Македонија
Нова заедничка волонтерска екоакција за чистење на кејот на Вардар

Во организација на „Пивара Скопје“, Амбасадата на Кралството Холандија и компанијата „Пакомак“ годинава повторно се исчистени патеките и бреговите од двете страни на реката Вардар во централното градско подрачје на Скопје. Целта на оваа најнова екоакција, во која на волонтерска основа учествуваа вработените во „Пивара Скопје“, беше да се собере целокупниот сув отпад на двете страни од кејот на Вардар, кој понатаму ќе биде соодветно рециклиран.
Кон новата екоакција, која годинава се одвиваше под мотото Clean Up, Tweet Up, се приклучи и британскиот амабасадор Чарлс Герет, како и амбасадорот на САД, Џес Л. Бејли, со своите тимови. Благодарение на комуникацијата преку социјалната мрежа „Твитер“, во акцијата имаа можност да се вклучат и граѓаните.
„Заштитата и унапредувањето на животната средина е меѓу најзначајните области на кои сме посветени како компанија, но и како поединци кои на волонтерска основа одвојуваат дел од своето работно време за да дадат свој придонес во успехот на ваквите екоакции“, изјави Ламбро Патче, менаџер за односи со јавност и комуникации во „Пивара Скопје“. „Пивара Скопје“ како еден од основачите на „Пакомак“ континуирано вложува сериозни финансиски средства со кои се обезбедува ефикасно функционирање на системот за управување со отпадот од пакување. Како компанија постојано работиме на остварување и надминување на нашите, но и на националните еколошки таргети за собирање и рециклирање на амбалажниот отпад. Истовремено, преку ваквите екоакции сакаме да испратиме порака и апел кон другите компании и целото општество дека сите треба да го преземат својот дел од одговорноста и повеќе да се ангажираат во решавањето на проблемот со загадувањето, со што ќе создадеме одржлива иднина за нас и за следните генерации“, нагласи Патче.
Ова е трета по ред волонтерска екоакција што ја организираат „Пивара Скопје“, „Пакомак“ и Амбасадата на Холандија. Во претходните две акции беа исчистени брегот и водите на езерото Матка, како и кејот на реката Вардар, на кој и годинава се собираше целокупниот сув отпад. Годинешната акција е воедно и дел од активностите за одбележување на Денот на кралот – националниот празник на Холандија.
„Се радувам што оваа година имавме можност да го одбележиме нашиот голем национален празник и со ваква акција. Го споивме убавото со корисното и уште еднаш се обидовме да го дадеме својот придонес за намалување на загадувањето кое е голем проблем за луѓето и природата. Единствен ефикасен начин за трајно надминување на овој проблем е повеќе работа, посветеност и соработка меѓу јавниот сектор, компаниите и граѓаните. Со нашиот денешен ангажман сакаме да покажеме дека секој од нас може да даде личен пример за другите и да го поттикне решавањето на кој било проблем“, истакна амбасадорот на Кралството Холандија, Ваутер Пломп.
Целокупната логистичка поддршка за соодветен транспорт, селектирање и рециклирање на собраниот отпад ја обезбеди „Пакомак“ – специјализирана компанија чија основна дејност е управување со отпад од пакување заради минимизирање на несаканите ефекти од него врз животната средина.
„Седма година по ред „Пакомак“, со редовната поддршка и финансиите што ги добиваме од нашите компании основачи и другите членки на системот, успеваме да ги надминеме годишните национални еколошки цели кои ни ги одредува државата за собирање и правилен третман на отпадот од пакување. Но, постојат субјекти што пуштаат отпад на пазарот, а не учествуваат во финансирањето на системите за негово собирање и рециклирање, ниту ѝ плаќаат на државата за тоа, со што директно го оштетуваат буџетот и животната средина. Тоа е јасен показател каде треба да се бараат решенијата. Товарот и одговорноста за решавање на проблемите мора да го понесат сите“, изјави Филип Ивановски, извршен директор на „Пакомак“.
Сведување на минимум на влијанието врз животната средина е стратешка цел на „Пивара Скопје“. Следејќи го глобалното лидерство на Групацијата Кока-Кола НБЦ во доменот на одржливиот развој, како и практиките за одржливост на „Хајнекен“, „Пивара Скопје“, континуирано вложува во оваа област и спроведува конкретни активности со кои придонесува за почиста животна средина. Тие активности се насочени кон правилно управување со отпадот од амбалажа, како и намалување на потрошувачката на енергија и заштеда на вода. Како еден од основачите на „Пакомак“, „Пивара Скопје“ постојано вложува и во ефикасноста на системот за собирање и рециклирање на целокупниот отпад од пакување во земјата.
За своите досегашни заложби за одржливост и евидентните резултати во заштита на животната средина, „Пивара Скопје“, заедно со другите членки на Групацијата Кока-Кола ХБЦ, четири години едноподруго е рангирана на првото место во индустријата за пијалаци во светот според престижното глобално рангирање кое го прави „Дау Џонс индекси за одржливост“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Пронајдени двете девојки од Португалија кои се изгубија во реонот на Водно – Матка

Денес околу 17.00 часот од страна на Центарот за управување со кризи бевме известени за две изгубени туристки во реонот од врвот на Водно кон Матка, извести директорот на ДЗС, Стојанче Ангелов.
Како што информираше Ангелов, Дирекцијата за заштита и спасување итно извршила мобилизација на тимот за спасување на планина од Тетово и истиот веднаш бил упатен во пребарување на теренот.
Во 18.40 двете девојки од Португалија беа пронајдени и однесени до ресторанот Матка каде ги пречека Конзулот на Република Португалија, додава Ангелов.
Македонија
Дел од Ѓорче Петров утре без струја

Од ЕВН Македонија АД известуваат дека утре без електрична енергија ќе останат:
– во периодот од 09.00 до 15.00 часот, корисниците од улиците Веле Марков, Ибе Паликуќа, Воин Драшковиќ, Рафаел Батино. (општина Ѓорче Петров)
Македонија
Меџити прими жители од Страчинце: Анализите на експертите јасно покажаа дека отворањето на каменоломот ќе има сериозни последици врз животната средина

Првиот заменик-претседател на Владата и министер за животна средина и просторно планирање, Изет Меџити, денес ги прими во својот кабинет жителите од селото Страчинце, со кои одржа отворен состанок за одлуката за одбивање на барањето за отворање на каменолом во оваа скопско село.
Министерот Меџити ги информираше жителите за професионалните и институционалните причини што доведоа до оваа одлука. Анализите на експертите јасно покажаа дека отворањето на каменоломот ќе има сериозни последици врз животната средина, ризик од поплави и негативно влијание врз јавното здравје, велат од Министерството.
На состанокот беше истакнато дека приоритет е заштитата на животот и благосостојбата на граѓаните над секој економски интерес.
Меџити истакна дека следниот чекор е конечно поништување на концесијата во Влада, со што ова прашање ќе добие трајно решение.
Жителите на Страчинце се заблагодарија за одлуката и за приемот што го оствари министерот Меџити, нагласувајќи дека овој состанок е пример за владеење со отворен дијалог и чесна соработка со граѓаните.