Во Луксембург се потврди она што сите го знаеме, а тоа е дека Македонија со Заев, Димитров, Османи и со Шекеринска, за жал, и овој јуни не доби датум за почеток на преговорите за членство во Европската Унија, изјави потпретседателот на ВМРО-ДПМНЕ, Александар Николоски, на прес-конференција.

Тој истакна дека ваквиот исход, пред сè, се должи на лошото работење на владините функционери во некои од клучните области.

„Како сакате да ве видат во исто друштво со уништено здравство во кое однапред се знае кој и како ќе ги добива тендерите, кога дрога на улиците има како никогаш порано, а економијата се сведува на онаа народната – јас, брат ми и по некој друг братучед?“, запраша Николоски.

Потпретседателот порача дека неговата партија сака Македонија да оди напред и токму затоа наместо да ја користат ситуацијата за дневнополитички поени, јавно понудиле да се формираат работни групи помеѓу ВМРО-ДПМНЕ и Владата, кои ќе работат на реформите што Европската Унија ги бара.

„За жал, до овој момент на понудата што пред две недели ја изнесе претседателот на партијата, сè уште немаме одговор. Претпоставувам нема затоа што ги јаде ароганцијата и самобендисаноста, затоа што не знаат и не сакаат, а од други помош не примаат“, рече Николоски.

Во овој контекст тој јавно запраша дали можеби на СДСМ и Заев им одговора да нема датум за почеток на преговорите.

„Дали не сакаат да бидат контролирани од Европската Унија? Затоа што кога ќе почнат преговорите, тендерите ќе не може толку лесно да се местат и бизнисот да цвета“, порача Николоски додавајќи дека не смее да се губи повеќе време и веднаш мора да се направи план за реформи и работа.