Комисијата за надзор над примената на одредбите од Судскиот деловник и на одредбите од Законот за управување со движење на предметите во судовите утврдила дека распределбата на судски предмети се врши електронски и дека не е забележана рачна распределба на предметите.

Изземањето на судии се врши согласно законската процедура, а за секое исклучување и вклучување на судии од АКМИС постојат образложени одлуки.

Во записниците од Комисијата, објавени на веб страницата на Министерството за правда (pravda.gov.mk), како констатирани слабости се наведуваат недостигот на судии и административни службеници поради што се предлага Судскиот совет да изврши итен избор на судии со цел да се овозможи пополнетост на судовите. Во дел од судовите констатирано е дека нема телефонска централа, не се обезбедени униформи за припадниците на судската полиција и нема лифтови ниту пристап за лицата со попреченост. Судовите, исто така, не ги објавуваат редовно на веб страницата програмите за работа, годишните планови, распоредите и други акти со цел да се овозможи поголема транспарентност на работата на судот.

Од Министерството за правда денеска информираа дека се предложени мерки за решавање на овие проблеми и дека Комисијата ќе продолжи со следење на нивната реализација.

Владата не прави ништо, го запре процесот на зголемување на платите, не прифаќа никакви предлози кои се во интерес на граѓаните за да се намалат цените и сметките за струја, граѓаните страдаат од нивната неспособност, рече претседателот на СДСМ, Венко Филипче во Крива Паланка.

„Излегува премиерот и вели дека сме одлични во економијата, први сме. Одлични и први сме во што? Во тоа што струјата поскапе за 30%? Во тоа што цените во маркетите растат неконтролирано?„, праша Филипче.

Тој потенцираше дека Владата не прави ништо за да ја спречи економската нестабилност.

„Во една тешка економска ситуација, треба да растат платите, да има контрола на цените, да има поддршка за компаниите, да се спасуваат работни места. Но, оваа Влада ништо не прави. Немаат желба да седнат ниту на економско-социјален совет, ниту да примат било каков совет за да направат нешто во интерес на граѓаните„, нагласи претседателот Филипче.

Неспособноста на владејачката гарнитура е очигледна а граѓаните страдаат поради таа неспособност.

„Ниту премиерот, ниту некој од министрите, ниту било кој од неговиот најблизок тим има искуство во менаџирање на големи системи. Ништо никогаш не менаџирале. Сега се учат, ама лошо се учат и тешко дека ќе се научат,“ заклучи Филипче.

СДСМ ќе продолжи да се бори за економски мерки што ќе ги заштитат граѓаните и ќе обезбедат подобар животен стандард.

Владејачката ВМРО-ДПМНЕ денеска побара од Социјалдемократски сојуз (СДСМ)  да го исклучи Филип Андонов од член на Централниот одбор на партијата.

Ваквиот повик на власта доаѓа, откако дел од медиумите објавија дека меѓу осомничените во акцијата на МВР и Основното јавно обвинителство за гонење на организиран криминал и корупција (ОЈО ГОКК) за злоупотреби во затворот „Скопје“ во Шуто Оризари е и поранешниот директор на оваа казнено-поправна установа, Филип Андонов викан Сокол.

Од владејачката партија ги повторија обвинувањата дека ексдиректорот од затворот во Шуто Оризари направил хотел, овозможувајќи им на осудени лица да излегуваат кога сакаат и каде сакаат со тоа што униформирани лица тајно ги транспортирале со службени возила до местата каде тие сакале.

„СДС и Филип Андов Сокол наместо да се борат против криминалот преку нив државата  работела за криминалците. СДС да не го штити туку да го осуди и исклучи од ЦО Филип Андов Сокол. Правда и одговорност мора да има. Време е корумпираните носители на јавни функции да бидат онеспособени и спречени да го корумпираат општествениот систем. Приоритет на Владата предводена од ВМРО-ДПМНЕ е одлучна, неселективна и бескомпромисна борба против криминалот и корупцијата во општеството“, се вели во соопштението на ВМРО-ДПМНЕ. 

Од Министерството за внатрешни работи (МВР) завчера соопштија дека се поднесени кривични пријави против 10 лица, меѓу кои и против поранешниот директор на истражниот затвор „Скопје“ во Шуто Оризари, Ф.А. и затворскиот полицаец С.К.  кои се сомничат за злоупотреба на службена положба и овозможување бегство на лице лишено од слобода.