Македонија
(Видео) Кривични против 12 лица за убиството во тетовска Мала Речица

Тетовската полиција денеска преку соопштение објави дека го расчистила случајот со пукањето во тетовска Мала Речица во соработка со кумановската полиција и Одделот за криминалистичка полиција. Во вооружената престрелка животот го загуби кумановецот Наип Реџепи, а двајца беа повредени. Како што се наведува во извештајот, до надлежното Основно јавно обвинителство се поднесени кривични пријави против 12 лица.
Поради сомнение за сторено кривично дело „убиство“ и соизвршителство, како и две кривични дела „убиство во обид“, поднесени се пријави против лицата: М.Н. (40), М.Х. (34), М.Ф. (23), М.Б. (21), М.И. (21), М.М. (24), Р.Д. (44) сите од село Черкези – кумановско, потоа Р.С. (42), К.Х. (42), Р.Б. (41) тројцата од Куманово, Љ.Б. (40) од Елбасан (Албанија) и Д.Ф. (22) од село Опае, липковско.
Десетмина од пријавените се предадени на Судија на претходна постапка којшто им одредил притвор во траење од по 30 дена. Покрај десетмината кои се веќе обезбедени, се трага по дваесет и двегодишниот Д.Ф. од Опае, додека М.Ф. поради здобиените телесни повреди во престрелката е задржан на болничко лекување. Истовремено, против лицата Р.Б. и Љ.Б. е поднесена и кривична пријава под сомнение за сторено кривично дело „недозволено изработување и држење на огнено оружје и распрскувачки материи“.
Во селото Мала Речица на петти месецов се случи престрелка помеѓу две групи на лица кои биле со неколку автомобили. Притоа, во престрелката беше убиен Наип Реџепи (47) од село Белановце, липковско, додека со тешки телесни повреди се здобил М.Ф, 23-годишник од кумановското село Черкези, кој поради серозноста на повредите веднаш бил пренесен во комплексот клиники „Мајка Тереза“ во Скопје. Во пукањето со телесни повреди се здобил и 42-годишниот кумановец Р.С.
Како што информираат од полицијата, на местото на настанот пронајдени биле осум испукани чаури од пиштолска муниција, еден неиспукан куршум од пиштолска муниција и три зрна од куршуми, траги од крв и една безбол палка. Во рамки на полициската операција во едно од возилата, лоцирано непосредно по пукањето, кога и биле приведени двајца од 12 осомничени, пронајдени биле и два пиштоли марка „Валтер П99“ со калибар 9 милиметри, како и пиштол марка „Брауинг“ исто така калибар 9 милиметри, кои биле употребени во пресметката во Мала Речица. Во врска со овој случај, по наредба на јавен обвинител извршени биле претреси на 12 локации во Куманово.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) ВМРО-ДПМНЕ ги објави имињата на уште осум кандидати за градоначалници

Извршниот комитет на ВМРО-ДПМНЕ, вечерва во Штип определи уште осум кандидати за градоначалници за претстојните локални избори.
ВМРО-ДПМНЕ донесе одлука да му предложи на Централниот комитет.
1. Македонски Брод – Жарко Ристески.
2. Могила – Драганчо Саботковски
3. Пробиштип – Тони Тоневски
4.Богданци – Марјан Пеев
5. Демир Капија – Наталија Димитриева
6. Росоман – Ѓорги Крстевски
7. Новаци – Стевче Стевановски
8. Дебарца – Златко Силјановски
Пратеникот Антонијо Милошоски по состанокот изјави дека овие 8 кандидати за градоначалници се одговорни, исполнителни личности кои што својата активност ја докажале не само во рамките на коалицијата на ВМРО-ДПМНЕ туку имаат углед и во самите општини. Ним ќе им биде препорачано во следниот период, да си отворат што поголема комуникација со локалните граѓани во општините за да може да поработат директно на терен за составување на програмата која што е потребна за локални избори.
Централниот штаб ќе биде на располагање заедно со еден тим кој што ќе биде формиран за локалните избори, да им помогне за одредени проекти, кој што се од поголемо капитално значење за Македонски брод, Могила, Новаци, Пробиштип, Богданци, Демир Капија, Росоман и Дебарца.
„Цениме дека со овие 8 вечерва објавени кандидати за градоначалници и претходните 25, ВМРО-ДПМНЕ со самодоверба чекори кон локалните избори бидејќи сме единствената партија која што во моментов има обзнането имиња на 33 кандидати за градоначалници за кои што сметаме дека се на добар пат и да ја добијат довербата на граѓаните“, рече Милошоски.
За оние кои што се актуелни градоначалници, партијата смета дека дека со досегашната работа, ќе имаат добар кредит да ја добијат и понатамошната доверба.
Македонија
СДСМ: Јавното обвинителство се обиде да ја релативизира одговорноста на актуелните функционери

Според СДСМ, со денешната прес-конференција, Јавното обвинителство уште еднаш потврдило дека постои сериозен обид да се минимизира и релативизира одговорноста на носителите на актуелни функции и институции поврзани со трагедијата во Кочани.
Од опозициската партија велат дека наместо да се лоцира институционалната одговорност и да се повикаат на одговорност директорите на Државниот пазарен инспекторат, УЈП и други релевантни органи кои имаа обврска да постапуваат, фокусот се префрла на индивидуални случаи и на маргинални групи, избегнувајќи ја суштината – зошто и како фирма увезувала и со месеци продавала опасна пиротехника без дозвола, и кој тоа го дозволил.
Дополнително, како што се додава, наместо да се отворат посебни истраги за секој аспект од случајот – за незаконскиот увоз, за институционалниот надзор, за реакцијата на полицијата и за конкретните пропусти на диското, Обвинителството сѐ спакува во еден предмет, со што ризикува да се развлекува постапката со години, па дури и децении. Со ваков пристап, правдата станува недостижна – а тоа е неприфатливо.
„Сериозно прашање е и одлуката приведените полицајци и полициски функционери, кои биле одговорни кобната вечер, да се пуштат на слобода со мерки за претпазливост. Особено загрижува фактот дека двајца од нив биле пресретнати на пат кон граница со Бугарија, што отвора сомнеж за можно бегство и криење на вината.
СДСМ уште еднаш потенцира – без целосна и непристрасна истрага, без одговорност за институциите и носителите на функции кои затаиле, нема да има вистинска правда за жртвите и нивните семејства.
Граѓаните гледаат. И со право очекуваат правда“, се додава во партиското соопштение.
Македонија
(Видео) Во Гази Баба се гради огромна дива депонија без никакви дозволи, објави Арсовска

Во општина Гази Баба, фирма затекната од инспекторат на град Скопје при вршење нелегални активности, правење огромна дива депонија со градежен и опасен отпад и бесправна експлоатација на земјиште, без лиценци, елаборати, дозволи и одобренија, што претставува сериозна опасност по здравјето на граѓаните и животната средина, објави градоначалничката на Град Скопје, Данела Арсовска.
„Апелираме до Министерството за внатрешни работи да постапи, бидејќи неказнивоста и непостапувањето предизвикува сторителите на вакви дела да мислат дека се недопирливи пред законот. Фирмата која прави дива депонија и каде се експлоатира, го има поткопано 110kV кабловски и воздушен далновод кој го напојува со електрична енергија градот Скопје. На ова земјиште сопственост на Република Македонија се прави сериозна штета на главниот далновод, известени се сите надлежни институции за кои очекуваме да не се кријат и да постапуваат“, вели Арсовска.