувајќи од 2007 година кога беа воспоставени структурите на национално ниво и потоа во 2009/2010 година кога беше доделена акредитацијата на националните власти за управување со четири од пет компоненти на ИПА, Република Северна Македонија почна да ги спроведува правилата и регулативата на ЕУ во оваа област, информираат од Секретаријатот за европски прашања.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
На свечена церемонија, утре Пендаровски ќе и’ ја предаде функцијата на Силјановска-Давкова
Во Кабинетот на претседателот, утре – 12 мај ќе се одржи официјална церемонија на примопредавање на функцијата Претседател со највисоки државни и воени почести.
По свечената церемонија новоизбраната претседателка Гордана Силјановска Давкова и претседателот Стево Пендаровски предвидено е да остварат тет-а-тет средба.
Државната изборна комисија денеска и’ го издаде уверението за избран претседател на Гордана Силјановска-Давкова. ДИК ќе треба да достави извештајот до Собранието за да биде закажана седница за утрешната инаугурација на Силјановска Давкова. Потоа таа пред пратениците ќе треба да даде свечена изјава по која ќе почне нејзиниот мандат.
Мандатот на Пендаровски истекува утре.
Македонија
Aхмети тврди дека со челниците на „Вреди“ во јануари потпишале декларација дека ќе владеат само со партии што поддржуваат уставни измени
ДУИ тврди дека и првите луѓе на коалицијата „Вреди“ (Влен), со кои ВМРО-ДПМНЕ договара коалицирање во новата Влада, се потписници на декларација во која уверуваат дека ќе владеат заедно само со оние политички партии кои се согласуваат да ги поддржат уставните измени.
Лидерот на ДУИ, Али Ахмети на денешниот собир на претставниците и членството на коалицијата рече дека декларацијата била потпишана во јануари годинава.
Во неа, се наведува дека почетокот на преговорите со Европската Унија (ЕУ) носи стратешки и значајни придобивки за нашата земја, а потписниците со обединет глас се придружуваат да одговорат на итната потреба за решавање и стабилност во земјата.
„За овие цели ние како политички партии изјавуваме: ‘Ние, долупотпишаните политички партии, имајќи ја предвид состобата во која се наоѓа државата и должноста што jа имаме кон граѓаните, чувствуваме обврска да изјавиме дека сме целосно решени, сега и во иднина да соработуваме и да владееме заедно само со оние политички партии кои се согласуваат да ги поддржат уставните измени како услов за продолжуванье на процесот на интеграција на земјата во ЕУ. Потписи на партиски претставници (наредени по азбучен ред): Арбен Таравари, Африм Гаши, Али Ахмети, Билал Касами и Изет Меџити“, стои во документот што го прочита Ахмети.
Претпладнево се случи првата рунда на преговори помеѓу ВМРО-ДПМНЕ и Влен, по којашто партиите соопштија дека ги договориле општите начела за идната Влада, која ќе се базира на три постулати: евроинтеграции, забрзан економски развој, борба против криминалот и корупцијата и владеење на правото.
Од тука додадоа дека двете страни ќе формираат работни групи, на кое ниво ќе продолжат разговорите за коалицирање.
Во изборната кампања, ВМРО-ДПМНЕ и „Вреди“ излегоа со различни ставови за уставните измени, но во повеќе наврати беше потенцирано дека разговорите на таа тема ќе бидат ставени на маса по завршувањето на изборите.
Македонија
„Договорени се општите начела за идната Влада“ – заврши средбата на ВМРО-ДПМНЕ со Влен
Денеска беше остварена средба помеѓу ВМРО-ДПМНЕ и ВЛЕН. Од страна на ВМРО-ДПМНЕ беа присутни претседателот Христијан Мицкоски, потпретседателите Александар Николоски, Владо Мисајловски, Тимчо Муцунски и Гордана Кочоска Димитриеска, како и шефот на кабинет на претседателот Владимир Нелоски, од страна не ВЛЕН беа присутни Арбен Таравари, Изет Меџити, Биљал Касами и Африм Гаши.
„Договорени се општите начела на соработка за идната влада, која ќе се базира на три постулати: евроинтеграции, забрзан економски развој, борба против криминалот и корупцијата и владеење на правото“, објави ВМРО-ДПМНЕ по средбата.
Заклучено е дека двете страни ќе формираат работни групи, на кое ниво ќе продолжат разговорите до нивно финализирање.