Во врска со зголемениот број измами што годинава беа забележани, а кои опфаќаат фишинг-напади и случаи на лажно претставување во име на „Пошта на Северна Македонија“, како и на други државни институции и правни субјекти, Секторот за компјутерски криминал при МВР ги известува граѓаните дека главната цел на фишинг-измамите е да се приберат личните податоци на примателот или да се натера да посети лажна веб-страница преку која со оставање на личните податоци може да се предизвикаат дополнителни злоупотреби, велат од МВР.

Овој тип на фишинг-напад доаѓа во форма на СМС-пораки, во кои се известуваат граѓаните дека имаат наводна пратка на нивно име за која е потребно да доплатат многу мала сума за испорака. Во СМС-пораката исто така има URL-линк, кој води до веб-страница што е дизајнирана да изгледа како легитимна на онаа на „Пошта на Северна Македонија“, како и на други државни институции и правни субјекти. Преку форма за внесување податоци граѓаните ги внесуваат оние од своите платежни картички. Обично веднаш се извршува плаќањето на првобитната сума за по некое време, да се изврши поголема трансакција.

Овие електронски пораки се класичен обид за измама со цел прибирање лични податоци за нивна понатамошна злоупотреба. Затоа, апелираме до сите граѓани да бидат внимателни, да не ги отвораат овие пораки и никако да не контактираат со испраќачот преку доставениот линк или да споделуваат лични податоци доколку тоа се бара.

Во последниот период овој тип на измами зазеде друга форма, каде што граѓаните се манипулирани да инвестираат на лажни платформи за инвестирање и тргување со криптовалути. Измамата типично почнува со тоа што жртвата ќе пронајде и ќе се регистрира на наводна платформа за инвестирање и тргување со криптовалути за подоцна да биде контактирана (најчесто телефонски) од странски телефонски броеви од страна на непознатите сторители. Сторителите се претставуваат како советници за инвестирање и финансии и ќе почнат интензивна и долга комуникација со жртвите, притоа наведувајќи ги да вложуваат сè повеќе финансиски средства. Во текот на комуникацијата непознатите сторители цело време напоменуваат дека жртвата во секое време може да си ги повлече уплатените финансиски средства, како и остварените добивки. Но, кога ќе дојде моментот за тоа да се оствари, сторителите измислуваат разни пречки и дополнителни давачки за остварување на ветеното.

Со цел да се заштитат граѓаните од ваков тип на измами, Секторот за компјутерски криминал препорачува да не се отвораат сомнителни линкови и датотеки прикачени во имејл-пораки од непознати испраќачи, да не се одговара на непознати телефонски броеви, како и да не се оставаат личните податоци, податоците од свои платежни картички на непознати веб-страници и платформи. Исто така, доколку граѓаните пронајдат одредени платформи или сервиси за инвестирање од каков било тип, задолжително да извршат проверка на интернет за нивната легитимност и автентичност, односно дали исполнуваат одредени критериуми за меѓународна регулација за брокери, соопшти МВР.