„Првиот повик е завршен, вториот повик е во тек, проектите во вредност од 6 милијарди денари веќе до општините се пренесени по различни програми, дел од општините ги завршија тендерските постапки и почнуваат со реализација на тие проекти“, вели Христијан Мицкоски, претседател на Владата одговарајќи на денешната седница за пратенички прашања.

Мицкоски вели дека не може во 21 век да се зборува за вештачка интелигенција, а граѓаните да немаат пристојни услови за живот.

„Огромен е интересот на граѓаните и буквално има состојба каде што излегуваат од куќите да се заблагодарат, бидејќи ниту имале канализација, ниту имале асфалт, дел од нив ниту вода имале. Сега добиваат основни услови за живот. Тоа е она кое што секоја Влада и локална самоуправа треба да го обезбеди, луѓето да имаат основни услови за живот“, дециден е тој.

„Не може во 21 век ние да зборуваме за вештачка интелигенција, за напредна технологија, а дома имаме примери каде што луѓето газат кал, при првиот дожд се поплавени дома и немаат вода за пиење“, рече премиерот.

Мицкоски додаде дека овој проект бил потребен и според информациите кои што ги има, до сега во вториот повик имаат аплицирано 34 општини или вкупно 179 проекти.

„Ова беше потребно, да инвестираме во капитални проекти за да ги подобриме условите за живот на нашите сограѓани. Заклучно вчерашниот ден имаме 34 општини кои што поднеле предлог проекти за финансирање кои ќе бидат дел од вториот повик, таа бројка беше 179 проекти“, истакна Мицкоски и додаде:

„Со овие 15 милијарди денари кои се обезбедени на различни потпрограми во буџетот на различни министерства, ние доаѓаме до 21 милијарда денари само од овој проект, плус дополнителни програми кои си ги имаат министерствата“.

Премиерот Христијан Мицкоски на денешната собраниска седница, одговарајќи на пратеничко прашање од пратеничката на ДУИ, Рина Ајдари истакна дека не е заробеник на проценти и дека јавната администрација се соочува со голем проблем за наоѓање кадар без разлика дали се Македонци, Албанци, Турци, Власи, Срби, Роми, Бошњаци поради аздисаноста на функционерите од нејзината партија и празнењето на државниот буџет што доведе до тоа истиот да не е во состојба да понуди добри плати.

„Поврзано со прашањето и поврзано со примањата во јавната администрација морам да ви признам дека ние денеска во суштина имаме голем проблем да најдеме луѓе коишто ќе работат во јавната администрација без разлика дали тие се Македонци, Албанци, Турци, Власи, Срби, Роми, Бошњаци итн. Имаме отворени конкурси и молиме луѓе да се вработат, но не сакаат бидејќи имаат подобра и подобро платена работа. Верувајте ми, ова ви го кажувам од прво име“, потенцираше Мицкоски и додаде:

„Е сега има вработени како тие од Лотарија на Македонија, најголемиот дел активисти на вашата политичка партија или блиски на активисти на вашата политичка партија кои пак самите си дадоа отказ. По формирањето на новата влада самите си дадоа отказ. Во суштина и не знам дали можам да им дадам статус на вработени бидејќи и не иделе на работа, а добивале плата. И потоа одговорното лице добива кривична пријава и бега, односно директорот. Бега од државата, наместо да дојде да се соочи и да каже зошто е тоа така, тој бега“.

Тој исто така рече дека ваквата состојба е како резултат на примери како на, како што рече, бегалецот кој е на црната листа и кој додека беше на функција мислеше дека оваа држава е негова своевина.

„Еве јас јавно повикувам да има што повеќе апликанти Албанци, повеќе апликанти Турци, Роми, Власи, Срби, Бошњаци да влезат во јавната администрација и не сум заробеник на проценти, само да има квалитетни и коишто се мотивирани да работат. Веднаш утре да почнат да работат. Не се пријавуваат нема интерес. Никој нема да дојде за 25 илјади плата. Знаете зошто? Затоа што еден друг бегалец којшто е на црната листа мислеше дека оваа држава е негова своина, си играше фудбалчиња, а по малку и си работеше во Лотарија, па по малку си изнајмуваше простории коишто ги натплаќаше едно 10 пати повеќе од пазарната сума, па малку повеќе си купуваше објекти во центарот на Скопје, туристички агенции за неговото семејство итн“, вели Мицкоски и додаде:

„Така се празнеше и се цицаше државниот буџет којшто сега не може да си дозволи поголема плата и поголеми примања за да можеме да бидеме атрактивни како сектор, за да има повеќе Албанци коишто ќе доаѓаат на работа коишто ќе бидат мотивирани да работат коишто ќе сакаат да работат и коишто ќе придонесуваат заедно со мене, со вас за нашата заедничка унитарна држава. Нема интерес. Никој нема за 22-23 илјади да дојде да работи“.

Мицкоски нагласи дека рамката на законот за правична застапеност е готова и дека се работи на тоа да биде уставен, апликативен и никој во иднина да не може да го оспорува и да прави политички поени на оваа тема.

„Рамката на идниот закон е готова уште пред Нова Година. И да, во рамките на коалицијата во којашто е Коалицијата Твоја Македонија предводена од ВМРО-ДПМНЕ, Коалицијата ВРЕДИ, политичката партија ЗНАМ, се работеше, се разговараше на решение коешто ќе биде уставно. Решение коешто нема да дозволи поедини политички партии, вработувањето коешто е уставно загарантирано да биде предмет на политичка дебата и политички собирање поени на одредени политичари коишто во отсуство на друга тема, немаат друга тема само тоа знаат и етнички ќе ги делиме сега работите“.

„Скопје е град кој овие 15 години се изгради како во Центарот така и во приградските населби и села. Автобуските линии се стари повеќе од 40 години со мали интервенции и не одговараат на потребите на граѓаните, потребно е системско решение, предлагам да се направат физибилити студија за автобуските линии и за возниот ред што ќе важи за сите автобуси“, истакна советникот во Советот на Град Скопје од ВМРО-ДПМНЕ Тони Бојковски на денешната седница на Советот на град Скопје.

Бојковски посочи дека целта на студијата е да се прикаже колку автобуси му се потребни на Скопје.

„Целта на оваа студија да покаже колку автобуси му требаат на Скопје за потребите на граѓаните. Со новите линии ќе бидат поврзани населби што денес во пракса требаат два автобуси за да се поврзат тоа значи повеќе километри гориво но помалку автобуси и возачи пример, Бутел и Гази Баба со два автобуси, Гази Баба и Карпош со два автобуси се оди, Кисела Вода и Гази Баба со два автобуси и обратно“, рече Бојковски.

Бојковски потсети дека во 2012 година од Владата предводена од ВМРО-ДПМНЕ биле набавени 300 автобуси и дека навистина можеби проблемот не се состои во набавувањето на автобуси туку изработка на физибилити студија со цел да се знае колку автобуси му се потребни на Скопје.

„Замислете во 2012 година како сите што знаеме Владата на ВМРО -ДПМНЕ купи повеќе од 300 автобуси од кои 260 беа големи автобуси и повеќе имаше и мали и мини автобуси. Замислете и со тие 250 до 300 автобуси што ги купи Владата во 2012 година со возниот ред имаше проблем значи можеби не е недостаток автобуси може е навистина дојдено време кога треба навистина да се изработи физибилити студија, ние навистина да знаеме колку автобуси му треба на Скопје“, рече Бојковски.