Македонија
(Видео) Неждет Мустафа: Со влегувањето во Владата, Амди Бајрам доби политичка аболиција

Лидерот на Обединетата партија за еманципација на Ромите (ОПЕР), Неждет Мустафа, денеска на прес-конференција во општина Шуто Оризари го изрази незадоволството по одлуката Амди Бајрам со неговата партија Сојузот на Ромите од Македонија (СРМ) да влезе во владината коалиција.
Притоа Мустафа истакана дека со вчерашната појава Амди Бајрам признал дека самиот тој е промотор на поткупување на ромските гласови. Додаде и дека Бајрам 20 години со блеф го претставува ромскиот народ на политичката сцена во Македонија.
„На кој начин влегува Амди Бајрам и кој е неговиот интерес по секоја цена да биде дел од владината коалиција“, јавно запраша Мустафа. Потоа констатира дека Бајрам не може да живее без власта и кажа дека веднаш по договорот со СДСМ, сите деца на Бајрам што биле во странство се вратиле во Македонија.
Претседателот на Обединетата партија за еманципација на Ромите исто така истакна дека со влегувањето на Бајрам во Владата практично се прави негова политичка аболиција.
„Сакаме да докажеме дека тој речиси на секои локални избори во Шуто Оризари е губитник. На последните избори се докажа дека тој тука е соголен и дека своето членство го задржува само со режим. Свесен е дека ако не е во коалиција, ако не е во власта, нема партија“, истакна Мустафа.
На новинарско прашање дали ОПЕР е подготвена да го изрази незадоволството со тоа што ќе ја напушти коалицијата со СДСМ, Мустафа не ја исклучи таквата можност и одговори дека за тоа ќе одлучат органите не партијата. Најави и дека можно е партијата да го демонстрира незадоволството со улични протести во целата држава.
Покрај Неждет Мустафа, на денешната прес-конференција присуствуваа и Миљазим Сакип од Демократската партија на Ромите, како и градоначалникот на Шуто Оризари, Курто Дудуш, кој рече дека верува во правната држава и сака да му порача на Бајрам оти се излажал ако мисли дека ќе влезе во коалиција за да се спаси себеси и своето семејство да не бидат гонети за криминалите што им биле откриени во изминатите месеци.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Милевски: Виница 4 години назадува, катастрофално владеење на Петков и ВМРО-ДПМНЕ

Така наречениот отчет на градоначалникот Миле Петков и ДПМНЕ е најдобар доказ за четири години катастрофално и досега невидено лошо владеење на една локална власт во Виница, изјави кандидатот на СДСМ за градоначалник на Виница, Гоце Милевски.
Наместо вистински отчет, додаде тој, видовме обид за замачкување на очите на јавноста и бегање од одговорност за неисполнетите ветувања.
„Затоа таканаречениот отчет беше во скап хотел а не на улиците, во градот и селата во Виница. Затоа што реалноста е разочарувачка. Ниту еден од капиталните проекти од програмата на Петков и ДПМНЕ за Виница не се реализирани“, рече Милевски.
Според Милевски, Петков се фалел со наследени проекти од претходната власт на СДСМ и неколку асфалтирани улици.
„Но фактите говорат: сегашната власт нема реализирано ниту 20 километри улици, наспроти 45 километри изградени во времето на СДСМ. Виница денес изгледа како мала депонија од не собереното ѓубре и смет, собирен центар за кучиња скитници, со небезбедни кратери од вода и хаос од неправилно паркираните возила, со запуштени зелени површини и ниту едно ново засадено дрво. Тоа сликата за Виница после 4 години неспособна локална власт на ВМРО-ДПМНЕ. Да не дозволиме оваа казна да продолжи уште четири години! Локалните избори се шанса за промени во Виница“, рече Милевски.
Македонија
Голема акција на Финансиската полиција: уапсени седум лица за даночни измами и перење пари, го оштетиле буџетот за 430 милиони денари

По двегодишна опсежна предистражна постапка, во текот на денешниот ден Управата за финансиска полиција спроведе акција во која беа извршени претреси на повеќе локации на подрачјето на општина Липково, Куманово и Желино.
Се работи за сложена предистрага, која опфаќа повеќе правни и физички лица, а целта е целосно разоткривање на криминална група, која дејстувала подолг временски период и имала цел вршење на кривичните дела злосторничко здружување, даночно затајување, даночна измама и перење пари и други приноси од казниво дело, со намера организаторите и припадниците на групата да стекнат противправна имотна корист во висина од над четиристотини триесет милиони денари, со што е предизвикана огромна штета на буџетот на Република Македонија.
По налог на јавен обвинител од Основно јавно обвинителство за гонење организиран криминал и корупција, во акцијата со асистенција на САЕ „Тигар“ од слобода се лишени седум лица и тие се изведени пред судија на претходна постапка при Основниот кривичен суд, а едно лице не е достапно на органите на прогонот.
Македонија
Утре сончево време, со температура до 34 степени

Времето утре ќе биде сончево со мала до умерена облачност. Попладне во источните делови ќе има услови за локален краткотраен дожд. Ќе дува слаб до умерен ветер претежно од јужен правец, информира УХМР.
Минималната температура ќе биде во интервал од 9 до 18, а максималната ќе достигне од 27 до 34 степени.
Во Скопје сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 14, а максималната ќе достигне до 32 степена.
До петок времето ќе се задржи претежно сончево и топло со постепен пораст на дневните температури. Ќе дува слаб до умерен ветер од јужен правец.
За време на викендот времето ќе биде променливо облачно и нестабилно со локален пороен дожд и грмежи. В сабота ќе дува умерен до засилен југозападен, а в недела ветерот ќе го смени правецот во северен.