Македонија
Нови паркови и зелени површини во Карпош

Продолжува зелената офанзива во Карпош. Нови паркови и зелени површини се предвидени на повеќе локации: спроти хотелот „Карпош“ на улицата Шекспирова се планира хортикултурно уредување (засадување нови цвеќиња, украсни грмушки и дрвја). Во продолжение на овој појас целосно ќе се облагороди и разубави делот околу Драмскиот театар и пред маркетот „Тинекс“, во Карпош 2.
Дополнително, со ново зеленило ќе се уреди и потегот по должината на булеварот 8 Септември (кај зградата на „Настел“), како и делот од спротива, зелениот појас кај комплексот „Македонија“ и лабораторијата „Авицена“. Исто така, ќе се разубави потегот на улицата Љубљанска, поточно зеленилото спроти кафе-барот „Чаптер“.
Ова е заклучено на денешната работна средба меѓу градоначалникот на општина Карпош, Стефан Богоев, со директорот на ЈП „Паркови и зеленило“, Адријан Муча, и оперативниот директор на ова јавно претпријатие, Игор Вељаноски. Горенаведените проекти се меѓу програмските активности на ЈП „Паркови и зеленило“ за оваа година, при што набргу ќе почнат со изведба.
На средбата се разговараше и за изградба на Спортско-адреналинскиот парк, кој ќе биде лоциран по должината на кејот на Вардар (од вештачката карпа до бунарите на реката Лепенец).
„Имаме шанса да добиеме нови бели дробови не само за Карпош туку за целиот град. Нашата намера е да почнеме со изведба на содржинскиот дел од паркот и веќе добивме грант од Светската банка за оваа намена, но потоа целосно да го уредиме и продолжението на овој потег за што ни е потребна поддршка од страна на ЈП ‘Паркови и зеленило’ и градските власти“, рече Богоев.
Идејата за зголемување на зелениот појас по должината на Вардар ја поздравија претставниците на јавното претпријатие, а директорот Муча посочи дека Општината може да смета на поддршката за целосна изградба на паркот. Во меѓувреме, Општина Карпош ја планира и новата пролетна акција за засадување нови веќе развиени дрвја во разни урбани заедници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Земјотрес рано утринава ги разбуди граѓаните на Валандово и на околината

Утрово во 5:54 часот, земјотрес со јачина од 3,3 степени според Рихтеровата скала го стресе регионот околу Валандово, информира Сеизмолошката опсерваторија при Природно-математичкиот факултет во Скопје.
Телеметриската сеизмолошка мрежа на Македонија го регистрирала потресот на неколку сеизмолошки станици ширум државата, при што е утврдено дека епицентарот се наоѓа во епицентралното подрачје Валандово, оддалечено околу 120 километри југоисточно од главниот град.
Според првичните информации од Сеизмолошката опсерваторија, земјотресот бил почувствуван во Валандово и околните населени места со интензитет од IV степени според Европската макросеизмичка скала (EMS).
Засега нема информации за причинета материјална штета или повредени лица, но локалното население на социјалните мрежи известува дека потресот бил „краток, но силен“, и ги разбудил во раните утрински часови.
Сеизмолозите продолжуваат да ја следат ситуацијата и ги повикуваат граѓаните на смиреност, посочувајќи дека ваквите потреси се честа појава во сеизмички активниот регион на југоисточна Македонија.
Македонија
Колони на границите, на „Богородица“ се чека до 40 минути, на „Табановце“ до 30 минути

Сообраќајот на државните патишта се одвива непречено и по суви коловози, но фреквенцијата на возила, особено кон граничните премини, денеска е значително зголемена, информира Автомотосојузот на Македонија (АМСМ).
Најголема гужва има на Граничниот премин Табановце, каде времето на чекање за влез и излез од државата е од 15 до 30 минути. На Богородица ситуацијата е уште поинтензивна – за излез од државата се чека до 40 минути, додека на ГП Дојран времето на задржување е 20 до 30 минути.
„Состојбата на патиштата е стабилна и коловозите се суви, но фреквенцијата е зголемена. Апелираме до сите учесници во сообраќајот да возат внимателно, со прилагодена брзина и да ја почитуваат сигнализацијата, особено на делниците каде што има опасност од одрони“, велат од АМСМ.
Посебна претпазливост се препорачува на патните правци низ котлините, речните долини и клисурите – Катланово – Велес, Маврово – Дебар – Струга, Виница – Берово и Кочани – Делчево – каде што постои ризик од појава на одрони.
На останатите гранични премини од македонска страна, нема подолги задржувања за влез и излез од државата.
Македонија
Денес сончево со ветер, од утре повторно температурата во постепен пораст

Управата за хидрометеорологија (УХМР) за денес прогнозира претежно сончево време со умерен до засилен ветер од северен правец, кој наместа ќе достигнува брзина од 60км/ч.
Минималната температура ќе биде во интервал од 11 до 20, а максималната ќе достигне од 27 до 36 степени.
Во Скопје, сончево со умерен до засилен северен ветер. Минималната температура ќе се спушти до 19, а максималната ќе достигне до 35 степени.
Од понеделник следува период на стабилно и потопло време со постепен пораст на дневнaтa температура.