Македонија
Обвинителството да поведе обвинение за насилство по упадот во М-НАВ, бара ВМРО-ДПМНЕ

ВМРО-ДПМНЕ бара од Обвинителството да поведе обвинение за кривично дело насилство по упадот и физичкиот напад врз вработени во контролата на летање.
Од ВМРО-ДПМНЕ велат дека откако функционерите на ДУИ и СДСМ наишле на отпор од вработените во М-НАВ поради вработување партиски и некфалификувани кадри, со наместени огласи за вработување, прешле на притисоци и насилство, само за насила да ги внесат своите партиски луѓе, кои наумиле да ги вгнездат во оваа институција, каде што има најголеми плати во државата.
„Првин се обидоа со класичен притисок, првиот човек на Синдикатот да го викнат на разговор во МВР под образложение за наводни закани кон директорот на М-НАВ. Притоа, кога виде власта дека овој притисок само уште толку ги обедини вработените во оваа институција, каде што со оставки се заканија 30-ина вработени, почнаа со нова темна операција, со вклучување партиски војници и директни физички напади. За каква власт говориме кога може партиска војска слободно да влезе во една од најзаштитената институција во Македонија и да изврши физички напади врз контролори на летање, само поради тоа што застанале во одбрана на своите права и во одбрана на институцијата во која професионално работат“, велат од ВМРО-ДПМНЕ.
Од друга страна, како што се додава, надлежното министерство, а тоа е Министерството за транспорт и врски, на чело со Бочварски, се оградува дека немале ингиренции да се вмешаат.
„Не нѐ изненадува ова бидејќи Димитар Ковачевски нема глас во оваа Влада предводена од ДУИ, тој не смее збор да ѝ каже на ДУИ бидејќи целосно е зависен од неа. Овие закани и напади врз вработените и предизвикан страв не е нарушување на јавниот ред и мир, туку типично кривично дело насилство и треба веднаш да реагира Јавното обвинителство.
По овој скандал, до сега требаше да има барем неколку оставки, од директорот на М-НАВ до министерот Бочварски, па сѐ до безгласниот премиер. Но, очигледно е дека тоа нема да се случи.
Граѓаните на следните избори ќе си го кажат своето мислење за сите од нив, во тоа немаме дилеми.
Никогаш не било полошо! Важно е да ги поразиме!“, велат од ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ: СДС е симбол на криминал, Владата е стабилна и работи на економски раст

Од ВМРО-ДПМНЕ велат дека слободното изразување мислење и став за различни проблематики за СДС е непознат поим. Во нивното соопштение се наведува дека од партија која на таканаречени внатрепартиски избори настапува со еден кандидат, без можност членовите да избираат, ништо друго и не може да се очекува.
„Во владината коалиција владее демократија каде што секој има право на свое мислење, слободно изразување и партиско делување,“ велат од ВМРО-ДПМНЕ.
Од партијата нагласуваат дека Владата предводена од ВМРО-ДПМНЕ посветено работи на враќање на функционалноста на институциите на системот, кои, како што велат, биле целосно уништени за време на владеењето на СДС.
„Нешто што се рушело и разградувало седум години не може преку ноќ да се среди, но полека, но сигурно, системот се враќа во функција,“ истакнуваат од ВМРО-ДПМНЕ.
Во соопштението се потенцира дека економскиот пустош што го оставила претходната власт влијаел на стандардот на граѓаните, но дека со посветена и чесна работа Владата успева да го запре слободниот пад на економијата.
„Економијата заживеа, што го потврдуваат податоците на институциите – последниот квартал од минатата година заврши со раст на БДП од 3,2 проценти. Платите и пензиите се покачуваат, растат директните странски инвестиции и се вложува во капитални проекти,“ соопштуваат од ВМРО-ДПМНЕ.
Воедно, од партијата додаваат дека единствената работа што функционирала за време на седумгодишното владеење на СДС и ДУИ биле криминалот и корупцијата.
„Тоа не го тврдиме само ние, туку го потврдуваат и надлежните институции. Нема област каде што ќе се направи ревизија, а да не излезе форма на организиран криминал и корупција од времето на претходната власт,“ велат од ВМРО-ДПМНЕ.
На крајот, од владејачката партија порачуваат дека Владата е стабилна, функционална и целосно посветена на обезбедување економски раст и подобар животен стандард за сите граѓани, додека, како што велат, СДС останува симбол на криминал, корупција и предавства.
Македонија
Левица: Стан во Центар од 1 денар, куќа од 28 денари, еве што пријавиле функционери од ВМРО-ДПМНЕ

Левица најостро ја осудува праксата на непрофесионално и паушално пополнување на анкетните листови за имотна состојба од страна на функционерите на ВМРО-ДПМНЕ, нарекувајќи го тоа флагрантно потценување на законските обврски и грубо поткопување на транспарентноста и интегритетот на јавните функции.
Согласно Законот за спречување на корупцијата и судирот на интереси, функционерите се должни до Државната комисија за спречување на корупција (ДКСК) да достават анкетни листови, односно детално да го пријават својот имот и имотот на нивните семејства, како и секоја промена која ќе настане за време на нивниот мандат. Сепак, и без да се познаваат личните финансиски прилики на функционерите на ДПМНЕ, јасно се забележуваат бројни паушални податоци, неправилности и несоодветно исполнување на законската обврска.
Според јавно достапните податоци, министерот за култура и туризам, Зоран Љутков, има пријавено пет недвижнини. Помеѓу нив се издвојува неговиот стан во Банско, како и: стан во Карпош од 38 квадратни метри со вкупна вредност од 2,39 денари; куќа во Габрово со површина од 315 квадратни метри со вкупна вредност од 28 денари и двор од 44 квадратни метри со вкупна вредност од 1,5 денари, сето тоа на име на неговиот брачен другар. Дополнително, брачниот другар поседува и стан во Карпош од 55 квадратни метри вреден 3,5 денари.
Пратеничката од ДПМНЕ, Бети Стаменкоска – Трајкоска, и покрај тоа што пријавила кредит, како сопственик се јавува само на акции стекнати уште во 2005 година во Стопанска банка, Макстил и ЗК Пелагонија. Следејќи го примерот на нејзините родители кои исто така поседуваат голем имот во акции, таа има пријавено три моторни возила, сите на име на нејзиниот брачен другар. Недвижниот имот е на име на нејзините родители, а пријавила и градежно земјиште од 134 квадратни метри во вредност од 0 денари. Иако според законите е должна да пријави целиот имот на нејзиното семејство, нема податоци за банкарски сметки.
Пратеничката Иванка Василевска, пак, во својот анкетен лист навела дека поседува стан во Центар со површина од 99 квадратни метри и вредност од само 1 денар.
Во вакви услови се поставува логично прашање: зошто ДКСК го толерира ова флагрантно непочитување на законските обврски? Отсуството на сериозна проверка и адекватно постапување од страна на ДКСК не само што ја поткопува довербата во институциите, туку ја охрабрува и понатамошната пракса на прикривање на реалниот имот на носителите на јавни функции. Корупцијата не се спречува со затворање на очи пред ваквите манипулации, потенцира Левица.
Партијата најавува дека во наредниот период јавно ќе ги објавува сите неправилности и забелешки поврзани со пријавениот имот на носителите на јавни функции, со цел да ја поттикне ДКСК на соодветно постапување.
„Бараме итна ревизија на анкетните листови на сите функционери и процесуирање на сите кои со неточни или лажни податоци ја изигруваат законската обврска!“, се наведува во реакцијата на Левица.
Македонија
Муцунски: Дипломатскиот пасош не ѝ дава имунитет на претседателката на ДКСК

Актуелната претседателка на Државната комисија за спречување на корупцијата (ДКСК), Татјана Димитровска, која е осомничена за оддавање службена тајна во случајот „Адитив“, не смее да има контакт со предмети, пошта и друга документација поврзана со работењето на Антикорупциска. Дополнително, таа нема право да гласа или да врши распределба на предмети.
Димитровска завчера беше изведена пред Судија на претходна постапка во Основниот кривичен суд во Скопје. Судијата, постапувајќи по предлогот на Обвинителството, ѝ определи мерки за претпазливост, вклучително и забрана за преземање на одредени работни активности.
Минатата година, Татјана Димитровска доби дипломатски пасош од Министерството за надворешни работи, со што ѝ беше овозможено да патува без чекање на пасошка контрола при влез и излез од државата. Иако и останатите шест члена на Комисијата побарале ваква привилегија, не им била одобрена.
Министерот за надворешни работи, Тимчо Муцунски, во изјава за „Сител“ во емисијата „Тема на денот“, појасни дека поседувањето дипломатски пасош не носи автоматски имунитет и не може да влијае врз истрагата.
„Самиот дипломатски пасош на наш граѓанин не значи дека тој ужива било какви права поврзани со некоја форма на имунитет. Што значи дека истиот не може да влијае на самата постапка која се спроведува од нашите органи и во моментот кога ќе престане функцијата на таа поединечна личност, секако МНР ќе го одземе тој дипломатски пасош“, изјави Муцунски.
Тој додаде дека, иако постои презумпција на невиност, од морални и етички причини Димитровска треба да поднесе оставка.
„Логично е кога сте опфатени со ваков тип на постапка, почитувајќи ја и презумпцијата на невиност, ова го велам пред сѐ како човек, не како министер – логично е да дадете оставка. Тоа не треба, според мене, да влијае на кредибилитетот на сите останати членови на таа комисија“, истакна Муцунски.