Заменик-претседателот на Владата задолжен за борба против корупцијата и криминалот, одржлив развој и човечки ресурси, Љупчо Николовски, министерот за правда, Бојан Маричиќ, и министерот за внатрешни работи, Оливер Спасовски, одржаа заедничка прес-конференција за ситуацискиот извештај на ГРЕКО-тема „Превенција од корупција и промовирање на интегритет на централната власт“.

„ГРЕКО нотира напредок во делот на препораките за борба против корупција. Тоа е показател за јасно изразената политичка волја, за спречување и крајно искоренување на корупцијата. Во извештајот позитивно е оценето донесувањето на новиот Кодекс за етичко однесување, а особено е потенцирано дека се постапува во согласност со одредбите од Кодексот, односно веќе има случаи на разрешени функционери“, потенцира вицепремиерот Николовски.

ГРЕКО дава и експлицитен позитивен коментар за измената на владината уредба за примање подароци, со која точно се пропишани процедурите за примање протоколарни дарови од странски и домашни, физички и правни лица, информира вицепремиерот Николовски, кој додаде дека сумите за протоколарни подароци се намалени и изнесуваат максимални 20 евра. Се поздравува и тоа што транспарентното се објавени имињата и висината на приходите на сите советници во Владата и министерствата на нивните веб-страници.

Министерот за правда, Бојан Маричиќ, истакна дека она што е мошне значајно е дека ГРЕКО потенцира дека Владата обезбедила значителни финансиски, материјални и човечки ресурси за работа на ДКСК, особено за развојот на софтверски решенија и бази на податоци. Преостанува да се имплементираат овие решенија за да се преоцени препораката за зајакнување на капацитетите на оваа институција.

Маричиќ дополни дека борбата против корупцијата треба истовремено да се води во сите сектори, на сите нивоа во институциите, особено судовите и обвинителствата.
Министерот за внатрешни работи, Оливер Спасовски, посочи дека веднаш по добивањето на препораките од ГРЕКО, се пристапи кон нивно имплементирање, па од страна на ГРЕКО тие препораки се во графата на веќе реализирани активности.

Така, според оценката на ГРЕКО, како што истакна Спасовски, успешно се исполнети препораките за јавно објавување на сите претставки и предлози поведени за дисциплинска и кривична одговорност на полициските службеници, назначување посебни лица за интегритет во рамките на МВР, континуирани обуки на сите политички службеници во врска со јакнењето на нивниот интегритет и спречувањето на конфликтот на интереси и измена на Етичкиот кодекс на полициските службеници, со што сега се регулирани прашањата за конфликт на интереси, случаи на корупција и примање дарови од страна на полициските службеници.

„Како што можете да забележите, исполнувањето на добар дел од препораките е во тесна врска и претставува уште еден чекор напред во континуираниот процес на проверка (ветинг) на полициските службеници за што се заложив уште со моето доаѓање на чело на МВР, а сè со цел да се зацврсти интегритетот на полицајците и нивната отпорност кон какви било влијанија, кои се спротивни на законите. Односно, да имаме декриминализирана и департизирана полиција, која ќе го штити интересот на граѓаните и полицајците, кои професионално и одговорно ќе си ја вршат својата задача“, истакна министерот Спасовски додавајќи дека радува фактот што од страна на ГРЕКО е препознаена и особено истакната и позитивната транспарентност што ја постигна МВР во претходниот период.