Македонија
Николовски пред превозниците: Ќе работам на менување на свеста на царинските службеници и на сите учесници во царинските постапки

Усогласување на работното време на инспекциските служби на граничните премини, автоматизација на терминалите на граничните премини со грант од ЕУ и негово поврзување со новиот систем за видео надзор и препознавање на регистарските таблички што се имплементира во моментов, како и унапредување на дигитализацијата и поврзување на институциите во рамки на државата но и на ниво на држави, се трите главни реформски мерки на коишто ќе работи Царинската управа во следниот период. Ова го истакна директорот на Царинска управа, Бобан Николовски, на средба со генералниот секретар на Асоцијацијата, Макам-транс, Билјана Муратовска. Средбата беше остварена на еден од најфреквентните гранични премини, Табановце, а со цел увид на состојбите, но и дијалог со Асоцијацијата каде се членки 1.500 превозни компании.
„Дијалогот е клучен за унапредување на мерките и политиките што ги преземаме, а коишто мора да дадат конкретни резултати. Пред претставниците на транспортерите ветивме конкретни политики и мерки кои треба да резултираат со скратување на времето на чекање, заштеда на средства и зголемување на конкурентноста на македонското стопанство“, истакна Николовски.
Тој потенцира дека проектот за автоматизација на терминалите на граничните премини и негово поврзување со новиот систем за видео надзор и препознавање на регистарските таблички ќе придонесе за значително намалување на времето на чекање, како еден од најгорливите проблеми со кои се соочуваат транспортерите. Истовремено, како што рече, ќе се намали потребата од човечки фактор, што ќе придонесе за намалување на криминалот и корупцијата и прибирање повеќе приходи во Буџетот.
Второ, нагласи тој, преку повисок степен на дигитализација ќе се модернизираат институциите и ќе се подобрат услугите кон компаниите и граѓаните. Како една од клучните мерки за скратување на времето на чекање, а за што е разговарано и со директорот на Агенцијата за храна и ветеринарство, ќе се усогласи работното време на инспекциските служби на граничните премини со работното време на граничните царински испостави. Ова особено ќе се примени на најфрекветните гранични премини, Табановце, Деве Баир, Богородица, Ќафасан и Блаце.
Директорот воедно потенцира дека лично ќе се осигура секој потпишан протокол што е во насока на олеснување на трговијата, како последниот за признавање на кантарските белешки, строго да се почитува, но истиот повика да се применува и од страна на превозниците.
Директорот уште еднаш пред јавноста апелира дека „работиме на менување на свеста на царинските службеници како приоритет во службата“.
„Ќе се бара ред, работа, дисциплина и максимален професионален ангажман од секој царински службеник при извршување на работните задачи. Директно апелираме и до транспортерите и до сите учесници во царинските постапки од нивна страна да се почитува царинската униформа, бидејќи само тоа е начинот на којшто ќе ја издигнеме ефективноста во работењето и очекуваните резултати ќе ги искачиме на максимално ниво“, порача Николовски.
Генералниот секретар на Макам-транс Муратовска изрази задоволство од дискусијата со директорот Николовски нагласувајќи дека секое скратување во времето на чекање е во полза на транспортерите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Повеќето пожари изгаснати, под контрола еден – ‘Јасен’ сè уште гори

До 8 часот утринава регистрирани се вкупно 27 пожари на отворен простор, соопшти Центарот за управување со кризи (ЦУК).
Од нив, активни се два пожари – во ПП „Јасен“ на подрачјето на општина Македонски Брод и во атарот на селата Лојане и Табановце во општините Куманово и Липково. Под контрола е еден пожар на територија на општина Јегуновце, меѓу селата Рогачево, Јажинце и Долно Орешје.
Во текот на изминатите часови изгаснати се 24 пожари на повеќе локации низ државата, меѓу кои во Долнени, Тетово, Врапчиште, Гостивар, Куманово, Штип, Струга, Кичево, Крушево, Кисела Вода, Шуто Оризари, Илинден, Боговиње, Охрид, Старо Нагоричане, Крива Паланка, Бутел и Карпош.
Македонија
Попладне пороен дожд и грмежи во западните делови, најавија метеоролозите

Времето денес ќе биде променливо облачно со сончеви периоди. Попладне, претежно во западните региони ќе има локална појава на нестабилност со пороен дожд и грмежи. Ќе дува слаб до умерен ветер од северен правец, јавува УХМР.
Максималната температура ќе биде во интервал од 28 до 35 степени.
Во Скопје, променливо облачно со сончеви периоди. Ќе дува слаб до умерен ветер од северен правец. Максималната температура ќе достигне до 33 степени.
Македонија
Марш на ангелите во Кочани: Ако нема правда за ангелите, за нивните родители и семејства, нема да има за никој

Правда мора да има, ако не ќе поставиме шатори пред судот и полицијата и нема да дозволиме никој да влегува. Ако нема правда за ангелите, за нивните родители и семејства, нема да има за никој. Ова го порача поддржувач на родителите чии деца загинаа на 16 март во дискотеката „Пулс“ во Кочани.
Тој од својата инвалидска количка го предводеше осумнаесетиот марш на ангелите. Зборувајќи пред Основниот суд во Кочани, ја обвини полицијата дека дваесет минути на влезот во градот, кај ресторанот „Национал“, држела луѓе од други општини затоа што доаѓале да ги подржат кочанчани.
– Без никакво образложение легитимирале, претресувале. И порачувам на цела Влада – помеѓу тие луѓе нема ниту еден терорист, ниту еден нарко дилер, ниту еден криминалец. Тоа се луѓе со душа и срце. Зошто се прави таков притисок, се обидувате ли нешто да скриете. Истрагата „терајте“ ја како што треба. Родителите на починатите веќе немат солзи во очите, изјави поддржувачот на родителите.
Осумнаесетиот марш на ангелите вечерва се одвиваше по истата маршрута како и претходно: Парк на Револуцијата, кафуле „Класик“, Општина, УЈП, полиција, суд, со тоа што вечерва немаше свирежи пред споменатите институции.
Родителите беа доста тивки. Сестра на починато момче во пожарот во „Пулс“ само потсети дека денеска, 16 август, навршија пет месеци откако на 16 март 62 лица ги загубија своите животи.