Амбасадорот Клеменс Која од Австрија, назначен од италијанското претседателство со ОБСЕ за шеф на Мисијата на ОБСЕ во Скопје, стапи на должност денес. Тој ја наследува Нина Суомалаинен, којашто го заврши својот мандат како шеф на Мисијата во април.

„Задоволство ми е што ја преземам оваа важна позиција среде тековниот реформски процес во земјата во многу клучни области, како владеењето на правото, медиумите, јавната администрација и полицијата“, рече Која. „Се радувам што ќе работам со претставници на институциите и граѓанското општество, како и со сите чинители за понатамошно продлабочување на добро воспоставената соработка со Мисијата”.

Која има над 29-годишно професионално искуство во службата за надворешни работи. Претходно, служел како постојан претставник на Австрија во ОБСЕ во Виена, австриски амбасадор во Белград и Љубљана, заменик-шеф на Амбасадата на Австрија во Мадрид и директор на Одделот за Јужна Европа на австриското Министерство за надворешни работи. Студирал право на универзитетите во Салзбург и Виена и e магистер по католичка теологија.

Клучните приоритети на Мисијата на ОБСЕ во Скопје се унапредување на конструктивните меѓуетнички односи и поддршка на понатамошната имплементација на Охридскиот рамковен договор од 2001 година и неговите клучни столбови: анти-дискриминација, образование, децентрализација, правична застапеност, помалите заедници и употребата на јазиците. Мисијата работи со властите на спроведување реформи во областите како избори, демократско полициско работење, локално владеење, медиуми и судството