Македонија
Нов пакет социјални мерки од Општина Кисела Вода – „Грижа и сигурност за секое дете”

Со пакет социјални мерки Општина Кисела Вода ќе им помага на своите жители полесно да ја пребродат економската криза.
Денес, градоначалникот Орце Ѓорѓиевски ги потпиша меморандумите со повеќе компании, кои функционираат на територијата на општината и со тоа официјално го отвори проектот со наслов „Грижа и сигурност за секое дете“.
Иако почнува во неделата посветена на детето, овој проект ќе трае во текот на целата година и вклучува повеќе мерки за помош на децата од социјален ризик и децата со еден родител.
Денес потпишаните меморандуми за соработка на повеќе од 50 социјално загрозени дечиња од прво до деветто одделение ќе им овозможат бесплатни курсеви за странски јазици, информатика и спорт.
Дополнително, „Грижа и сигурност за секое дете“ овозможува ослободување од партиципација за трошоците за згрижување во јавните детски градинки на евидентираните дечиња од социјален ризик за што ќе се искористат средства од буџетот на Општината.
Третата мерка опфаќа субвенционирање дел од цената за месечниот оброк за ученици од социјално ранливите категории од прво до трето одделение во основните општински училишта.
„Сакам да ви се заблагодарам на сите тука присутни компании, кои ја покажавте својата општествена одговорност и станавте партнер на Општина Кисела Вода во настојувањето да се помогне на посиромашните семејства кои се најпогодени во овој тежок, кризен период. Како локална самоуправа презедовме низа мерки со кои сакаме да им излеземе во пресрет и да им овозможиме некаква сигурност и ублажување на сиромаштијата со која живеат сè поголем број семејства во Македонија. Симболично, во неделата посветена на детето го почнуваме и денешниот проект ‘Грижа и сигурност за секое дете’, во кој заедно со вас овозможуваме еднакви услови за искористување на потенцијалот на сите деца, без разлика на нивната финансиска положба“, истакна градоначалникот Ѓорѓиевски.
Запознавајќи ги присутните со другите социјални мерки што Општина Кисела Вода досега ги спроведе: обезбедената донација за субвенционирање на сметките за електрична енергија на социјално загрозените семејства, проектот „Ранче за секое прваче“, со кој се обезбедија чанта, тетратки и училиштен прибор за сите првоодделенци, субвенциите за печки на пелети.
Заеднички потоа се проговорите за плановите за преземање дополнителни мерки за економски немоќните семејства, а некои од сопствениците на компаниите дадоа свои предлози и идеи за можностите за дополнителна соработка со цел што побргу и полесно да се надмине тешкиот период.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Не се глупирајте, му порача Арсовска на Изет Меџити

Кажете колку пари земавте за нелегалните објекти и не се глупирајте, му порача градоначалничката Данела Арсовска на вицепремиерот, Изет Меџити, кој претходно денес и’ најави кривична пријава.
Меџити ја нарече Арсовска инструмент за остварување на планот на ДУИ за дестабилизација преку општините, на што градоначалничката реагираше преку Фејсбук статус попладнево.
„Изет изјавил дека ќе сум ја дестабилизирала државата. Изет, единствена дестабилизација од мене ќе добиете ти и твојот измеќар Висар што ти ги потпишувал незаконските дивоградби за кои луѓе ви платиле милиони евра, а сте ги лажеле дека ќе можат да ги легализираат. Не се глупирајте, ви ја знаеме играта, ви ги знаеме лагите, знаеме кога се обидувате да манипулирате со јавноста и да ја дефокусирате. Како тоа секогаш кога некој ќе ви чепне во криминалот тоа е „обид за дестабилизација“? Каква е таа матрица на ВМРО-ДПМНЕ и измеќарите од ВЛЕН? Секогаш кога се во тесно, кога флагрантно се фатени со „рачињата во медот“, тоа било обид за дестабилизација. Каква дестабилизација? Што ќе се дестабилизира? Ќе ви кажам јас што. Единствено нешто што ќе се дестабилизира од откривањето на криминалот со дивоградбите во Чаир е вашата комоција и прилив на нелегални пари. Тоа ќе биде дестабилизирано. Кажете колку пари земавте за нелегалните објекти, не се глупирајте“, напиша Арсовска.
Меџити претходно ѝ порача на Арсовска да се занимава со своите надлежности и најави и пријава против неа за, како што рече, лажни тврдења во врска со објектот во Чаир пред кој се сликала и го објавила. Меџити овој случај го квалификува како „последен обид и план на Ахмети за дестабилизација преку општините“.
Македонија
ВМРО-ДПМНЕ: Вистината за Бојан Христовски излезе на виделина, лагите на СДСМ пропаднаа во вода

Обвинителството ја отфрли пријавата против директорот на АНБ, Бојан Христовски. Тоа смета дека сертификатот за англиски јазик од Бугарија не е фалсификат. Со ова вистината излезе на виделина и сите лаги на СДС паднаа во вода, реагира ВМРО-ДПМНЕ.
„Вистината излезе на виделина со тоа што е констатирано дека Христовски не направил лажна исправа за да ја употреби како вистинска и не употребил преправена исправа како вистинска. Дури ни судиите избрани во Зајас и Струмица не можеа да ја сокријат вистината за лагите кои со месеци СДС ги ширеше. СДС со месеци ја манипулираше јавноста и ширеше дезинформации но со денешната одлука на обвинителството сето тоа им се удри од глава. СДС е синоним за манипулации и дезинформации. СДС е фабрика за лажни вести“, се вели во реакцијата на ВМРО-ДПМНЕ.
СДСМ претходно денес го нарече Јавното обвинителство партиски инструмент, откако беше отфрлена пријавата против директорот на АНБ, Бојан Христовски, за фалсификат на сертификатот на англиски јазик издаден од училиште во Бугарија.
Македонија
ЛДП ќе бара итна средба со премиерот за јасна стратегија и поддршка во евроинтеграциите

ЛДП најави дека ќе бара итна средба со премиерот за јасна стратегија и поддршка во евроинтеграциите.
„Да, премиерот беше во право денес кога во Парламентот на одговор на пратеничко прашање истакна дека ЛДП е една од ретките партии во земјата и во Собраниетo што е целосно интегрирана во европското и меѓународното политичко семејство и може да помогне.
Тој директно ја посочи ЛДП и тоа веројатно е така затоа што нема друга партија во земјата и во Парламентот што има големо влијание и е слушана од нејзините меѓународни и европски партнери.
Како одговорна партија, отсекогаш сме се залагале за заштита на националниот интерес, вклучително националниот идентитет.
За тоа и треба да се истакнат бројни резолуции донесени од страна на либералите со јасна и недвосмислена поддршка на македонскиот јазичен идентитет, култура и традиција. Но, ова не е прашање за освојување политички поени и никогаш не треба да биде. Можеби така било во минатото, можеби се направени грешки, но народот се изјасни на изборите и не сака да го гледа ова прашање како точка каде што политичките партии ќе добијат поддршка или казна. Политичките надмудрувања и кавги ќе доведат до влошување на позицијата на земјата и внатрешен пораст на национализмот и популизмот, што ќе го попречи економскиот просперитет и развој. Лекцијата дадена од народот за ЛДП е јасна и таа мора да биде научена од сите.
Оттаму, да со оглед на тоа што премиерот го оцени како позитивно и значајно влијанието на ЛДП, ќе иницираме итна средба со премиерот и неговиот тим за меѓународна соработка на највисоко ниво за да разбереме какви сѐ напори вложи и која е Стратегијата на владата во последните месеци, како што нагласи и самиот премиер, но и каква е моменталната состојба и како можеме ние искрено да помогнеме во овој процес.
Наша должност е како македонски граѓани и политичари во Македонија да бидеме во служба на народот и во интерес на граѓаните. Тие интереси се силни и праведни државни институции на земјата кои се одговорни и отчетни, просперитет и напредок што водат кон европски економски стандарди, како и еднаквост меѓу европските нации со статус на полноправни членки на Европската унија.
Ние ќе продолжиме уште посилно да работиме и лобираме врз основа на информациите што ќе ни ги дадат премиерот и неговиот тим, како и врз основа на ресурсите кои сообразно ќе бидат ставени на располагање“, велат од ЛДП.